Click Nere
Jak robicca šedeŭr? Biarecca samy papularny ŭ biełaruskaj dramaturhii siužet — jak prosty sielanin pajšoŭ u zakład z djabłam. Zavarvajecca punš z daŭnich pjesaŭ Marašeŭskaha, Kupały j Alachnoviča. Dalej biarucca try jarkija kolery — čyrvony, čorny j bieły, na jakich budujecca ŭsia scenahrafija — čorna-bieły mur, jaki, u zaležnaści ad aśviatleńnia, moža być rajem ci piekłam, na tle jakoha šykoŭnyja harnitury ad mastački Inhi Sality hladziacca nia horš, čym na podyjumie. Paśla pryhožaja karcinka staroha, jak śviet, siužetu asučaśnivajecca nieŭtajmoŭnaju j dziorzkaj fantazijaj režysera. Voś i vyjšaŭ spektakl Ryda Talipava pa pjesie Siarhieja Kavalova na «Volnaj scenie».
Try razy vypraboŭvaje sumny djabał (Ihar Sihoŭ) chłopca Jaśku (Anatol Kot). Spačatku rajem, što nahadvaje eŭraramantavanuju chatu z bahatym harderobam j vybaram zamiežnych napojaŭ. Druhi raz — siadzieńniem na adnym miescy, a paśla maŭčańniem. I ŭsie try razy hieroju zaminajuć vyjhrać zakład albo žonka (Ludmiła Sidarkievič), albo niezaležnyja ad jahonaj voli abstaviny. Ale ž jakija! Časam viadomaja historyja adychodzić na druhi plan, sastupajučy miesca fetyšu. Jak seksualnamu, tak i palityčnamu.
O-o! Sadamazachisckija sajty Internetu tuskniejuć pierad łancuhami dy ŭmieńniem machać puhaju žarsnaj Susiedki (Volha Sizova). A čaho vartyja ŭlotki našaj apazycyi ŭ paraŭnańni z zaklikam Nieznajomaha (Uładzimier Ivanoŭ) «iści na schod, vyhaniać z krainy praklataha Cmoka». A kali chto bačyŭ taniec vialikaha, u čałaviečy rost, čelesa? I kudy padavacca mienskim putanam paśla bliskučaha epizodu, syhranaha Tacianaj Marchiel mienavita ŭ hetaj ipastasi? Dy j mienskija amonaŭcy — chutčej ahncy boskija pierad zaciahnutymi ŭ skuru Funkcyjanerami, jakija katujuć biednaha Jaśku, šukajučy zabaronienuju litaraturu.
«Volnaja scena» ŭ čarhovy raz paćvierdziła svajo prava na hetuju nazvu redkim raźniavoleńniem. Ale spajany tandem Kata j Sidarkievič, śmiešny balet u pastanoŭcy Michasia Kaminskaha, dy j sama dzieja, zdajecca, byli tolki tłom dla epatažu jak takoha. Ci, moža, ja jašče maleńki dla takoha teatru? Pa prahladzie spektakla ja sustreŭ znajomaha. Paraiŭ schadzić. Maŭlaŭ, takoha ty jašče nia bačyŭ.
Znajomamu pašancavała bolej. Jon paśla doŭha mnie dziačyŭ. Pierad antraktam u teatry adrubiłasia elektryčnaść.
Niaŭdziačny słuchač
Kamientary