Na sustrečy ź Miadźviedzievym havaryli pra Bialackaha

Biełaruskaja prablematyka zakranałasia na pasiadžeńni Savieta pa pravach čałavieka pry prezidencie RF 28 krasavika.

Jak vynikaje sa stenahramy pasiadžeńnia, raźmieščanaj na sajcie Kramla, kiraŭnik Centra raźvićcia demakratyi i pravoŭ čałavieka Juryj Džybładze zajaviŭ, što Rasija pavinna reahavać na fakty parušeńnia pravoŭ čałavieka ŭ krainach-partniorach. Pavodle jaho słoŭ, rasijskija dypłamaty časam robiać zajavy ab situacyi z pravami čałavieka ŭ inšych krainach zychodziačy z pryncypu "voka za voka, zub za zub" — źviartajuć uvahu na parušeńni tolki ŭ tych krainach, jakija krytykujuć Rasiju, u toj čas jak parušeńni ŭ krainach-partniorach zastajucca niezaŭvažanymi, a krytyka ŭ ich adras z boku mižnarodnych arhanizacyj rasijskimi dypłamatami błakirujecca.

U jakaści prykładu Džybładze nazvaŭ Turkmienistan i Biełaruś.

Jon, u pryvatnaści, ukazaŭ na situacyju ź biełaruskim pravaabaroncam Alesiem Bialackim, jaki asudžany na čatyry z pałovaj hady "za nibyta ŭchileńnie ad padatkaŭ, a na samoj spravie — za šmathadovuju pryncypovuju pazicyju i pracu ŭ halinie pravoŭ čałavieka". Dla vyrašeńnia hetaha pytańnia Rasija amal ničoha nie robić, padkreśliŭ Džybładze i pieradaŭ Dźmitryju Miadźviedzievu zvarot členaŭ Savieta pa pravach čałavieka ŭ abaronu Bialackaha.

"Naša kraina, jakaja imkniecca mieć viadučaje stanovišča ŭ śviecie, nie moža i nie pavinna ihnaravać prablemu pravoŭ čałavieka nie tolki ŭ siabie doma, ale i ŭ susiednich krainach. Z taho, kamu šmat dadziena i chto pretenduje na mnohaje, i popyt bolšy, i adkaznaść pavinna być bolš surjoznaj", — pierakanany pravaabaronca.

U adkaz na heta Miadźviedzieŭ zajaviŭ, što nie idealizuje pracu Ministerstva zamiežnych spraŭ. "MZS u nas takoje, jakoje jość. U jaho jość i mocnyja baki čyčerynska-mołataŭskaj škoły, i nie vielmi mocnyja. I ja sam, jak kiraŭnik dziaržavy, nieadnarazova da hetaj temy źviartaŭsia, ale ja ŭsio-taki nie mahu zhadzicca voś z čym. Kaniešnie, MZS pavinna zajmać adekvatnuju pazicyju, ale ličyć, to MZS kusaje tolki tych, chto kusaje nas, heta nie zusim spraviadliva", — ličyć prezident RF.

Miadźviedzieŭ nahadaŭ, što i jamu asabista, i MZS davodziłasia rabić davoli žorstkija zajavy, jakija tyčacca situacyi z pravami čałavieka ŭ Biełarusi. Prezident RF, u pryvatnaści, zajaviŭ ab nieprymalnaści pieraśledu palityčnych praciŭnikaŭ.

Treba adznačyć, što Juryj Džybładze źjaŭlajecca ŭ Biełarusi piersonaj non hrata. 27 žniŭnia 2011 hoda, kali pravaabaronca jechaŭ na ciahniku ŭ Vilnius, na miažy ź Litvoj biełaruskija pamiežniki paviedamili Džybładze, što jamu "zabaronieny ŭjezd u Respubliku Biełaruś". "Dla mianie vidavočna, što zabarona ŭjezdu naŭprost źviazana z majoj zakonnaj prafiesijnaj pravaabarončaj dziejnaściu. Ja razumieju, što dziaržavy pakidajuć za saboj prava nie puskać ludziej na svaju terytoryju pa mierkavańniach biaśpieki. Ale ŭ Biełarusi hety miechanizm absalutna nieprazrysty — niezrazumieła, chto prymaje rašeńnie i jak jaho asprečvać, što supiarečyć normam mižnarodnaha prava" — tak prakamientavaŭ tady situacyju rasijski pravaabaronca

• 0
• 0
• 0
• 0
• 0
• 0
• 0
• 0