Taciana Śnitko. Kryminalnaja rasiejskaja papsa

Kryminalnaja rasiejskaja papsa

Rasiejski pop-śpiavak Filip Kirkoraŭ abraziŭ biełaruskich milicyjantaŭ, jakija achoŭvali jahony mienski kancert. «Alfa-radyjo» ŭ sieradu prynosiła prabačeńni i milicyi, i hledačam za «niedastojnyja pavodziny hościa». Kirkoraŭ abazvaŭ milicyjantaŭ, što ŭtajmoŭvali ŭtrapionych hledačoŭ, «palityčnymi prastytutkami». Milicyjanty jamu hetaha nie daravali i paśla kancertu raskidali jahonuju pryvatnuju achovu i zatrymali śpievaka, pahražajučy aryštym. Toj byŭ źbiantežany — praz hadzinu ŭ jaho išoŭ ciahnik na Maskvu — dyk musiŭ prynarodna prynižana vybačacca.

Milicyja dziejničała žorstka, ale pavodle ŭstanoŭlenych u nas zakonnym čynam pryniatych praviłaŭ praviadzieńnia kancertaŭ. Dla haścioŭ z Rasiei, dzie daŭno nijakaj ułady ni zakonaŭ nie zastałosia i ŭsio vyrašajuć hrošy, heta było niečakana i zdavałasia navat dzika.

Biełaruskaja milicyja, najbolšaja vajenizavanaja siła krainy, usio bolš adčuvaje ŭłasnuju siłu.

A estrada znoŭ prymusiła zadumacca pra toje, jak u biełarusaŭ z rasiejcami «maja tvaja nie panimajet».

Ale heta prosta drobiazi ŭ paraŭnańni z tym, jakija padziei vakoł maskoŭskaj estrady ciapier raźvivajucca ŭ susiedniaj Ukrainie. Źniknieńnie ŭ padvarotniach vuličnych pradaŭcoŭ rasiejskaj papsy, biesparadki ŭ Lvovie ŭ apošnija dni, ledź nie sarvany ŭ Kijevie na pačatku červienia kancert Dzimy Malikava...

Usplosk radykalnych nastrojaŭ ukrainskaj moładzi spravakavany žudasnaj historyjaj, što adbyłasia ŭ Lvovie jašče 8 traŭnia. U toj dzień u adnu ź lvoŭskich kaviarniaŭ zajšoŭ viadomy kampazytar i estradny vykanaŭca Ihar Biłazir (časta vystupaŭ razam z žonkaj — Aksanaj Biłazir). U kaviarni razharełasia sprečka pamiž dvuma inšymi naviednikami dy barmenam: padpityja naviedniki emacyjna patrabavali pastavić im rasiejskija pieśni Šufucinskaha, Michaiła Kruha ci jaki-niebudź inšy «błatniak». Pavodle słovaŭ vidavočcaŭ, Ihar Biłazir umiašaŭsia ŭ sprečku j pasprabavaŭ davieści prychilnikam błatnych piesień, što ŭva Ŭkrainie možna słuchać niešta bolš prystojnaje. Kanflikt nieŭzabavie, zdavałasia, byŭ vyčarpany. Ale, pryčakaŭšy, kali kampazytar vyjdzie, dvoje złodziejaŭ kinulisia bić jaho na vulicy žaleznymi prutami. Pakul pryjechała milicyja, Biłazir užo lažaŭ z prałamanym čerapam. Try tydni śpiavak znachodziŭsia ŭ kamatoznym stanie i ŭrešcie pamior u špitali.

Złačyncaŭ zatrymała milicyja tamsama, na miescy. Nieadkładna zaviali kryminalnuju spravu, ale — voś dziva! — na ranicu abodvuch adpuścili pad padpisku ab niavyjeździe. Vyśvietliłasia, što adzin z napadnikaŭ, Dźmitry Voranaŭ, staršy lejtenant ukrainskaha vojska — syn namieśnika načalnika lvoŭskaj haradzkoj milicyi. Na momant incydentu Voranaŭ-małodšy padaŭ dakumenty na pastupleńnie ŭ vajenna-dyplamatyčnuju akademiju. Jahony padzielnik, adstaŭny aficer Jury Kalinin, užo na druhi dzień paśla dačy padpiski źnik nieviadoma kudy. Hety čałaviek, kali vieryć čutkam pra jaho, nibyta maje pramoje dačynieńnie da handlu zbrojaj.

Pachavańnie Ihara Biłazira 30 traŭnia vyliłasia ŭ stychijny mitynh. Jahony źmiest byŭ, zrazumieła, nia tolki antyrasiejski, ale i «antymiantoŭski». Paśla pachavańnia raźjušany natoŭp ludziej kinuŭsia da ŭpravy lvoŭskaj milicyi, dumajučy ŭziać źnianavidny budynak šturmam. Toje samaje mahło b čakać i prakuraturu, jakaja nijak nie adreahavała na pakryvańnie milicyjaj ciažkaha złačynstva. Šturm nie adbyŭsia, u natoŭpie nie znajšłosia kiraŭnika.

Lvoŭskija deputaty j pradstaŭniki meryi tut ža prybyli na miesca biesparadkaŭ dy ślozna paabiacali pravieści śledztva j spraviadlivy sud. Adnak mnohija žychary miesta nia vierać abiacańniam uładaŭ. 8 červienia, na dzieviać dzion sa śmierci zabitaha, nacyjanalna śviadomyja lvavianie adznačyli čornuju datu mitynham. Ułady napiaredadni rychtavalisia da vialikich biesparadkaŭ: u Lvoŭ byli ściahnutyja vojski i specsiły milicyi z usiaje Ŭkrainy. Rasiejskaja muzyka ciapier u Lvovie persona non grata.

Taciana Śnitko