Praz hod

Akademik Alaksandar Vajtovič źniaŭ svaju kandydaturu z prezydenckaj honki bolš čym za dva miesiacy da vybaraŭ na znak pratestu. «Ułady nie zabiaśpiečyli patencyjnym kandydatam roŭnych umovaŭ», — patłumačyŭ tady kolišni śpikier Savietu Respubliki. Ciapier jon škaduje, što jahonym šlacham nie pajšli inšyja demakratyčnyja kandydaty, bo «heta byŭ by mocny krok». Palityk aburajecca, što ŭłady tak i nie zreahavali na pryznańnie Łukašenki, što vybary‑2006 byli sfalsifikavanyja. «Pra jakija plusy možna kazać, kali ŭłady nie źviartajuć uvahi na zakony!?», — aburajecca Vajtovič. Na jaho mierkavańnie vypravić sytuacyju mohuć tolki źmieny ŭ vybarčy kodeks. Ale ŭłady na heta nia pojduć. Sa słoŭ Alaksandra Vajtoviča atrymlivajecca začaravanaje koła.

Eks‑parlamentar i były palitźniavoleny Siarhiej Skrabiec uvajšoŭ u historyju, jak pieršy biełaruski palityk, jaki vyrašyŭ balatavacca, kali znachodziŭsia ŭ turmie. «Miarkavaŭ, što paśla rehistracyi inicyjatyŭnaj hrupy mianie adpuściać, kab ja moh pravodzić svaju kampaniju», — zhadvaje jon. Jahonyja paplečniki sabrali patrebnuju kolkaść podpisaŭ, ale nie padavali ŭ CVK: «Byŭ upeŭnieny, što z rehistracyjaj atrymajecca toje samaje, što i z majoj prośbaj źmianić mieru ŭtrymańnia», — kaža S.Skrabiec. Palityk kaža, što ni minułyja, ni budučyja vybary – i parlamenckija, i prezydenckija — ničoha nie majuć ahulnaha ŭłasna z słovam «vybary». «Heta imitacyja, hulnia ŭłady z narodam. Užo viadomaje proźvišča nastupnaha prezydenta, jość śpis tych, chto budzie siadzieć u parlamencie nastupnaha sklikańnia. Vuń Abramava z nahody pryjezdu Capf zajaviła, što vykanańnie 12 umoŭ Eŭraźviazu asłabić uładu. Jana ž užo bačyć siabie ŭ parlamencie!». Na dumku byłoha lidera parlamenckaj hrupy «Respublika», jakaja sprabavała koliś unieści źmieny ŭ vybarčy kodeks, Łukašenka budzie kiravać krainaj jašče 20‑30 hod. «Kali, kaniešnie, nia budzie siłavoha źmianieńnia sytuacyi. I ja dumaju, što źmieny nas čakajuć užo sioleta», — padsumoŭvaje palityk.

Inicyjatyŭnuju hrupu mieŭ i Zianon Paźniak, ale jahonyja paplečniki taksama nie padavali dakumenty ŭ CVK. «My adrazu skazali, što nie ŭdzielničajem ŭ vybarnaj kampanii, a idziem na zmaharny varyjant, — tłumačyć namieśnik Paźniaka pa KCHP‑BNF Jury Bieleńki. – Tamu my i prapanavali «Narodnaje hałasavańnie». Ju.Bieleńki krytykuje, jak ułady, tak i abjadnanyja demakratyčnyja siły, jakija zamacavali Łukašenku ŭ jaho nielehietymnaści. «Ja spravabaŭ adšukać stanoŭčyja baki toj vybarnaj kampanii, ale nie znajšoŭ ich», — pryznajecca palityk. Płošču Kalinoŭskaha jon nie ličyć dasiahnieńniem ADS: «Heta vynik Pamarančavaj revalucyi, Milinkievič z Kazulinym dačynieńnia da Płoščy nie majuć».

Siarhieja Hajdukieviča pry kancy 2006 hodu čakała dobraje pryznačeńnie – jon staŭ specyjalnym pradstaŭnikom ministra zamiežnych spravaŭ Biełarusi pa suviaziach z eŭrastrukturami. Svoj druhoj udzieł u prezydenckaj kampanii lider ŁDPB aceńvaje zvyšstanoŭča: «Heta było na karyść majmu imidžu i imidžu majoj partyi. Hajdukieviča ciapier viedaje 99,9% nasielnictva!», — ciešycca jon. Palityk pryznajecca, što byli pamyłki i praliki na vybarach‑2006 ź jaho boku: «Ale heta našyja ŭnutrypartyjnyja spravy, tym bolš, što dobraja praca nad pamyłkami vyjšła padčas vybaraŭ u miascovyja saviety», — kaža jon. Pytańnie ab spraviadlivaści prezydenckich vybaraŭ jon pakinuŭ biez kamentaroŭ.

Anatol Laŭkovič ličyć stanoŭčym momantam u vybarach‑2006 udzieł u ich adrazu dvuch demakratyčnych kandydataŭ. Idealnym varyjantam vykonvajučy abaviazki staršyni BSDP (Hramada) ličyć udzieł u vybarach piaci‑siami kandydataŭ. Ale nie ad klasičnaj apazycyi, a ad roznych słajoŭ hramadstva, jakija b vyjšli z vertykali. «Tolki tak my možam prarvać elektarat Łukašenki. Bo adziny kandydat ad klasičnaj apazycyi zdolny nabrać 20‑30%. Heta jahonaja płanka», — tłumačyć paplečnik Alaksandra Kazulina.

Alaksandar Milinkievič bačyć u padziejach Viasny‑2006 bolš stanoŭčych momantaŭ. Na dumku palityka, ludzi dakazali, «što jany jość Narod». Asabliva padkreśliŭ lider demakratyčnych siłaŭ rolu moładzi ŭ tych padziejach. Palityk zhodny, što nia ŭsio dobra atrymałasia ŭ jaho kamandy. «Šmat kaho mahło spaścihnuć rasčaravańnie paśla sakavika 2006‑ha, bo ludzi chacieli atrymać pieramohu ź pieršaha razu». Były kandydat u prezydenty razvažaje što treba zrabić, kab dasiahnuć pośpiechu ŭ budučyni: «Najpierš treba pašyrać koła demakratyčnych siłaŭ. Siońnia, jak nikoli, vychodzić na pieršy plan kansalidacyja. Kali palityki buduć svarycca i dziejničać paasobku, plonu nia budzie».

• 0
• 0
• 0
• 0
• 0
• 0
• 0
• 0