AAN uviała pasadu śpiecdakładčyka pa pravach čałavieka ŭ Biełarusi

Saviet AAN pa pravach čałavieka prahałasavaŭ za ŭviadzieńnie mandata śpiecdakładčyka pa Biełarusi. Za takoje rašeńnie vystupili 22 krainy, suprać — 5, ustrymalisia — 20

U rezalucyi pa Biełarusi, pryniataj 5 lipienia na siesii Savieta AAN pa pravach čałavieka ŭ Ženievie, utrymlivajecca zaklik da biełaruskich uładaŭ «nieadkładna i biezumoŭna vyzvalić usich palitźniavolenych», pravieści «poŭnaje i transparentnaje rasśledavańnie ŭsich paviedamleńniaŭ ab prymianieńni katavańniaŭ i niehumannym abychodžańni z palitźniavolenymi», «nieadkładna spynić praktyku administracyjnych zatrymańniaŭ pradstaŭnikoŭ apazicyi, hramadzianskaj supolnaści, žurnalistaŭ i pravaabaroncaŭ i nie pieraškadžać ich svabodnamu pieramiaščeńniu, u tym liku vyjezdam za miežy krainy».

Dakumient zaklikaje aficyjny Minsk vykanać usie rekamiendacyi, što ŭtrymlivajucca ŭ dakładzie viarchoŭnaha kamisara AAN pa pravach čałavieka ab situacyi ŭ Biełarusi, jaki byŭ pradstaŭleny padčas siesii.

Rezalucyja taksama ŭtrymlivaje zaklik da biełaruskaha ŭrada ab paŭnacennym supracoŭnictvie sa śpiecdakładčykam, pradastaŭleńni jamu ŭsioj nieabchodnaj infarmacyi i mahčymaściaŭ naviedać krainu.

Nahadajem, 27–28 červienia na siesii Savieta AAN pa pravach čałavieka byŭ pradstaŭleny dakład viarchoŭnaha kamisara Navi Piłej ab situacyi ŭ Biełarusi, jaki zakranaŭ pieryjad sa śniežnia 2010 hoda pa sakavik hetaha.

Na siońniašnim pasiadžeńni savieta rezalucyju pa Biełarusi ad imia Jeŭrasajuza i dziaržaŭ, što jaje padtrymali, pradstaviŭ Kipr, jaki z 1 lipienia staršynstvuje ŭ ES. Pradstaŭnik hetaj krainy padkreśliŭ, što paharšeńnie situacyi i parušeńni pravoŭ čałavieka pradoŭžylisia ŭ Biełarusi i paśla zakranutaha ŭ dakładzie kamisara pieryjadu. Jon taksama zajaviŭ, što ES zakłapočany prymianieńniem śmiarotnaj kary ŭ Biełarusi i zaklikaje da ŭviadzieńnia maratoryja na hety vid pakarańnia.

U svaju čarhu pastajanny pradstaŭnik Biełarusi pry AAN u Ženievie Michaił Chvastoŭ nahadaŭ, što mandat śpiecdakładčyka AAN pa Biełarusi ŭžo isnavaŭ, ale Saviet pa pravach čałavieka skasavaŭ jaho ŭ 2007 hodzie.

«Siońnia taja ž hrupa dziaržaŭ sprabuje znoŭ naviazać mandat śpiecdakładčyka Biełarusi i mižnarodnaj supolnaści, — zajaviŭ Chvastoŭ. — Matyvy hetaj inicyjatyvy Jeŭrasajuza nijakim čynam nie źviazanyja z pravami čałavieka. ES takim čynam prasoŭvaje ŭ saviecie svoj palityčny paradak dnia i prymušaje viarchoŭnaha kamisara dziejničać u hetych metach. Hałoŭnaja zadača, jakuju stavić ES pierad hetym mandatam, — heta metanakiravanaja antyŭradavaja dziejnaść u Biełarusi pad prykryćciom AAN».

Chvastoŭ asabliva padkreśliŭ, što Biełaruś nie pryznaje mandat śpiecdakładčyka i nie budzie ź im uzajemadziejničać. «Ale my pryznajem nieabchodnaść mižnarodnych miechanizmaŭ nazirańnia za stanoviščam spraŭ u halinie pravoŭ čałavieka ŭ śviecie. My budziem supracoŭničać z tymi ź ich, jakija pracujuć ab`iektyŭna, nievybiralna i spaviadajuć univiersalnyja kaštoŭnaści i padychody, užo zakładzienyja va Univiersalnym pieryjadyčnym ahladzie», — skazaŭ jon.

• 0
• 0
• 0
• 0
• 0
• 0
• 0
• 0