Šaściora sudździaŭ, jakija vynosili pryhavory apazicyjanieram, pazbavilisia svaich pasad
Čaćviartkova, Chadanovič, Paŭlučuk, Samaluk, Parchomienka, Chruščeŭskaja.
18 červienia Alaksandr Łukašenka padpisaŭ ukaz «Ab pryznačeńni i vyzvaleńni sudździaŭ sudoŭ Respubliki Biełaruś i ab źmianieńni składu prezidyumu Mahiloŭskaha abłasnoha suda». U dakumiencie fihuruje amal šeść dziasiatkaŭ sudździaŭ. Pryčym, 14 ź ich — vyzvaleny ad svaich pasadaŭ.
U adstaŭku vyjšli piać sudździaŭ, jašče piaciora zvolnienyja pa ŭłasnym žadańni. Hetyja ličby paćviardžajuć słovy Alaksandra Dziadka pra toje, što sudździ nie chočuć pracavać paśla piensii, bo ich prymušajuć kiravacca nie zakonam, a zahadami.
Cikavaja historyja atrymałasia z Alaksandram Chadanovičam i Taćcianaj Paŭlučuk. Chadanoviča vyzvalili z pasady sudździ Centralnaha rajona Minska ŭ suviazi z vychadam z «sacyjalnaha adpačynku» Paŭlučuk. Apošniaja ž vyzvalena z pasady pa ŭłasnym žadańni.
Taćciana Paŭlučuk była zamiešanaja ŭ karupcyjnaj spravie prakurora Minskaj vobłaści Michaiła Śniehira.
U listapadzie 2008-ha Alaksandr Łukašenka vystupiŭ na naradzie pa baraćbie z karupcyjaj. Śniahir, pa słovach kiraŭnika krainy, kupiŭ kamfartabielnuju kvateru pa zanižanaj canie. Ale niajasna, jak prakuror moh zarabić navat tuju sumu. A sudździa Paŭlučuk, pa słovach Łukašenki, vynosiła prysudy pa skarhach na karyść Śniehira. Ad staršyni Viarchoŭnaha suda Valancina Sukały tady patrabavali vyzvalić Paŭlučuk ad pasady. Ale ŭ vyniku tady hetaha nie adbyłosia.
Paŭlučuk «vyłučyłasia» i ŭ palityčnych pracesach.
Tak, napiaredadni 25 sakavika ŭ 2008 h. jana adpraviła na 5 sutak za kraty Alaksieja Maračkina.Sudździa paličyła dakazanym fakt łajanki mastaka na vulicy. Sudziła jana i moładzievych aktyvistaŭ.
Pakul Paŭlučuk znachodziłasia ŭ «sacyjalnym adpačynku», na jaje miesca pryznačyli Alaksandra Chadanoviča. Jon vynosiŭ prysudy za Płošču ŭ 2010-m, za što jaho ŭnieśli ŭ śpisy nieŭjaznych u Jeŭrapiejski Sajuz. Adnym z apošnich jaho palityčnych pracesaŭ sioleta staŭ sud nad Alaksandram Barazienkam i Mikitam Kavalenkam u studzieni. Chadanovič adpraviŭ ich na sutki.
Ad pasady namieśnika staršyni i sudździ suda Partyzanskaha rajona Minska «ŭ suviazi z zakančeńniem terminu paŭnamoctvaŭ» vyzvalena Natalla Čaćviartkova.
Jana asudziła eks-kandydata ŭ prezidenty Biełarusi Andreja Sańnikava na piać hadoŭ kałonii strohaha režymu.
Jana ž vyniesła prysudy i inšym zatrymanym padčas Płoščy-2010 — Alehu Hniedčyku, Uładzimiru Jaromienku, Ilji Vasileviču, Fiodaru Mirzajanavu. Uniesienaja ŭ śpisy nieŭjaznych u ES.
Sudździa Frunzienskaha rajona Minska Hanna Samaluk taksama trapiła ŭ śpisy nieŭjaznych za sudy pa spravie masavych zatrymańniaŭ 19 śniežnia 2010-ha. Vyzvalena ad pasady ŭ suviazi «z zakančeńniem terminu paŭnamoctvaŭ».
Sudździa Frunzienskaha rajona Minska Lidzija Chruščeŭskaja vyzvalena ad pasady ŭ suviazi z vychadam u adstaŭku. Jana znachodzicca ŭ śpisach nieŭjaznych u ES za sudy nad zatrymanymi na Płoščy 19 śniežnia 2010-ha.
Taćciana Parchomienka vyzvalena ad pasady pa ŭłasnym žadańni. Jana pracavała ŭ Leninskim sudzie Mahilova. Letaś padčas maŭklivych akcyj vyniesła papiaredžańnie zatrymanamu Alaksandru Simanoviču.
Raman Biaśśmiertny vyzvaleny ad pasady staršyni i sudździ suda Pieršamajskaha rajona Viciebska ŭ suviazi z vychadam u adstaŭku.
Mienavita ŭ hetym sudzie prachodziŭ praces nad aktyvistam KCHP-BNF Siarhiejem Kavalenkam.
Kali na praces admaŭlalisia puskać žurnalistaŭ, jany źviartalisia da Biaśśmiertnaha. Ale jon admaŭlaŭsia vyrašać pytańnie: spasyłaŭsia na toje, što za achovu paradku ŭ sudzie adkazvaje milicyja i što jon nie moža zahadać joj puścić žurnalistaŭ na praces.
Kamientary