U Biełarusi z 1 žniŭnia 2012 hoda pavyšany piensii, paviedamiŭ namieśnik ministra pracy i sacyjalnaj abarony Valeryj Kavalkoŭ.
Pavodle jaho słoŭ, na padstavie ŭkaza ad 16 studzienia 2012 hoda № 35 «Ab pavyšeńni piensij» z 1 žniŭnia budzie praviedzieny pieraraźlik pracoŭnych piensij zychodziačy ź siaredniaj zarabotnaj płaty rabotnikaŭ u respublicy za druhi kvartał 2012 hoda. Pavodle danych Biełstata, jana skłała Br3 młn. 520 tys. 252 — heta na 17,1% vyšej za pakazčyk, jaki prymianiaŭsia pry pieraraźliku pracoŭnych piensij u mai.
U vyniku pracoŭnyja piensii, pry vyličeńni pamieru jakich nie prymianiajecca biudžet minimumu ŭ siarednim na dušu nasielnictva (BPM), sa žniŭnia pavialičycca na 17,1%.
Taksama ŭ žniŭni buduć pieraraźličany minimalnyja pracoŭnyja i sacyjalnyja piensii, nadbaŭki, pavyšeńni da piensij i dapłaty asobam starejšych uzrostaŭ u suviazi z rostam BPM (zaćvierdžany ŭradam na pieryjad z 1 žniŭnia pa 31 kastryčnika ŭ pamiery Br843 tys. 870, što na 13,6 pracenta vyšej za BPM, jaki dziejničaje z 1 maja pa 31 lipienia biahučaha hoda). Takim čynam, sacyjalnyja piensii, nadbaŭki i pavyšeńni adpaviedna pavialičacca na 13,6 pracenta. Z ulikam novaj vieličyni BPM pamiery dapłaty da piensij niepracujučych piensijanieraŭ sa žniŭnia składuć dla ludziej, jakija dasiahnuli ŭzrostu 75 hadoŭ, — Br158,2 tys. (75 pracentaŭ minimalnaha pamieru piensii pa ŭzrostu), jakija dasiahnuli ŭzrostu 80 hadoŭ — Br211 tys. (100 pracentaŭ minimalnaha pamieru piensii pa ŭzrostu).
U cełym siaredniaja piensija pa ŭzrostu, pavodle acenki, pavialičycca na 16,8% i dasiahnie Br1 młn. 719,9 tys.«Pamier piensii dla kankretnaha čałavieka zaležyć ad indyvidualnych paramietraŭ, jakija vykarystoŭvajucca dla raźliku jaho piensii — stažu raboty, indyvidualnaha kaeficyjenta», — padkreśliŭ namieśnik ministra.
Finansavańnie raschodaŭ na pavieličeńnie piensij budzie pravodzicca sa srodkaŭ Fondu sacyjalnaj abarony nasielnictva Ministerstva pracy i sacyjalnaj abarony. Dadatkovyja raschody na hetyja mety ŭ žniŭni składuć Br592,3 młrd.
Valeryj Kavalkoŭ padkreśliŭ, što piensijnaja sistema funkcyjanuje stabilna, piensii vypłačvajucca svoječasova. U biahučym hodzie prymajucca miery, nakiravanyja na padtrymańnie ŭzroŭniu piensij i ich pakupnoj zdolnaści. Tak, u adpaviednaści z ukazam numar 35 z 1 studzienia 2012 hoda ŭstanoŭlena štomiesiačnaja dadatkovaja metavaja dapłata da piensij niepracujučych atrymalnikaŭ piensij u orhanach pa pracy, zaniataści i sacabaronie, jakija dasiahnuli ŭzrostu 75 hadoŭ, u pamiery 75%, va ŭzroście 80 hadoŭ i starejšyja — 100% minimalnaha pamieru piensii pa ŭzrostu. U lutym i mai zrobleny pieraraźliki pracoŭnych piensij zychodziačy ź siaredniaj zarabotnaj płaty rabotnikaŭ u respublicy, a taksama minimalnych pracoŭnych i sacyjalnych piensij, nadbavak, pavyšeńniaŭ i dapłat da piensij u suviazi sa źmianieńniem biudžetu pražytačnaha minimumu ŭ siarednim na dušu nasielnictva (BPM). Namieśnik ministra padkreśliŭ, što ŭ 2012 hodzie čakajecca praviadzieńnie pieraraźlikaŭ piensij jašče i ź listapada.
Kamientary