U Minsku začyniać adzinuju śpiecustanovu dla sirot z asablivaściami ŭ psichafizičnym raźvićci

Minskija ŭłady źbirajucca zakryć adzinuju śpiecyjalizavanuju ŭstanovu ŭ Minsku i Minskaj vobłaści dla dziaciej-sirot z asablivaściami ŭ psichafizičnym raźvićci — dapamožnuju škołu-internat № 7. Pra heta BiełaPAN paviedamiła piedahoh, staršynia prafkama hetaj ustanovy Ina Čarapko.

DUA «Dapamožnaja škoła-internat № 7 h. Minska» była adkryta ŭ 1986 hodzie dla najbolš poŭnaha sacyjalnaha i psichafizičnaha raźvićcia dziaciej z asablivaściami ŭ psichafizičnym raźvićci i ź`iaŭlajecca na siońnia adzinaj ustanovaj dla takoha kantynhientu dziaciej u Minsku i Minskaj vobłaści. Kalektyŭ škoły (bolš za 100 čałaviek) na 70% składajecca z piedahohaŭ-defiektołahaŭ pieršaj i vyšejšaj katehoryi, jakija majuć staž pracy bolš za 20 hadoŭ.

Pavodle słoŭ Čarapko, Minharvykankam razhladaje pytańnie ab likvidacyi škoły-internata na vulicy Siamaški, 6, u suviazi z «uźniknieńniem nieabchodnaści pieradačy zajmanaha internatam budynka inšamu viedamstvu». Jak rastłumačyła Čarapko,

budynak płanujecca pieradać pad strukturu Kamiteta pa pracy i sacyjalnaj abarony nasielnictva.

Vychavancaŭ źbirajucca raźmiarkoŭvać pa ŭstanovach, u jakich vychoŭvajucca dzieci z narmalnym intelektam. «Užo prainfarmavanyja kiraŭniki škoł-internataŭ № 10, № 11, dziciačaha doma № 3 pra daŭkamplektavańnie ich ustanoŭ vychavancami našaha internata», — skazała Čarapko.

Pavodle mierkavańnia piedahoha, «našym dzieciam budzie vielmi ciažka adaptoŭvacca da ŭmoŭ navučańnia ŭ inšych navučalnych ustanovach. Znachodziačysia pobač ź dziećmi z narmalnym intelektam, jany adčuvajuć svaju niepaŭnacennaść i bolš baluča ŭsprymajuć svaju niepaŭnacennaść i, jak praviła, nie prymajucca dziciačymi kalektyvami». «Likvidacyja internata niepaźbiežna pryviadzie da razbureńnia ŭstojanych „siamiejnych“ adnosin u dziciačym kalektyvie, moža spryjać prajaŭleńniu niehatyŭnych reakcyj dziaciej u formie ŭciokaŭ, badziažnictva, pravaparušeńniaŭ i inšych», — ličyć pradstaŭnik piedkalektyvu.

Pavodle infarmacyi Čarapko, ciapier u škole-internacie vučacca i vychoŭvajucca 142 dziciaci va ŭzroście ad 7 da 18 hadoŭ. Praktyčna ŭsie dzieci, akramia razumovaj adstałaści, majuć i inšyja samatyčnyja zachvorvańni: enurez, virusny hiepatyt, psichapatapodobnyja pavodziny, chramasomnaja chvaroba Daŭna i inšyja. Hrupu invalidnaści majuć 57 dziaciej.

«Kantynhient dziaciej pa svaich psichičnych i miedycynskich pakazčykach vielmi składany, jaki patrabuje da siabie pastajannaj uvahi, kłopatu, nazirańnia nie tolki z boku piedahahičnaha kalektyvu, ale i miedycynskaha piersanału padčas navučalnaha pracesu i ŭ pazaŭročny čas», — adznačyła piedahoh. Pavodle jaje słoŭ, kalektyŭ nakiroŭvaŭ listy suprać likvidacyi ŭstanovy ŭ Minharvykankam, Minadukacyi, Administracyju prezidenta, Kamitet dziaržkantrolu, prakuraturu. «Ale my atrymlivali hałoŭnym čynam farmalnyja adkazy, u jakich havaryłasia pra niedaŭkamplektavańnie inšych škoł-internataŭ», — adznačyła Čarapko.

• 0
• 0
• 0
• 0
• 0
• 0
• 0
• 0