Ukrainskija studenty, zatrymanyja ŭ Minsku, pakinuli Biełaruś

Troje ŭkrainskich studentaŭ, zatrymanych u Minsku 15 listapada i aryštavanych na 10 sutak, učora viečaram pakinuli Biełaruś. Pra heta BiełaPAN paviedamiŭ pres-ataše pasolstva Ukrainy ŭ Biełarusi Alaksiej Jemialjanienka.

Jon padkreśliŭ, što infarmacyju pra zatrymańnie studentaŭ u pasolstvie atrymali tolki 20 listapada, pryčym z Kijeva. «My adrazu ž pačali pracavać — źviarnulisia ŭ MZS, u milicyju, konsuł z zatrymanymi sustrakaŭsia. Učora ich vyzvalili, konsuł ich supravadziŭ, učora razam sa svajakami jany pajechali va Ukrainu», — skazaŭ Jemialjanienka.

Pres-ataše nie viedaje, čamu byli zatrymany ŭkrainskija studenty i čamu biełaruski bok nie paviedamiŭ pra heta pasolstvu Ukrainy.

U svaju čarhu pres-sakratar HUUS Minharvykankama Alaksandr Łastoŭski zajaviŭ BiełaPAN, što nie vałodaje infarmacyjaj ab pryčynach zatrymańnia hramadzian Ukrainy.

Pra zatrymańnie ŭkrainskich studentaŭ stała viadoma ŭ minułyja vychadnyja. Viečaram 26 listapada situacyju prakamientavaŭ pradstaŭnik MZS Ukrainy Alaksandr Dzikusaraŭ.

«My nie možam aceńvać, biezhruntoŭna abo na dastatkovych padstavach adbyłosia zatrymańnie hramadzian Ukrainy, — skazaŭ jon. — Ale fakt jość fakt. My daviedalisia ab situacyi ŭ dvaccatych čysłach listapada ad svajakoŭ zatrymanych — jany źviarnulisia da nas z prośbaj pravieryć infarmacyju, bo maładyja ludzi nie vychodzili na suviaź. Kali svajaki junakoŭ źviarnulisia ŭ śledčy izalatar, im patłumačyli, što tam nie viedajuć, ci paviedamlena ab fakcie ich zatrymańnia ŭ pasolstva Ukrainy ŭ Respublicy Biełaruś. My źviarnulisia da kampietentnych orhanaŭ Biełarusi z prośbaj dać nam tłumačeńni ab pryčynach zatrymańnia hramadzian Ukrainy, ab tym, jakija pravaparušeńni jany ŭčynili. Nam heta pakul nieviadoma».

Anatol Vałkoŭski, baćka adnaho z zatrymanych, jaki pryjechaŭ u Minsk, paviedamiŭ BiełaPAN: «My pryjechali siudy z žonkaj — nam nie dali nijakaj sustrečy ź dziećmi, nijakich kantaktaŭ! Nahadaju, heta hramadzianie inšaj dziaržavy — kožny ź ich mieŭ pry sabie pašpart, kožny mieŭ telefon. Nijakaha telefanavańnia — ni nam, baćkam, ni va ŭniviersitet, ni ŭ pasolstva — zroblena nie było. Ich rassadzili pa roznych kamierach. Nam nie pakazali dziaciej, nie dali pahavaryć, staŭleńnie było, nibyta jany končanyja kryminalniki. Pieradać uziali tolki asabistyja rečy, ničoha z praduktaŭ, nie ŭziali navat zapisku, u jakoj było napisana: «Synočak, my ciabie lubim! Trymajsia!»

Pakul nieviadoma, ci buduć ukrainskija hramadzianie abskardžvać dziejańni biełaruskich pravaachoŭnych orhanaŭ.

• 0
• 0
• 0
• 0
• 0
• 0
• 0
• 0