У Міры адновяць італьянскі сад

Аднаўленне рэгулярнага парку (італьянскага саду), размешчанага на тэрыторыі замкавага комплексу Мір, пачнецца пасля дадатковых навуковых даследаванняў.

Першая чарга рэканструкцыі помніка архітэктуры XVI–XX стагоддзяў, унесенага ў Спіс сусветнай спадчыны ЮНЕСКА, завяршылася ў 2010 годзе. Першая чарга работ была найбольш аб’ёмнай і складанай, кошт яе рэалізацыі склаў каля 80% каштарыснага кошту рэканструкцыі ўсяго комплексу. Мірскі замак здадзены ў эксплуатацыю, яго апартаментавая частка і спадарожныя памяшкання (гатэль, канферэнц-зала, пакой для перамоваў, рэстаран) паспяхова працуе ўжо каля года.

Наперадзе яшчэ тры чаргі работ. Другая прадугледжвае аднаўленне рэгулярнага парка, размешчанага на поўнач ад замка. На гэтым участку захаваліся фрагменты рэгулярных зялёных насаджэнняў, аднак хутчэй за ўсё больш позніх. Вядома, што італьянскі сад мог быць закладзены на мяжы XVI–XVII стагоддзяў. «На планах 1830 парк таксама адзначаны — праўда, яго планіроўка не цалкам адпавядае больш ранняму апісанню. Можна выказаць здагадку, што з прычыны старэння дрэваў сад рэканструяваўся», — растлумачыў навуковы кіраўнік работ у замкавым комплексе Дзмітрый Бубноўскі. Паводле яго словаў, аднаўленне італьянскага парку — невялікая праца з пункту гледжання грошай і працы, аднак вынік будзе эфектным.

У пачатку 2011 года спецыялісты прапанавалі Міністэрству культуры свой варыянт аднаўлення парку. Па выніках яго разгляду было прынятае рашэнне аб дадатковых даследаваннях з прыцягненнем гісторыкаў і археолагаў. «Як правіла, зандаж тэрыторыі хоць неяк выяўляе сляды ранейшай планіроўкі», — адзначыў навуковы кіраўнік.

Аднак пакуль археалагічныя працы не праведзеныя, а ўлічваючы, што цяпер зіма, пачнуцца яны не раней за вясну.

Трэцяй чаргой (самай вялікай па займанай плошчы і пры гэтым самай таннай для рэалізацыі) павінна стаць аднаўленне пейзажнага парку ангельскага тыпу, закладзенага ў пачатку XX стагоддзя. «Гэта вельмі складаная кампазіцыя, на якую даследчыкі асабліва не звярталі ўвагі, і дарма. Яна змяшчае фрагменты, вывучэнне якіх, магчыма, прывядзе да адкрыццяў новых граняў садова-паркавага мастацтва ў Беларусі», — адзначыў навуковы кіраўнік.

Фінальным акордам рэканструкцыі, як мяркуецца, стане аднаўленне палаца Святаполк-Мірскіх, пабудаванага ў канцы XIX стагоддзя.

Па словах навуковага кіраўніка работ, не выключана таксама, што ў Мірскім замку з’явіцца герса — драўляныя акаваныя краты, якія ў былыя часы маглі лёгка спыніць раптоўны напад ворагаў. Герса (дакладней, зладжаны механізм герсы, пад’ёмнага моста і ямы-пасткі з вечкам) існавала ў замку раней і, магчыма, зойме сваё месца ў ходзе рэканструкцыі.

Замкавы комплекс у г.п. Мір займае 26 га. Гэта ўнікальны помнік архітэктуры, у канструкцыі і дэкаратыўным убранні якога прасочваюцца элементы готыкі, рэнесансу і барока. Навукова-даследчыя і праектныя працы з мэтай рэстаўрацыі Мірскага замка былі распачатыя ў 1968 годзе. У 1970 годзе была выкананая часовая кансервацыя руін замка. Найбольш актыўныя працы на аб’екце пачалася ў 2003 годзе.

Экспазіцыі Мірскага замка дазваляюць пазнаёміцца з побытам мінулых стагоддзяў, убачыць унікальныя ўзоры прадметаў мэблі, калекцыю зброі, рэканструкцыі рыцарскіх даспехаў і старажытныя музычныя інструменты, творы жывапісу і рэканструкцыі каштоўных прадметаў радзівілаўскіх мануфактур. У наведнікаў таксама ёсць магчымасць пазнаёміцца з арыгінальнай сцяной Мірскага замка, на якой прасочваюцца напластаванні архітэктурных стыляў. Атмасферу дапаўняюць інавацыйныя метады экспанавання: эфекты кампутарнай відэаінсталяцыі, слайд-фільмы, відэасюжэты, аўдыёгіды.

• 0
• 0
• 0
• 0
• 0
• 0
• 0
• 0