U Miry adnoviać italjanski sad

Adnaŭleńnie rehularnaha parku (italjanskaha sadu), raźmieščanaha na terytoryi zamkavaha kompleksu Mir, pačniecca paśla dadatkovych navukovych daśledavańniaŭ.

Pieršaja čarha rekanstrukcyi pomnika architektury XVI–XX stahodździaŭ, uniesienaha ŭ Śpis suśvietnaj spadčyny JUNIESKA, zaviaršyłasia ŭ 2010 hodzie. Pieršaja čarha rabot była najbolš abjomnaj i składanaj, košt jaje realizacyi skłaŭ kala 80% kaštarysnaha koštu rekanstrukcyi ŭsiaho kompleksu. Mirski zamak zdadzieny ŭ ekspłuatacyju, jaho apartamientavaja častka i spadarožnyja pamiaškańnia (hatel, kanfierenc-zała, pakoj dla pieramovaŭ, restaran) paśpiachova pracuje ŭžo kala hoda.

Napieradzie jašče try čarhi rabot. Druhaja praduhledžvaje adnaŭleńnie rehularnaha parka, raźmieščanaha na poŭnač ad zamka. Na hetym učastku zachavalisia frahmienty rehularnych zialonych nasadžeńniaŭ, adnak chutčej za ŭsio bolš poźnich. Viadoma, što italjanski sad moh być zakładzieny na miažy XVI–XVII stahodździaŭ. «Na płanach 1830 park taksama adznačany — praŭda, jaho płaniroŭka nie całkam adpaviadaje bolš rańniamu apisańniu. Možna vykazać zdahadku, što z pryčyny stareńnia drevaŭ sad rekanstrujavaŭsia», — rastłumačyŭ navukovy kiraŭnik rabot u zamkavym kompleksie Dźmitryj Bubnoŭski. Pavodle jaho słovaŭ, adnaŭleńnie italjanskaha parku — nievialikaja praca z punktu hledžańnia hrošaj i pracy, adnak vynik budzie efiektnym.

U pačatku 2011 hoda śpiecyjalisty prapanavali Ministerstvu kultury svoj varyjant adnaŭleńnia parku. Pa vynikach jaho razhladu było pryniataje rašeńnie ab dadatkovych daśledavańniach z pryciahnieńniem historykaŭ i archieołahaŭ. «Jak praviła, zandaž terytoryi choć niejak vyjaŭlaje ślady raniejšaj płaniroŭki», — adznačyŭ navukovy kiraŭnik.

Adnak pakul archieałahičnyja pracy nie praviedzienyja, a ŭličvajučy, što ciapier zima, pačnucca jany nie raniej za viasnu.

Treciaj čarhoj (samaj vialikaj pa zajmanaj płoščy i pry hetym samaj tannaj dla realizacyi) pavinna stać adnaŭleńnie piejzažnaha parku anhielskaha typu, zakładzienaha ŭ pačatku XX stahodździa. «Heta vielmi składanaja kampazicyja, na jakuju daśledčyki asabliva nie źviartali ŭvahi, i darma. Jana źmiaščaje frahmienty, vyvučeńnie jakich, mahčyma, pryviadzie da adkryćciaŭ novych hraniaŭ sadova-parkavaha mastactva ŭ Biełarusi», — adznačyŭ navukovy kiraŭnik.

Finalnym akordam rekanstrukcyi, jak miarkujecca, stanie adnaŭleńnie pałaca Śviatapołk-Mirskich, pabudavanaha ŭ kancy XIX stahodździa.

Pa słovach navukovaha kiraŭnika rabot, nie vyklučana taksama, što ŭ Mirskim zamku źjavicca hiersa — draŭlanyja akavanyja kraty, jakija ŭ byłyja časy mahli lohka spynić raptoŭny napad vorahaŭ. Hiersa (dakładniej, zładžany miechanizm hiersy, padjomnaha mosta i jamy-pastki ź viečkam) isnavała ŭ zamku raniej i, mahčyma, zojmie svajo miesca ŭ chodzie rekanstrukcyi.

Zamkavy kompleks u h.p. Mir zajmaje 26 ha. Heta ŭnikalny pomnik architektury, u kanstrukcyi i dekaratyŭnym ubrańni jakoha prasočvajucca elemienty hotyki, reniesansu i baroka. Navukova-daśledčyja i prajektnyja pracy z metaj restaŭracyi Mirskaha zamka byli raspačatyja ŭ 1968 hodzie. U 1970 hodzie była vykananaja časovaja kansiervacyja ruin zamka. Najbolš aktyŭnyja pracy na abjekcie pačałasia ŭ 2003 hodzie.

Ekspazicyi Mirskaha zamka dazvalajuć paznajomicca z pobytam minułych stahodździaŭ, ubačyć unikalnyja ŭzory pradmietaŭ mebli, kalekcyju zbroi, rekanstrukcyi rycarskich daśpiechaŭ i staražytnyja muzyčnyja instrumienty, tvory žyvapisu i rekanstrukcyi kaštoŭnych pradmietaŭ radziviłaŭskich manufaktur. U naviednikaŭ taksama jość mahčymaść paznajomicca z aryhinalnaj ścianoj Mirskaha zamka, na jakoj prasočvajucca napłastavańni architekturnych stylaŭ. Atmaśfieru dapaŭniajuć inavacyjnyja mietady ekspanavańnia: efiekty kamputarnaj videainstalacyi, słajd-filmy, videasiužety, aŭdyjohidy.

• 0
• 0
• 0
• 0
• 0
• 0
• 0
• 0