TOP-5 novych śpiecyjalnaściaŭ u biełaruskich VNU

1 vieraśnia 2012 źjavicca vosiem niabačnych raniej u Biełarusi śpiecyjalnaściaŭ.

Kryptohrafy na słužbie KDB

Biezumoŭnym trendam sioletniaj ustupnaj kampanii ŭ VNU staŭ rost naboru na śpiecyjalnaści, dzie buduć hadavać znaŭcaŭ dla pracy ŭ śfiery biaśpieki. Mnohimi vypusknikami takich prahram moža ŭ budučyni zacikavicca KDB. U stanoŭčym sensie hetaha słova: śpiecyjalistu, naprykład, u kryptahrafii, jakich z novaha navučalnaha hoda budzie rychtavać BDU, ciažka znajści pracu ŭ miescy, nie źviazanym sa śpiecsłužbami. Raźmiarkoŭvać maładych kryptohrafaŭ taksama buduć vyklučna supracoŭniki KDB.

Nabor na prykładnuju kryptahrafiju rabili na Vajskovym fakultecie BDU. Tamu prosta z vulicy trapić na navučańnie pa hetaj śpiecyjalnaści niemahčyma: abituryjentaŭ abaviazali prajści sumoŭje ŭ siłavych viedamstvach. Kryptohrafy zojmucca raspracoŭkaj sistemy, što dazvolić abaranić infarmacyju. Takija rečy patrebnyja bankam, raspracoŭščykam inšych prahram i dziaržavie ahułam.

Akramia hetaha biaśpieka stanie asnoŭnaj temaj navučańnia dla studentaŭ novych śpiecyjalnaściaŭ u Biełaruskim dziaržaŭnym univiersitecie infarmatyki i radyjoelektroniki i Viciebskim dziaržaŭnym univiersitecie.

«Inžynier-prahramist-łahist»

Akramia hetaha z novaha navučalnaha hoda ŭ BDUIR buduć rychtavać majstroŭ adrazu dźviuch zapatrabavanych u pracadaŭcaŭ śfier: IT i łahistycy. Univiersitet adkryvaje nabor na «Infarmacyjnyja sistemy i technałohii ŭ łahistycy». Dypłom vypuskniki hetaj śpiecyjalnaści atrymajuć z aryhinalnaj kvalifikacyjaj: jany z honaram zmohuć nazyvać siabie «inžynierami-prahramistami-łahistami».

Cikava, što śpiecyjalnaść adrazu zajmieła papularnaść u abituryjentaŭ: prachadny bał na joj akazaŭsia roŭnym 310: heta najbolšaja ličba dla fakulteta i adna z samych vysokich dla VNU ahułam. Zrešty, nabirajuć zusim niašmat abituryjentaŭ: 25 na biaspłatnaje i 25 na płatnaje adździaleńnie. Dla paraŭnańnia, na śpiecyjalnaści fakulteta kampjutarnych sistem i sietak taho ž univiersiteta nabor dasiahaje 90 čałaviek na biaspłatnaje i 100 na płatnaje adździaleńnie. Ahułam płanujecca, što studentami hetaha fakulteta stanie sioleta paŭtysiačy čałaviek. Ahulny nabor u BDUIR — prykładna 2,2 tysiačy čałaviek.

Fatohrafy jahonaj vialikaści

Upieršyniu ŭ Biełarusi źjaviacca dypłamavanyja fotažurnalisty. Praŭda, atrymać adpaviedny dypłom BDU zdolejuć tolki tyja, chto ŭžo maje vyšejšuju adukacyju. Bo nabor pa śpiecyjalnaści «fotažurnalistyka» adkryty na fakultecie pierapadrychtoŭki i pavyšeńnia kvalifikacyi Instytuta žurnalistyki.

Prahrama raźličanaja na paŭhoda viačerniaj adukacyi i raspracavanaja pry sumiesnym udziele vykładčykaŭ Škoły fatahrafii i Instytuta žurnalistyki BDU. U Instytucie ŭžo jość kursy «Asnovy fatahrafii» i «Asnovy fotažurnalistyki». Da ich dadaducca kursy ad Minskaha centra fatahrafii, dyrektar jakoha staŭ kurataram prahramy. Stvaralniki śpiecyjalnaści «fotažurnalistyka» spadziajucca z dapamohaj vypusknikoŭ «padvysić jakaść vizualnaj infarmacyi ŭ mas-miedyjach», a taksama «ŭmacavać pazicyi fatahrafii ŭ redakcyjach biełaruskich ŚMI».

Darečy, stać studentami mohuć i tyja, chto vučycca na vypusknych kursach inšych VNU. Hałoŭny kryter — jakaść partfolia z 20 fotazdymkaŭ.

Bieśpiłotnik z adnym kryłom

A voś na, zdavałasia b, pierśpiektyŭnuju śpiecyjalnaść «Techničnaja ekspłuatacyja bieśpiłotnych avijacyjnych kompleksaŭ» u Minskim dziaržaŭnym vyšejšym avijacyjnym kaledžy byŭ niedabor: na šeść miescaŭ adpaviednaj śpiecyjalnaści vajskovaha fakulteta akazalisia zaličanymi tolki piać čałaviek. Dyj i tyja daloka nie vydatniki: znajšłosia miesca i dla abituryjenta sa 109 bałami. Dla atrymańnia takoha vyniku na CT ź siarednim bałam školnaha atestatu «5» dastatkova było napisać usie try testy na 20 bałaŭ. Što na 13 bolej za minimalny vynik, jaki dazvalaje być dapuščanym da pastupleńnia ŭ VNU.

Atrymlivajecca, što kiravać novaj raspracoŭkaj biełaruskaj abarončaj haliny — pieršym bieśpiłotnikam — amal što niama kamu. Zrešty, heta tolki pieršy nabor.

Depalityłahizavanaja sacyjałohija

Navučańnie pa, badaj, samaj darahoj śpiecyjalnaści siarod biełaruskich VNU raspačynaje ŭ Vilni Jeŭrapiejski humanitarny ŭniviersitet. Zaviecca prahrama prosta: «Sacyjałohija» — i kaštuje 2 300 jeŭra ŭ hod. U biełaruskija rubli navat pieravodzić strašna. Zrešty, u EHU kažuć, što ŭniviersitet vyłučaje najlepšym studentam (sioleta takich budzie 14 na ŭsiu VNU) stypiendyi pa 2 000 jeŭra ŭ hod. Akramia hetaha, dla mnohich studentaŭ častkova pakryvajucca vydatki na adukacyju.

Što ž čakaje studentaŭ na samaj darahoj śpiecyjalnaści nie tolki nievialikaha ŭniviersiteta ŭ vyhnańni, ale i ŭsioj biełaruskaj adukacyjnaj prastory? U navučalnym płanie novaj prahramy paznačanyja takija dyscypliny, jak «sacyjałohija internetu i masavych kamunikacyj», «sacyjałohija menedžmentu» i navat kurs pad aryhinalnym nazovam «O dzivosny novy śviet: utopija i antyŭtopija ŭ litaratury XX st».

Cikava, što novaja prahrama ŭ EHU zaklikanaja zamianić zakrytuju sioleta prahrama «palitałohija i jeŭrapiejskija daśledavańni», pa jakoj studenty ŭniviersiteta vučylisia apošnija šeść hadoŭ. Kiravaŭ prahramaj viadomy žurnalist Viktar Marcinovič.

• 0
• 0
• 0
• 0
• 0
• 0
• 0
• 0