Padčas reformy 1991 h. biełarusy stracili 30 miljardaŭ savieckich rubloŭ

Pavodle padlikaŭ Nacyjanalnaha banku Respubliki Biełaruś, u vyniku hrašovaj reformy savieckaha ŭradu ŭ 1991 hodzie biełarusy stracili bolš jak 30 miljardaŭ savieckich rubloŭ. Jak kažuć u Nacbanku, zachadaŭ dziela kampensacyi ŭkładaŭ hramadzianam Biełarusi pakul nia planujecca — na heta niama srodkaŭ.

Pradstaŭnik Nacyjanalnaha banku Biełarusi Anatol Drazdoŭ kaža, što zachadaŭ, analahičnych tym, što robiacca ŭ Litvie, chutka nie planujecca. Na kampensacyjnyja vypłaty ŭ biudžecie «lišnich hrošaj» niama. Jak padličyli eksperty Nacbanku, na hetyja mety nieabchodna vydatkavać niekalki dziasiatkaŭ miljardaŭ dalaraŭ.

Drazdoŭ: «Było niekalki hadoŭ tamu daručeńnie prezydenta — vyvučyć hetaje pytańnie. Jano było vyvučanaje — u tym liku i Nacyjanalnym bankam. My vykazali svaje prapanovy. Ale, razumiejecie, u čym napraŭdu prablema? Niama hrošaj! Pry peŭnym raźvićci ŭ ekanomicy ich znajści, biezumoŭna, možna. Ale vy možacie sabie ŭjavić, kolki srodkaŭ dla hetaha nieabchodna? Navat kali pryraŭnać adzin da adnaho da dalara (nia budziem užo brać kurs 1 dalar = 62 kapiejki, jaki tady byŭ aficyjna), to cana pytańnia — 30 miljardaŭ dalaraŭ. I heta pry dziaržaŭnym biudžecie 20 miljardaŭ! Voś i paličycie — dzie takuju sumu ŭziać, tym bolej u takoj składanaj sytuacyi. Karaciej kažučy, hetaje pytańnie pakul zamierła».

Anatol Drazdoŭ udakładniaje: ad kanca 1990-ch hadoŭ razhladali roznyja varyjanty kampensacyi stračanych układaŭ. Pieradusim Nacyjanalny bank prapanoŭvaŭ vypuskać kaštoŭnyja papiery, padmacavanyja ŭradavymi harantyjami, pakolki vypłaty mieli b ažyćciaŭlacca ź biudžetu. Brać zamiežnyja kredyty pad vypłaty, na dumku dziaržaŭnych finansistaŭ, było nia nadta razumna.

Što da dośviedu Litvy, to, pavodle spadara Drazdova, jon nia varty pierajmańnia. Pradstaŭnik Nacyjanalnaha banku kaža, što hrašovaja kampensacyja litoŭskich uładaŭ nieadekvatnaja.

Drazdoŭ: «Razumieju, što nasielnictva Litvy ŭ dva z pałovaj razy mienšaje. Ale takuju sumu my choć zaraz možam nasielnictvu addać. My ž dvojčy ŭžo rabili kampensacyju ŭ nievialikich pamierach. Ale pahladzicie — navat bahataja Rasieja, u jakoj bolš jak 300 miljardaŭ dalaraŭ zołatavalutnych rezervaŭ, vypłačvaje svaim układčykam 1000 rasiejskich rubloŭ kožnamu, što mieniej za 40 dalaraŭ.

Nichto hetaj prablemy paŭnavartasna nia moža vyrašyć. Tamu prablema ŭsiudy adnolkavaja — u zacikaŭlenych krainach niama hrošaj, patrebnyja vielmi značnyja srodki. Dziela spraviadlivaści: my viedajem, u kaho hrošy ciapier znachodziacca — u tych, chto potym za biescań skuplaŭ dziaržaŭnuju ŭłasnaść i ciapier maje miljardy. Heta tyja ž hrošy, jany ž nie źnikajuć. Jany prosta źmianili ŭłaśnika, pieraciakli z adnych ruk u inšyja. Ale hetaha ŭžo nia vypraviš. Tamu, na žal, pytańnie zastajecca nieraźviazanym».

Spadar Drazdoŭ kaža, što pytańnia kampensacyi stračanych hrašovych układaŭ na paradku dnia zacikaŭlenych dziaržaŭnych ustanovaŭ niama.

• 0
• 0
• 0
• 0
• 0
• 0
• 0
• 0