Pa słovach Darji Lipkinaj, jaje padabaronnamu nichto nie prapanoŭvaŭ napisać prašeńnie ab pamiłavańni.
Pa słovach Darji Lipkinaj, jaje padabaronnamu nichto nie prapanoŭvaŭ napisać prašeńnie ab pamiłavańni.
Advakat palityčnaha źniavolenaha Mikity Lichavida Darja Lipkina sustrełasia sa svaim padabaronnym u kałonii №10 u Navapołacku. Mikita zaraz pakarany źmiaščeńniem u pamiaškańnie kamiernaha typu za niekalki parušeńniaŭ režymu.
Jon admaŭlajecca pryznavać siabie vinavatym i zychodziačy z hetaha nie vykonvaje niekatoryja patrabavańni ŭnutranaha rasparadku.
Spačatku razmova advakata i padabaronnaha išła praz škło, jak pry karotkaterminovych spatkańniach. Ale paśla taho, jak Lichavid napisaŭ zajavu, u jakoj prasiŭ dazvolić sustreču z advakatam u pamiaškańni, jana praciahnułasia ŭ asobnym pamiaškańni:
— My ź im abmiarkoŭvali pracoŭnyja pytańni, padrychtoŭku nadzornaj skarhi ŭ pryvatnaści. Što datyčyć jaho stasunkaŭ, na niestatutnyja stasunki Mikita mnie nie skardziŭsia, pra kanflikty nie paviedamlaŭ.
Pa słovach Darji Lipkinaj, da jaje padabaronnaha nichto nie źviartaŭsia z prapanovaj napisać prašeńnie ab pamiłavańni na imia prezidenta.
Razam z advakatam u kałoniju pryjechała i maci palitźniavolenaha Alena Lichavid. Jana sustrełasia z uračom hetaj ustanovy:
— Ja sustrełasia z uračom kałonii, jon skazaŭ što Mikita prajšoŭ pryznačanaje lačeńnie, što ciapier jon nie skardzicca na straŭnik, kožny dzień prachodzić miedyčny ahlad, dzie jamu mierajuć cisk. Kaniešnie, urač nie chavaje, što jon chudy, bledny z-za taho, što pravioŭ try miesiacy ŭ ŠYZA biez pavietra, bieź śviatła.
Pa słovach Aleny Lichavid, u pamiaškańni kamiernaha typu Mikita ŭtrymlivajecca ŭ kamiery, dzie znachodzicca jašče 4 asudžanych. U Mikity jość svoj łožak.
Pa słovach maci palityčnaha źniavolenaha, jana prasiła advakata paviedamić synu ab svajoj padtrymcy, kali jon admovicca pisać prašeńnie ab pamiłavańni.
«Jaho pavinien apraŭdać i vyzvalić sud, a nie niechta svaim rašeńniem, moža być, u stanie ahonii. A ja ŭsio vytrymaju i prajdu i budu jaho čakać», — skazała Alena Lichavid.
Kamientary