Spravy ab mazyrskaj razborcy chutčej za ŭsio nie budzie

Kryminalnaja sprava pa zabojstvie dvuch čałaviek padlahaje spynieńniu, a pa fakcie najezdu sa śmiarotnym vynikam budzie pieradadzienaja ŭ milicyju.

Nahadajem, havorka idzie pra incydent, što miesiac tamu prahrymieŭ na ŭsiu krainu. ŚMI ablacieła infarmacyja pra paboišča ŭ Mazyry, padčas jakoha zahinuli try čałavieki. Pry hetym paviedamleńni strakacieli supiarečnaściami i razychodzilisia ŭ vykładańni akaličnaściaŭ. Siońnia karcina złačynstva viadomaja z bolšaj peŭnaściu.

Pieradhistoryjaj dramatyčnych padziej staŭ kanflikt, jaki adbyŭsia ŭ vioscy Kamienka Mazyrskaha rajona. Tam adpačyvała kampanija ŭ składzie niekalkich mužčyn i dźviuch dziaŭčat. Adzin z chłopcaŭ, raniej sudzimy za chulihanstva, pačaŭ prystavać da dziaŭčat, uspychnuła svarka.

Dziaŭčaty pakinuli viosku i pryjechali na svajoj mašynie ŭ rajcentr — da hulniavoha kłubu «Good luck 777». Tam sustreli znajomaha, jakomu raskazali pra toje, što adbyłosia. Toj, pažadaŭšy ŭstupicca, patelefanavaŭ ich kryŭdzicielu. Razmova na pavyšanych tonach nie razradziła situacyju. Baki damovilisia sustrecca ŭžyvuju i praciahnuć razborki.

Na sustreču kryŭdziciel pryjechaŭ ź siabrami, adzin ź jakich, były palaŭničy, uziaŭ z saboj strelbu. I, kali la ŭvachodu ŭ kłub pačałasia bojka, adkryŭ ahoń, śmiarotna paraniŭšy dvaich čałaviek.

Abiasškodzić šumnaha strałka zdoleŭ adzin sa śviedak. Jon vyrvaŭ zbroju z ruk «palaŭničaha», kali toj pierazaradžaŭ stvały. A zatym udaryŭ jaho hetaj ža strelbaj, jak dubinaj. Praz heta adlacieŭ prykład, a sam strałok pavaliŭsia na asfalt.

U hety čas ciažka paranieny im tavaryš dabraŭsia da mašyny, u jakoj siadzieŭ jašče adzin jaho pryjaciel, i paprasiŭ jechać u balnicu. Ale kiroŭca byŭ tak napałochany, što nie zdoleŭ adjechać ad ustanovy. Jon zakranuŭ niekalki pryparkavanych mašyn, a kali davaŭ zadni chod, učyniŭ najezd na strałka, jaki lažaŭ na ziamli. Ad atrymanych traŭmaŭ toj pamior. Nie dačakaŭšysia mieddapamohi, u sałonie inšamarki pamior paranieny. Druhoha paśpieli dastavić u balnicu, ale vyratavać jaho miedyki nie zdoleli.

Pry ahladzie miesca zdareńnia akramia złamanaj «dubaltoŭki» byŭ znojdzieny revalvier sistemy «Nahan». Na dumku śledstva, chutčej za ŭsio jon naležaŭ kamuści z tych, chto «raźbiraŭsia». Kiroŭca, zatrymany na miescy zdareńnia, spačatku paŭtaraŭ, što za rulom znachodziŭsia inšy čałaviek. Zatym staŭ davać pryznalnyja pakazańni, jakija paćvierdzilisia i pry praviercy z dapamohaj palihrafa — prybora, bolš viadomaha jak detektar chłuśni. Ciapier hety fihurant spravy znachodzicca pad padpiskaj ab niavyjeździe.

Kryminalnaja sprava, raspačataja pa č. 2 art. 139 KK RB «zabojstva dźviuch i bolš asob», vidavočna, budzie spynienaja ŭ suviazi sa śmierciu asoby, jakaja ŭčyniła złačynstva. Darečy, vyśvietliłasia, što niekalki hadoŭ tamu milicyja ŭžo kanfiskoŭvała ŭ hetaha čałavieka niezarehistravanyja strelby.

Epizod z najezdam kvalifikujecca jak DTZ sa śmiarotnym zychodam. U hetaj častcy sprava budzie vydzielenaja ŭ asobnuju vytvorčaść i pieradadzienaja dla dalejšaha rasśledavańnia ŭ orhany ŭnutranych spravaŭ. Zrešty, nie vyklučana, što da suda i zusim nie dojdzie. Praviedzieny ekśpierymient pakazaŭ, što tych akaličnaściach abvinavačany, kirujučy aŭtamabilem, sapraŭdy nie moh bačyć mužčynu, jaki lažaŭ na asfalcie, roŭna jak i mierkavać pra jaho znachodžańnie tam — u niebiaśpiečnaj blizkaści ad kołaŭ. Varta ŭličvać i emacyjny stan kiroŭcy ŭ momant, kali na zadnim siadzieńni mašyny lažaŭ tavaryš, što ściakaŭ kryvioj…

Jość pytańni i da jašče adnaho ŭdzielnika padziej. Jon taksama pryjechaŭ z kampanijaj, vyklikaŭ apanienta z kłuba i pačaŭ nanosić jamu ŭdary. Ale jurydyčna hetyja dziejańni mohuć «paciahnuć» maksimum na chulihanstva.

Kamientujučy hetuju nieardynarnuju spravu, u śledčym adździele prakuratury Homielskaj vobłaści asabliva padkreślivajuć, što nijakich prykmiet «bandyckaj razborki» ŭ styli 90-ch niama. Usio adbyłosia spantanna na hlebie kanfliktu.

• 0
• 0
• 0
• 0
• 0
• 0
• 0
• 0