Homielskaja ŽKH pierachodzić na režym žorstkaj ekanomii

U haradskoj kamunałki katastrafična nie chapaje srodkaŭ na kapitalny ramont damoŭ i vulic.

Usio bolšych vialikich asihnavańniaŭ patrabuje vuličnaje aśviatleńnie. Reziervy dla padvyšeńnia zarabotnaj płaty samich kamunalnikaŭ vyčarpanyja, tamu idzie skaračeńnie štataŭ. Sponsarskuju dapamohu akazali naftaviki, ale i heta nie vyrašaje prablemy.

Paznavalnaja aryfmietyka

Za vuličnaje aśviatleńnie ŭ listapadzie horadu daviadziecca zapłacić 1,9 miljarda rubloŭ, — paviedamiŭ padčas čarhovaj pres-kanfierencyi ŭ Homielskim harvykankamie hiendyrektar KVUP «Homielskaja haradskoja ŽKH» Viktar Kułaha. U pazaminułym miesiacy hetaja ličba była značna mienšaj, adnak, taksama ciažkapadjomnaj dla haradskoha biudžetu — 1,2 miljarda. Rezki skačok adbyŭsia ŭ suviazi z apošnim pavyšeńniem cenaŭ na enierhanośbity, rostam pa valutnym kaeficyjencie, nieabchodnaściu pavyšeńnia zarabotnaj płaty i hetak dalej. Tamu hałoŭny kamunalnik Homiela inicyjavaŭ skaračeńnie kolkaści śviacilniaŭ, što pracujuć uviečary. Pierachod na «načny režym», kali adklučajecca tracina ŭsich vuličnych śviacilniaŭ, budzie pačynacca na hadzinu-dźvie raniej, čym zvyčajna. Darečy, sekanomić u haradskim ŽKH vyrašyli nie tolki na vuličnym aśviatleńni. Ciapierašnija «składanyja» ekanamičnyja ŭmovy vymusili kiraŭnikoŭ 22-ch pradpryjemstvaŭ haradskoj kamunałki pajści na «aptymizacyju» kolkasnaha składu svaich supracoŭnikaŭ — ich skaračeńnie. Heta adbyłosia pa rekamiendacyjach Minžyłkamhasa i abłasnoha kiravańnia ŽKH. Zrešty, metanakiravanaha skaračeńnia nie pravodziłasia. Ciapierašnija ŭmovy materyjalnaha zaachvočvańnia za pracu takija, što ludzi sychodziać sami. Na siońniašni dzień siaredniaja zarabotnaja płata pa pradpryjemstvach haradskoj sistemy ŽKH składaje kala 1,5 młn rubloŭ, a ŭ siarednim pa Homieli — za 2,5 młn rubloŭ.

Dachi ŭ abmien na vokny

Dla ramontu dachaŭ i fasadaŭ žyłoha fondu Homiela vobłaść u hetym hodzie vyłučyła 12 miljardaŭ rubloŭ, ilvinaja dola hetych srodkaŭ była nakiravanaja mienavita na ramont haradskich dachaŭ. Pa vyniku hoda płanujecca vyjści na 155 tys. kvadrataŭ adramantavanych dachaŭ. Kali da hetaha pryplusavać abjom ramontu dachaŭ pa minułym hodzie, to pałova frontu prac vykananaja. Pra heta, pa słovach hiendyrektara KVUP «Homielskaje haradskoje ŽKH» Viktara Kułahi, śviedčać i zvaroty hramadzian, jakija ŭ častcy dachavaha ramontu źnizilisia ŭdvaja.

Pa vynikach hoda paśla kapitalnaha ramontu budzie zdadziena tolki 9 žyłych damoŭ, 27 tys. kv.m., choć pieršapačatkova płanavałasia adramantavać amal u dva razy bolš. Zbolšaha heta adbyłosia tamu što častka srodkaŭ, zapłanavanych na kapramont, była nakiravanaja na adnaŭleńnie dachaŭ žyłfondu. Zbolšaha — praz značnaje padaražeńnie budaŭničych materyjałaŭ, nieabchodnych dla praviadzieńnia kompleksnaha ramontu damoŭ. Bolš za toje, u budučyni kancepcyja kapramontu kardynalna pamianiajecca. Ramantavacca buduć tolki važnyja kanstrukcyjnyja elemienty doma, jakija ŭpłyvajuć na jaho ekspłuatacyjnyja charaktarystyki. Zamieny starych voknaŭ na škłopakiety ŭžo nie budzie. Pavodle padlikaŭ kamunalnikaŭ, u ahulnym kaštarysie na kapramont vokny «ciahnuć» 25–30%.

Patryjatyčnaja patetyka

Havoračy pra tyja pracy, jakija kamunalniki praviali napiaredadni chareahrafičnaha festu «Sožski karahod», śviatkavańnia Dnia horada, dy i naohuł u suviazi z tym, što ŭ hetym hodzie Homiel nazvany kulturnaj stalicaj krain SND, Viktar Kułaha źviarnuŭsia da temy patryjatyzmu sponsaraŭ.

«Liču, što vialiki dziakuj treba skazać tavaryšu Lachavu, hienieralnamu dyrektaru „Biełarusnafty“ za toje, što jon sapraŭdny patryjot Homiela i, majučy nieabchodnyja finansavyja resursy, akazvaje dapamohu dla vyrašeńnia takich voś nadzionnych haradskich prablem», — padzialiŭsia svajoj radaściu Viktar Kułaha.

10 miljardaŭ rubloŭ naftaviki «padaryli» suajčyńnikam. Hety «patryjatyzm» byŭ pakazany na fonie čarady śviataŭ, jakija sioleta pranieślisia pa kryzisnym Homieli. Inšaja sprava, što vykavzać taki patryjatyzm, rasparadžajučysia ŭsienarodnym nietrami, — nie ź viłami na varožy tank iści. Plus ukazańnie prezidenta: zvyšprybytkovym pradpryjemstvam — dapamahać miascovym uładam u vyrašeńni prablem.

Kali kazać pra efiektyŭnaść pracy na miescach, to hałoŭny kiraŭničy mietad i navat (!) inicyjatyva (na prykładzie Homielskaha haradskoha ŽKH) — skaračać i zrezać. Pra toje, kab adkryć svaju zvyšprybytkovuju vytvorčaść i narešcie zaniacca reformaj ŽKH — ni słova! Nu, a pakul Homiel sychodzić u ciemru, a jaho dvorniki raźbiahajucca.

• 0
• 0
• 0
• 0
• 0
• 0
• 0
• 0