Vasil Krokva. Elity pra vybary

 Elity pra vybary

Apošnija padziei ŭ našym palityčnym žyćci jaskrava śviedčać, što Biełaruś užo praktyčna ŭvajšła ŭ peryjad padrychtoŭki da prezydenckich vybaraŭ. Ja pasprabavaŭ vyśvietlić, što dumajuć pra heta elity Połaččyny. Praŭda, zrabić šyrokaje apytańnie mierkavanych respandentaŭ akazałasia nia tak prosta. Razmaŭlać na “niebiaśpiečnuju” temu praz telefon zhadžalisia tolki lidery miascovych palityčnych arhanizacyjaŭ.

Viadomy połacki biznesoviec Siarhiej Palakoŭ skazaŭ litaralna nastupnaje: jon nia vieryć u adzinaha alternatyŭnaha kandydata, bo čałavieka, jakoha takim abvieściać, abaviazkova pasadziać.

Lider połackaj arhanizacyi BNF Michaś Baŭtovič u takoha kandydata vieryć, ale vykazvaje mierkavańnie, što hety kandydat nie pavinien pachodzić ź biełaruskaj palityčnaj elity, va ŭsiakim razie, jon nia bačyć jaho siarod kiraŭnikoŭ partyj, ale hety kandydat abaviazkova pavinien być zaanhažavany ŭ hramadzka-palityčnaje žyćcio krainy. Na majo pytańnie, jak jon hladzić na kandydaturu Siamiona Domaša, Baŭtovič adkazaŭ, što ŭ jaho vačach Domaš nia maje admoŭnaha rejtynhu, a jahonaje pachodžańnie z kiraŭnikoŭ u siońniašniaj sytuacyi — jakaść stanoŭčaja.

Nia vieryć u adzinaha kandydata ad apazycyi i lider navapołackich kamunistaŭ Viačasłaŭ Kryštaloŭ: kali adzinym kandydatam budzie chto-kolviečy ź levych, dyk pravyja hałasavać za jaho nia buduć. A kandydata ad pravicy nie padtrymajuć prychilniki kamunistyčnaj idealohii, maŭlaŭ, ludziam nie zahadaješ. Tamu kamunisty na prezydenckich vybarach buduć vyłučać svajho kandydata. Siamiona Domaša Kryštaloŭ ličyć pradstaŭnikom pravaj apazycyi. Nia vieryć u adzinaha kandydata i kiraŭnik navapołacka-połackaj arhanizacyi Svabodnaha Prafsajuza Biełaruskaha Ŭładzimier Antanovič, badaj, samy aŭtarytetny hramadzki dziejač Połackaha kraju. Jon kaža, što biełaruskaja apazycyja nastolki strakataja i razmaitaja, što damovicca ab adzinym kandydacie jana nia zdoleje. Tamu ŭžo zaraz možna kazać, što apanentaŭ u Łukašenki budzie nia mienš jak piaciora. Inšaja reč, što samym upłyvovym palityčnym siłam usio ž varta trymacca razam. Antanovič ličyć, što prablema z adzinym kandydatam palahaje jašče ŭ tym, što ŭ Biełarusi niama volnaha palityčnaha rynku. U apazycyjnym asiarodździ, jak i ŭ cełym u krainie i hramadztvie, nie staje demakratyi. Tamu peryjadyčna paŭstajuć usialakija nieparazumieńni i skandały: padzieły partyjaŭ, prymusovaje vyklučeńnie siabroŭ z partyjnych šerahaŭ, abvinavačvańni palityčnych lideraŭ u dyktatarskim styli kiravańnia. Hetaja niedaraźvitaść nie dazvalaje naradzicca ŭ krainie paŭnavartasnaj palityčnaj elicie. Bo sapraŭdnaja elita farmujecca ŭva ŭmovach kankurencyi. A kankurencyja paŭstaje tolki pry volnym rynku — ekanamičnym, palityčnym, kulturnym.

Vasil Krokva, Połacak