Kaardynatara niezaležnych naziralnikaŭ Karniajenku nie vypuścili z krainy
Jon byŭ zaprošany ŭ Vienu na tuju ž kanfierencyju, kudy pajechała Jarmošyna.
U aeraporcie «Minsk-2» Viktaru Karniajenku paviedamili, što jon nievyjazny i pastavili ŭ pašpart adpaviednuju piačatku.
«Mnie ničoha nie patłumačyli. Ja atrymaŭ pasadačny tałon, usio prajšoŭ. A na pašpartnym kantroli pamiežniki mnie skazali, što jość zabarona na moj vyjezd. I tłumačeńniaŭ bolš nie było. Ja navat sfatahrafavaŭ: pobač moj pasadačny tałon i štamp «U vyjeździe admoŭlena», usio dobra bačna, — zajaviŭ Karniajenka. — Ja źbiraŭsia ŭ Vienu na hetuju kanfierencyju, jakaja tam adbyvajecca ciaham dvuch dzion i ŭ jakoj biare ŭdzieł staršynia CVK Lidzija Jarmošyna. Na hetaje mierapryjemstva ŭ mianie taksama było zaprašeńnie, jakoje mnie ŭčora dasłali, kab ja siońnia ranicaj moh prylacieć i ŭziać udzieł u druhim pracoŭnym dni. Ale hetaha, vidać, nie zachacieli biełaruskija ŭłady».
11 lipienia ŭ domie sustaršyni kampanii «Za spraviadlivyja vybary» Viktara Karniajenki ŭ Fanipali (Dziaržynski rajon) prajšoŭ pieratrus pavodle sankcyi prakurora. Tam skanfiskavali nakład biuleteniaŭ «Za spraviadlivyja vybary».
10 sakavika biełaruskija pamiežniki ŭžo adnojčy spyniali Karniajenku na miažy razam sa staršyniom partyi «Spraviadlivy śviet» Siarhiejem Kalakinym. Palityki nakiroŭvalisia ŭ Litvu.
U sakaviku, havoračy pra śpis nievyjaznych, Alaksandar Łukašenka zajaviŭ: «A my zrabili. I to my jaho jašče nie ŭviali. Na poŭnuju moc jašče nie ŭviali. Ale ŭviadziom».
Paśla hetaha za miažu ŭ rozny čas nie zmahli vyjechać dva dziasiatki palitykaŭ, hramadskich dziejačaŭ i žurnalistaŭ, jakija nie absłuhoŭvajuć kirujučy režym.
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii19
Kamientary