Катаванні людзей і палітвязні будуць у фокусе ягонай увагі.
Савет ААН па правах чалавека прагаласаваў за ўвядзенне мандата спецдакладчыка па Беларусі. За такое рашэнне выступілі 22 краіны, супраць — 5, устрымаліся — 20.
У рэзалюцыі па Беларусі, прынятай 5 ліпеня на сесіі Савета ААН па правах чалавека ў Жэневе, утрымліваецца заклік да беларускіх уладаў «неадкладна і безумоўна вызваліць усіх палітзняволеных», правесці «поўнае і транспарэнтнае расследаванне ўсіх паведамленняў аб прымяненні катаванняў і негуманным абыходжанні з палітзняволенымі», «неадкладна спыніць практыку адміністрацыйных затрыманняў прадстаўнікоў апазіцыі, грамадзянскай супольнасці, журналістаў і праваабаронцаў і не перашкаджаць іх свабоднаму перамяшчэнню, у тым ліку выездам за межы краіны».
Дакумент заклікае афіцыйны Мінск выканаць усе рэкамендацыі, што ўтрымліваюцца ў дакладзе вярхоўнага камісара ААН па правах чалавека аб сітуацыі ў Беларусі, які быў прадстаўлены падчас сесіі.
Рэзалюцыя таксама ўтрымлівае заклік да беларускага ўрада аб паўнацэнным супрацоўніцтве са спецдакладчыкам, прадастаўленні яму ўсёй неабходнай інфармацыі і магчымасцяў наведаць краіну.
Нагадаем, 27–28 чэрвеня на сесіі Савета ААН па правах чалавека быў прадстаўлены даклад вярхоўнага камісара Наві Пілэй аб сітуацыі ў Беларусі, які закранаў перыяд са снежня 2010 года па сакавік гэтага.
На сённяшнім пасяджэнні савета рэзалюцыю па Беларусі ад імя Еўрасаюза і дзяржаў, што яе падтрымалі, прадставіў Кіпр, які з 1 ліпеня старшынствуе ў ЕС. Прадстаўнік гэтай краіны падкрэсліў, што пагаршэнне сітуацыі і парушэнні правоў чалавека прадоўжыліся ў Беларусі і пасля закранутага ў дакладзе камісара перыяду. Ён таксама заявіў, што ЕС заклапочаны прымяненнем смяротнай кары ў Беларусі і заклікае да ўвядзення мараторыя на гэты від пакарання.
У сваю чаргу пастаянны прадстаўнік Беларусі пры ААН у Жэневе Міхаіл Хвастоў нагадаў, што мандат спецдакладчыка ААН па Беларусі ўжо існаваў, але Савет па правах чалавека скасаваў яго ў 2007 годзе.«Гэтае рашэнне было абсалютна лагічным. Спецдакладчык прадэманстраваў сваю няслушнасць, нацэленасць на распальванне канфрантацыі ўнутры нашай краіны, гвалтоўную змену ўлады, зневажальна характарызаваў беларускі народ як такі, што не мае нацыянальнай ідэнтычнасці», — заявіў Хвастоў, гаворачы пра дзейнасць Адрыяна Севярына.
«Сёння тая ж група дзяржаў спрабуе зноў навязаць мандат спецдакладчыка Беларусі і міжнароднай супольнасці, — заявіў Хвастоў. — Матывы гэтай ініцыятывы Еўрасаюза ніякім чынам не звязаныя з правамі чалавека. ЕС такім чынам прасоўвае ў савеце свой палітычны парадак дня і прымушае вярхоўнага камісара дзейнічаць у гэтых мэтах. Галоўная задача, якую ставіць ЕС перад гэтым мандатам, — гэта мэтанакіраваная антыўрадавая дзейнасць у Беларусі пад прыкрыццём ААН».
Хвастоў асабліва падкрэсліў, што Беларусь не прызнае мандат спецдакладчыка і не будзе з ім узаемадзейнічаць. «Але мы прызнаем неабходнасць міжнародных механізмаў назірання за становішчам спраў у галіне правоў чалавека ў свеце. Мы будзем супрацоўнічаць з тымі з іх, якія працуюць аб`ектыўна, невыбіральна і спавядаюць універсальныя каштоўнасці і падыходы, ужо закладзеныя ва Універсальным перыядычным аглядзе», — сказаў ён.
Цяпер чытаюць
Больш за 60 чалавек затрыманыя пасля канцэрта Макса Каржа ў Франкфурце-на-Майне. Са сцэны спявак заклікаў спыніць вайну ва Украіне7
Каментары