Bilt sustreŭsia z delehacyjaj hramadzianskaj supolnaści Biełarusi

Na sustreču ź ministram byli zaprošanyja redaktarka sajta charter97.org Natalla Radzina, staršynia Biełaruskaj asacyjacyi žurnalistaŭ Žanna Litvina, siabar Rady pravaabarončaha centra «Viasna» Taciana Raviaka, kiraŭnica Kamitetu dapamohi represavanym «Salidarnaść» Ina Kulej i aktyvist kampanii «Havary praŭdu» Andrej Dźmitryjeŭ.

U pačatku sustrečy Karł Bilt adznačyŭ, što siońnia ŭsim vidavočna, što Biełaruś maje vielizarnyja ekanamičnyja prablemy, i ŭ suviazi z hetym, adznačyŭ ministr, «my bačym manioŭry z boku Łukašenki».

«Z-za najaŭnaści palitviaźniaŭ u turmach my znachodzimsia z uładami ŭ stanie tupiku», — skazaŭ Karł Bilt, i padkreśliŭ, što Jeŭropa čakaje vyzvaleńnia z turmaŭ usich viaźniaŭ sumleńnia. Paśla vyzvaleńnia ŭčora 11 palitviaźniaŭ u turmach praciahvajuć znachodzicca kandydaty ŭ prezidenty Andrej Sańnikaŭ, Mikałaj Statkievič, Źmicier Us, kaardynatar hramadzianskaj kampanii «Jeŭrapiejskaja Biełaruś» Źmicier Bandarenka, kiraŭnik pravaabarončaha centra «Viasna» Aleś Bialacki, moładzievyja aktyvisty Źmicier Daškievič, Eduard Łobaŭ, pradprymalnik Mikałaj Aŭtuchovič.

Karł Bilt taksama padkreśliŭ, što nieabchodnyja nie tolki vyzvaleńnie, ale i reabilitacyja palityčnych źniavolenych.

Ministr vysłuchaŭ mierkavańni pradstaŭnikoŭ biełaruskaj delehacyi z nahody situacyi ŭ krainie i dalejšaha raźvićcia adnosinaŭ Biełarusi ź Jeŭropaj.

Redaktarka sajta charter97.org Natalla Radzina ŭ sustrečy adznačyła, što vyzvaleńnie častki palitviaźniaŭ stała mahčymaje tolki dziakujučy sankcyj, uviedzienych Jeŭraźviazam i ZŠA, i ichniaj pryncypovaj pazicyi adnosna nieabchodnaści vyzvaleńnia z turmaŭ viaźniaŭ sumleńnia.

«U Jeŭropy ŭžo byŭ nieadnarazovy dośvied viadzieńnia dyjałohu z uładami Biełarusi. Usio heta pryvodziła tolki da ŭzmacnieńnia represij u Biełarusi suprać apazicyi. Dyktatar razumieje tolki movu siły i nijakim inšym čynam paŭpłyvać na jaho niemahčyma. Tamu paśla vyzvaleńnia palityčnych źniavolenych, nieabchodna praciahvać palityku cisku na režym. Nieabchodna damahacca praviadzieńnia novych volnych prezidenckich vybaraŭ, i ni ŭ jakim razie nie zabyvacca na toje, što Łukašenka ŭzurpavaŭ uładu», — adznačyła žurnalistka.

Kiraŭnik Biełaruskaj asacyjacyi žurnalistaŭ Žanna Litvina raspaviała ab masavych represijach, jakim padvierhnulisia biełaruskija niezaležnyja žurnalisty paśla prezidenckich vybaraŭ 19 śniežnia, i prakamientavała apošniuju inicyjatyvu Łukašenki ab praviadzieńni «kruhłaha stała» z apazicyjaj.

«Hetaja inicyjatyva nakiravanaja bolš na Jeŭraźviaz i na Rasieju, ale nijak nie na samu apazicyju. U suviazi z hetym užo prydumali aniekdot: «Usie pryjšli na «kruhły stoł», a tam tolki adzin stuł», — skazała staršynia BAŽ.

Pravaabaronca Taciana Raviaka adznačyła, što «praces ŭziaćcia palityčnych zakładnikaŭ praciahvajecca, i aryšt Bialackaha staŭ paćvierdžańniem hetamu».

Taciana Raviaka nahadała kiraŭniku MZS Šviecyi, što sustrakałasia ź im užo 2 hady tamu i padčas toj sustrečy abmiarkoŭvalisia tyja ž temy. «Nie chaciełasia b praz 2 hady znoŭ havaryć z vami pra toje ž. Nie varta davać biełaruskim uładam avansy, jak heta było raniej», — skazała Raviaka.

Kiraŭnik MZS Šviecyi adznačyŭ, što «ŭ Jeŭropy nie takija vialikija mahčymaści cisku na režym Łukašenki, ale siońnia vielmi źmianiłasia ekanamičnaja situacyja ŭ krainie. Łukašenka vydatkavaŭ vielizarnyja hrošy na prezidenckija vybary 19 śniežnia, pakolki nie byŭ upeŭnieny, što pieramoža. Ekanamičny spad u Biełarusi budzie praciahvacca. Rasieja bolš nie moža vyłučać biaźmiežnyja srodki, a Łukašenku nieabchodnyja 8 miljardaŭ dalaraŭ dla stabilizacyi biahučaj situacyi. Ale ŭ MVF vielmi žorstkija ekanamičnyja ŭmovy vydačy kredytaŭ. Siońnia Biełaruś znachodzicca na miažy razvału. Nie vyklučana, što Łukašenka zachoča źbiehčy. Takija ludzi, jak jon, zaŭsiody kidajuć karabiel, jaki tonie».

Kiraŭnik MZS taksama adznačyŭ, što pakul JEZ addaje pieravahu nie havaryć, što budzie, kali Łukašenka vyzvalić palitviaźniaŭ i što budzie, kali jon ich nie vyzvalić.

«Kali jon vyzvalić usich palitviaźniaŭ, my vierniemsia da situacyi 18 śniežnia 2010 hoda. Ale jana ž nie była spryjalnaj. Adnoj z palityčnych umovaŭ pavinnaje być praviadzieńnie volnych vybaraŭ», — adznačyŭ Karł Bilt.

Ministr taksama adznačyŭ, što na majučym adbycca ŭ Varšavie samicie «Uschodniaha partniorstva» buduć pradstaŭlenyja biełaruskija čynoŭniki, adnak jany nie buduć paŭnapraŭnymi ŭdzielnikami mierapryjemstva.

• 0
• 0
• 0
• 0
• 0
• 0
• 0
• 0