Novym iPhone'am možna budzie kiravać hołasam

Karparacyja Apple prezientavała novuju viersiju iPhone. iPhone 4S słuchajecca hałasavych kamandaŭ i zachoŭvaje dakumienty ŭ «vobłaku». Akramia taho, novy Apple moža źmianić ŭjaŭleńni pra pošuk u internecie.

Prezientacyja novaha iPhone prajšła ŭ štab-kvatery Apple u Kupiertyna. Upieršyniu jana prajšła biez chvoraha Styva Džobsa. U vyniku akcyi Apple pajšli ŭniz.

Smartfon novaha pakaleńnia budzie pracavać na bazie apieracyjnaj sistemy Apple iOS 5. Ad papiaredniaha iPhone čaćviortaha pakaleńnia navinka adroźnivajecca bolš mahutnym pracesaram A5, jak u iPad 2, a taksama 8-miehapiksielnaj kamieraj, jakaja zmoža zdymać va ŭmovach drennaha aśviatleńnia.

U toj ža čas vyhlad iPhone 4S amal nie adroźnivajecca ad papiaredniaj madeli.

Novy iPhone budzie padtrymlivać anłajn-servis Apple iCloud, jaki dazvalaje zachoŭvać dadzienyja na internet-siervierach Apple i aŭtamatyčna sinchranizavać fajły z usimi pryładami karystalnika — smartfonami, płanšetami i kampjutarami vytvorčaści Apple.

Dadatki, jakija padtrymlivajuć iCloud, aŭtamatyčna dasyłajuć novyja dakumienty ŭ «vobłaka».

Apple zastajecca lidaram rynka smartfonaŭ. Alo ź im kankuruje Android ad Google.

Markietołahi Apple nazvali novuju prezientacyju «Let's talk iPhone», bo novaja viersija hadžeta mocna prasunułasia ŭ technałohijach raspaznańnia hołasu.

U iPhone 4 užo jość funkcyja hałasavoha kiravańnia. Heta bazavaja technałohija, jakaja dazvalaje z dapamohaj padadzienaj hołasam kamandy nabirać numary abanientaŭ z adrasnaj knihi i prajhravać muzyčnyja kampazicyi z płejlista.

Novyja funkcyi hałasavoha kantrolu ad Apple dazvalajuć karystalnikam davać svajmu telefonu ŭkazańni dasłać elektronnuju poštu, zrabić paznaku ŭ kalendary — naprykład, pryznačyć sustreču na kankretnyja datu i čas — abo znajści patrebny sajt u internecie.

U Apple daŭno pracujuć śpiecyjalisty pa maŭlenčaj kamunikacyi. Letaś karparacyja kupiła firmu Siri, jakaja raspracavała miechanizm braniravańnia avijabiletaŭ i volnych stolikaŭ u restaranach praŭ internet z dapamohaj hałasavych kamand. Taksama Apple mahła vykarystoŭvać technałohii kampanii Nuance Communications, jakaja pracuje nad prahramami pa pieravodzie vusnaha maŭleńnia ŭ drukavany tekst.

Darečy, Google taksama dazvalaje rabić vusnyja zapyty i ŭžo ŭmieje transfarmavać vymaŭlenyja frazy ŭ drukavany tekst. Dalejšyja raspracoŭki ŭ hetym kirunku mohuć pieraviarnuć śviet kampjutaraŭ.

• 0
• 0
• 0
• 0
• 0
• 0
• 0
• 0