Hrandyjoznyja płany BDU: pavietrany spartkompleks i aerakaśmičny fakultet

14-paviarchovy šklany budynak fakulteta mižnarodnych adnosinaŭ, nadzimany spartkompleks i kulturny centr u samym centry Minska, a taksama rekanstrukcyja hałoŭnaha budynka na płoščy Niezaležnaści razam z zasnavańniem aerakaśmičnaha fakulteta

Biełaruski dziaržaŭny ŭniviersitet užo praź niekalki tydniaŭ atrymaje va ŭłasnaść adzin z samych prasunutych univiersiteckich korpusaŭ u Biełarusi — fakultet mižnarodnych adnosinaŭ spravić ułaziny ŭ budynku na Pryvakzalnaj płoščy ŭ lutym.

Pa śviedčańniach žurnalistaŭ, što pabyvali ŭ korpusie, šklany 14-paviarchovy budynak maje 5 chutkasnych liftaŭ, jaho padłohu pakryvaje marmurovaja plitka, a «prastornyja choły» zabityja «miakkimi kanapami dla adpačynku», ź jakich adkryvajecca «cudoŭny vid na Minsk».

A batarei nie hrejuć

Ale litaralna za piać krokaŭ ad novaha chaj-tek budynka na Pryvakzalnaj znachodzicca stary hałoŭny korpus BDU. Jaho nie ramantavali ŭžo 50 hadoŭ, i heta mohuć adčuć usie studenty. Kiraŭnictva ŭniviersiteta pryznaje, što ŭ hałoŭnym budynku navat batarei nie hrejuć, a pravodka haryć ad pierahruzak na sietku.

«My ŭžo daŭno pierasiahnuli ŭsie techničnyja normy», — kaža prarektar pa ekanomicy i inviestycyjach univiersiteta Uładzimir Panaradaŭ.

Ale na rekanstrukcyju, u adroźnieńnie ad vypadku sa šklanym chmaračosam nasuprać vakzała, hrošaj niama. U BDU spadziajucca, što niešta padkinie dziaržava. Prynamsi, pa płanach užo z 2012 hodu rekanstrukcyja hałoŭnaha korpusa musić pačacca.

Inšaja prablema — adsutnaść miesca ŭ studenckich internatach. Tamu bolej za 6 tysiačaŭ studentaŭ BDU vymušanyja zdymać kvatery. Niahledziačy na toje, što pieršy ŭźviedzieny ŭ Studenckaj vioscy budynak dastaŭsia jakraz BDU, univiersitet za hod straciŭ adrazu try internaty: adzin źnieśli, druhi pieradali muzieju, a treci zakryli na rekanstrukcyju pierad čempijanatam śvietu pa chakiei ŭ 2014 hodzie. Dy i kitajskich z turkmienskimi studentami treba niedzie sialić.

Tamu ŭ BDU nieciarpliva čakajuć skančeńnia budaŭnictva jašče adnaho internata ŭ Studvioscy.

Nadzimany spartkompleks i aerakaśmičny fakultet

Ale ŭniviersitet vydatkoŭvaje hrošy na inšyja prajekty. Naprykład, na budoŭlu jašče dvuch spartkomleksaŭ.

Pa słovach prarektara Uładzimira Panaradava, užo praź niekalki hadoŭ u minskim rajonie Ščomyślica źjavicca raspracavany ŭ BDU pavietraaporny (nadzimany) spartkompleks z hulniavymi załami i stadyjonam na adkrytym pavietry. Dadatkovy kulturna-spartyŭny centr dla studentaŭ BDU sa spartzałaj, biblijatekaj i stałoŭkaj moža źjavicca ŭ samym centry Minska.

Jašče adzin aryhinalny prajekt BDU — adkryćcio aerakaśmičnaha fakulteta. Praź niekalki miesiacaŭ Biełaruś ažyćciavić druhuju sprobu stać kaśmičnaj dziaržavaj, zapuściŭšy na rasijskaj rakiecie ajčynny spadarožnik. Ale, jak vyśviatlajecca, pracavać z dadzienymi spadarožnikami asabliva niama kamu.

«Patrebnyja śpiecyjalisty, jakija apracoŭvali b spadarožnikavuju infarmacyju. Pryčym heta pytańnie nie zaŭtrašniaha dnia, — kaža prarektar. Pa jaho słovach, krainie mocna nie chapaje aerakaśmičnaha fakulteta, jaki b moh adkrycca jakraz u BDU. — Užo siońnia možna prymać i apracoŭvać dadzienyja sa spadarožnikaŭ inšych krain. Tamu kali my zapuścim svoj spadarožnik, to zmožam nie tolki atrymlivać infarmacyju, ale i pradavać jaje», — miarkuje hałoŭny śpiecyjalist pa ekanomicy BDU.

• 0
• 0
• 0
• 0
• 0
• 0
• 0
• 0