Akademiki biaz pracy
U Instytucie historyi AN Biełarusi praciahvajucca skaračeńni. Hodam raniej pazvalniali tych, chto pracavaŭ na paŭstaŭki. Ciapier skaračajuć labarantaŭ, a astatnija navukovyja supracoŭniki pišuć spravazdačy. U kaho budzie najhoršy pakaźnik — mohuć zvolnić. Planujecca skaracić 15% supracoŭnikaŭ.
Pierad tymi, chto zastaniecca, paŭstanie dylema: iści ŭ adpačynak na dva miesiacy ci pracavać na paŭstaŭki da vosieni. A tam ci finansavańnie raptam znojdziecca, ci buduć skaračać dalej. Na siońnia ŭ Instytucie pracujuć 130 čałaviek. Bolšaść padpracoŭvajuć u VNU, ale j tam planujucca skaračeńni. Kažuć, jany zakranuć tych, chto pracavaŭ na paŭstaŭki ci pahadzinna.
U Miensku čakajecca ŭźlot biespracoŭja. Vialikija skaračeńni zaplanavanyja na aŭtaramontnym, hadzińnikavym i traktarnym zavodach. Sioleta mohuć stracić pracu kala 170 tys. mienčukoŭ (usiaho nasielnictva stalicy — 1700 tys. čałaviek).
Pahrozy biespracoŭja niama, ale pracu lepš šukać samomu
Michaił Kavaloŭ, dekan ekanamičnaha fakultetu BDU: Vidavočna, što źmieny formy ŭłasnaści paciahnuć i źmieny ŭ kolkaści zaniatych. Razam z tym, istotnaha rostu biespracoŭja ŭ Biełarusi nie pradbačycca, bo ŭ Biełarusi rezka skaračajecca dola aktyŭnaha nasielnictva. Časova mohuć być biespracoŭnyja, i kolkaść ich pavialičycca, ale tolki časova. U perspektyvie ŭ Biełarusi naadvarot budzie nie chapać pracoŭnaj siły. Heta vidać z demahrafičnych prahnozaŭ. Vidavočna, patrebnyja vysiłki, kab pracoŭnaja siła, što vyzvalajecca na dziaržaŭnych pradpryjemstvach, chutka znachodziła miesca ŭ niedziaržaŭnym sektary. Nieabchodna, kab jon raźvivaŭsia dynamičnymi tempami. A ŭ cełym nasielnictva dastatkova istotna skaračajecca, asabliva jaho aktyŭnaja častka. Niepaźbiežna pavialičycca pensijny viek z metaj zakryć niedachop pracoŭnaj siły.
“NN”: Ci pad siłu pryvatnamu sektaru ŭ karotkija terminy stvaryć naležnuju kolkaść pracoŭnych miescaŭ?
M.K.: Heta zaležyć ad dziaržavy — nakolki spryjalnyja ŭmovy jana stvoryć dla pryvatnaha sektaru.
“NN”: Dyk a što Vy raicie prostym ludziam, jakim pahražaje skaračeńnie?
M.K.: Kali čałaviek bačyć, što tam, dzie jon ličycca, pracy niama i nie pradbačycca, dyk lepiej nie marudzić, a iści samomu i šukać pracu.
“NN”: I supracoŭnikam Akademii navuk, dzie skaračeńni ciapier najbolš istotnyja?
M.K.: Akademiju dobra było b pieratvaryć u Nacyjanalny ŭniversytet, jaki staŭsia by kankurentam BDU.
Zapisaŭ E.Ł.
Ciapier čytajuć
Palčys, Andrejeva, Łojka i inšyja imiony — paśla vizitu amierykanskich dypłamataŭ u Minsk vyzvalili 250 palitviaźniaŭ15
Kamientary