Vital Portnikaŭ. Čamu Pucin tak ciesna supracoŭničaje z Zachadam

Z Rasiei pra Rasieju

Čamu Pucin tak ciesna supracoŭničaje z Zachadam

Vital Portnikaŭ, Maskva

Rašeńnie Ŭładzimiera Pucina pra zakryćcio dvuch vajskovych abjektaŭ za miažoj, jakija Rasieja atrymała ŭ spadčynu ad SSSR, — bazy ŭ Vijetnamie i radyjolakacyjnaj stancyi na Kubie — naziralniki nazvali sensacyjnym. Ich ździviła nie infarmacyja pra Vijetnam — źviestki pra chutkuju likvidacyju źjavilisia jašče kolki miesiacaŭ tamu.

Sapraŭdnaj sensacyjaj stałasia paviedamleńnie pra stancyju na Kubie, jakaja była adnym z najbolšych dasiahnieńniaŭ SSSR u časie chałodnaj vajny. Nidzie bolš vojska adnaje zvyšdziaržavy nie nabližałasia tak mocna da vojskaŭ inšaj. Tamu likvidacyja bazy, źmieščanaj u vałodańniach Fidela Kastra, maje vializnaje symbaličnaje značeńnie, i dziela hetaha symbaličnaha žestu Rasieja zhadžajecca na taki značny prałom u systemie vyviedki.

Maskva na ŭsiu siłu syhnalizuje Vašynhtonu: “My z vami!”, karystajučysia ŭsimi syhnalnymi ściažkami, jakija maje. Ź Vijetnamu, z Kuby, z Tadžykistanu i z Uzbekistanu. Štości nadzvyčaj efektnaje maje adbycca na subotnim spatkańni Pucina z Bušam.

Maje znajomyja dyplamaty, jakija pracujuć u Hałoŭnym štabie NATO, raspaviadali, što ŭsio heta abudžaje ŭ Bruseli vializny entuzijazm. Polski prezydent padčas vizytu ŭ Maskvu pradkazvaje, što ŭ budučym Rasieja zrobicca ŭdzielnikam Paŭnočnaatlantyčnaha aljansu… Słovam, idylija epochi teroru!

Adnak varta pasprabavać zrazumieć, navošta Pucin heta paabiacaŭ i što budzie zaŭtra?

Pałkoŭnik Pucin nie źjaŭlajecca idealistam, jaki kirujecca ŭ svaich učynkach vieraj u toje, što, tolki abjadnaŭšysia, čałaviectva pieramoža teraryzm, i tamu Rasieja pavinna być z Amerykaj i Zachadam. Rasieja maje zaraz šaniec zrabicca častkaj zachodniaha śvietu, nie źmianiajučy zamiežnaj i ŭnutranaj palityki. Kali navat Pakistanu prabačajuć vajennuju dyktaturu j zdymajuć suprać jaho sankcyi, chto budzie pryhadvać Rasiei jejnuju “kiravanuju demakratyju”, dziŭny chaŭrus ź Biełarusiaj abo Čačeniju?

A kali nieminučy spad cenaŭ na naftu zahonić Rasieju ŭ tupik, Zachad napeŭna čym moža dapamoža “tavaryšu Ŭładzimieru”. Dapamoža, bo “tavaryš Uładzimier” naš i jašče jaki naš — bolš naš, čym hienerał Mušaraf!

Adviečnaja prablema kožnaha zamožnaha mužčyny — čamu jana mianie vybrała: pa kachańni ci z-za maich hrošaj? Zrazumieła, budzie lepiej, kali pucinskaja Rasieja skirujecca na Zachad, čym zastavacca ŭ “viečnym rasiejskim nidzie”. Ale treba ŭśviedamlać, što kiraŭnictva Rasiei nie da kanca jašče razumieje, dzie miesca našaje dziaržavy, a, vybirajučy sajuźnikaŭ i sponsaraŭ, kirujecca kańjunkturnymi mierkavańniami. A kali sytuacyja źmienicca, moža źmianicca i vybar, što mocna ŭrazić Zachad, upeŭnieny, što “Rasieja z nami pa kachańni”. Bo kali Rasieja nasamreč pryjdzie na Zachad — Zachad pavinien zrabić usio, kab nia dać joj syści.