Termomietry pakazvajuć +10.
Z uzmacnieńniem lutaŭskich marazoŭ u niekatorych pałatach Baranavickaj haradskoj balnicy termomietry pakazvajuć +10 hradusaŭ.
«U pałacie majho muža tempieratura nie pieravyšaje 12--13 hradusaŭ, a ŭ paniadziełak z ranicy ja naohuł ŭbačyła na hraduśniku 9, -- aburałasia piensijanierka Halina Ivanaŭna, čyj muž užo niekalki dzion znachodzicca ŭ pałacie № 311 nieŭrałahičnaha adździaleńnia Baranavickaj haradskoj balnicy.
-- Moj muž paralizavany, ciapier jaho lečać ad pnieŭmanii, a potym jamu majuć rabić apieracyju. I voś u takich umovach nam davodzicca lačycca!
Da momantu, kali karespandent naviedaŭ balničnuju pałatu (kala paŭdnia paniadziełka), tam paciapleła ... da +10 hradusaŭ (pa sanitarnych praviłach, tempieratura ŭ balničnych pałatach pavinna być ad +17 da +22 hradusaŭ).
Vokny pałaty byli zaklejenyja i da taho ž hruntoŭna zasłanyja koŭdrami, ale navat niahledziačy na heta z boku pamiaškańnia na šybach utvaryŭsia lod.
Akramia paralizavanaha muža Haliny Ivanaŭny, u pałacie znachodzilisia jašče dvoje chvorych: pacyjent paśla mikrainsultu i mužčyna stałaha vieku ź ciskam.
«Pakul ja nie zrazumieŭ, kudy trapiŭ, ja nakryvaŭ hałavu ručnikom, kab nie pradźmuła, -- raspavioŭ pacyjent Siarhiej Hoŭša. -- Potym
paprasiŭ žonku prynieści z chaty šapku. Ciapier lažu ŭ dvuch koftach, dvuch štanach i dźviuch parach škarpetak pad tryma koŭdrami...»
Na toje, što ŭ pałatach niemahčyma znachodzicca z-za choładu, karespandentu paskardzilisia i pacyjenty niefrałahičnaha adździaleńnia.
Pa słovach chvorych, jany nie raz źviartali ŭvahu miedykaŭ, što ŭ pałatach choładna. «Naš lekar pahadziłasia, što ŭ pałacie sapraŭdy choładna, ale skazała, što, maŭlaŭ, ničym nie moža nam dapamahčy», -- raspaviała Halina Ivanaŭna.
Jak patłumačyła zahadčyca nieŭrałahičnym adździaleńniem Volha Sołomiencava, i kiraŭnictva adździaleńnia, i administracyja lakarni ŭ kursie prablemy.
Pa słovach zahadčycy, ciapło pa balnicy raźmiarkoŭvajecca centralizavana, batarei nahrajucca dastatkova, ale ŭ ich adździaleńni ŭsio adno choładna.
«Kali b prablema była ŭ niedastatkova ciopłych batarejach, ja mahła b paprasić techničnych rabotnikaŭ, kab jany dadali ciapła, -- patłumačyła Volha Sołomiencava. -- A pakolki hetaja častka budynka prosta nie nahrajecca, to što ja mahu zrabić?"
Hałoŭny doktar Baranavickaj haradskoj balnicaj Vasil Ramanoŭski paćvierdziŭ, što ŭ roznyja korpusy balnicy ciapło padajecca raŭnamierna, ale nie va ŭsich adździaleńniach jano adnolkava zachoŭvajecca.
Pryčyna, pa jaho słovach, -- u starych draŭlanych voknach balnicy, z-za jakich hublajecca da 40% ciapła.Tamu, jak adznačyŭ Vasil Ramanoŭski,
prablema chałodnych pałat siońnia tyčycca tolki tych adździaleńniaŭ, dzie staryja draŭlanyja vokny nie byli zamienienyja na novyja škłopakiety.
U chirurhičnym i traŭmatałahičnym adździaleńniach, dzie letaś ustalavali novyja vokny, situacyja zusim inšaja. U toj ža dzień, kali ŭ pałatach nieŭrałahičnaha i niefrałahičnaha adździaleńnia było +10, da prykładu,
na hraduśniku dziciačaj pałaty ŭ chirurhičnym adździaleńni było 24 hradusy.
«Pa mahčymaści my sprabujem dapamahčy tym, chto mierźnie: padajecca maksimum ciapła, pacyjentam vydajucca pa dźvie koŭdry, -- prakamientavaŭ Vasil Ramanoŭski. -- Ale, na žal, nie usio ad nas zaležyć...»
Na žal, nie ŭdałosia daviedacca, ci płanujecca ŭ bližejšy čas dalejšaja zamiena voknaŭ u adździaleńniach balnicy. Hałoŭny ŭrač UAZ «Baranavickaja centralnaja paliklinika» Alaksandr Ściacko ad znosin z presaj admoviŭsia, parekamiendavaŭšy z usimi pytańniami źviartacca ŭ ideałahičny adździeł harvykankama. Ale i tam nie ŭdałosia atrymać adkaz na heta prostaje pytańnie.
Načalnik ideałahičnaha adździeła harvykankama Taćciana Žytko prosta nie zmahła pavieryć u toje, što siońnia baranavickija pacyjenty realna mierznuć ŭ balnicy.
Ciapier čytajuć
65‑hadovaha hamielčuka asudzili za sprobu dyviersii na čyhuncy i zdradu dziaržavie. Što viadoma?4
Kamientary