z usioj krainy
Na Aršanščynie — nafta
VA “Biełhiealohija” razhladaje mahčymaść ekspluatacyi radoviščaŭ buraha vuhalu ŭ Dubrovienskim rajonie, zapasy jakoha składajuć 26 młn. tonaŭ. Taksama razhladajecca metazhodnaść zdabyčy nafty na terytoryi Aršanskaj upadziny. Dziela hetaha “Biełhiealohija” planuje sioleta pravieści tam sejśmičnyja daśledavańni dy zrabić adnu parametryčnuju śvidravinu.
Pierasialajuć u vioski
Navapołacki centar zaniataści vyrašaje prablemu biespracoŭja, raśsialajučy achvotnych pa vioskach Dubrovienskaha, Brasłaŭskaha, Dzisienskaha dy Hłybockaha rajonaŭ. Pierasialencam vypłačvajecca dapamoha ŭ pamiery piaci “biudžetaŭ pražytačnaha minimumu”. Letaś u vioski pierajechała 20 siemjaŭ.
Novy asfaltabeton
Viciebski darožny trest №1 pieršym u krainie pakłaŭ u pałatno maskoŭskaj trasy, jakaja prachodzić praź Biełaruś, 400 tonaŭ vyrablenaha im novaha asfaltabetonu padvyšanaj tryvałaści. Trasa M1/Je30 biare na siabie najbolšuju častku tranzytnych pieravozak na Maskvu, i jaje pałatno nie vytrymlivaje intensiŭnaha ruchu ciažkich “furaŭ”. Dyk darožniki prydumali padmiešvać u asfalt dla mocy celulozu z druzavaj mastykaj.
Unijaty ŭ Voršy
Štoniadzielu a 15-j u Aršanskim kaściole Śv.Jazepa adbyvajecca ŭnijackaja imša. Słužyć jaje ajciec Źmicier Hryšan ź Viciebsku. Aršanskaja hreka-katalickaja hramada — treciaja na Viciebščynie (jašče ŭnijaty jość u samim Viciebsku i ŭ Połacku). Skantaktavacca z aršanskimi hreka-katalikami možna pa t. 22-4-41.
Michał Čarvinski, Viciebsk
Začyniajuć vyćviareźniki
Mienski harvykankam vyrašyŭ pakinuć u stalicy tolki adzin medvyćviareźnik — u Maskoŭskim rajonie. Astatnija buduć začynienyja. Tłumačać takija źmieny ekanamičnaj niemetazhodnaściu ŭtrymlivać stolki vyćviareźnikaŭ i… źmianšeńniem kolkaści pjanych. Ale specyjalisty-narkolahi ličać hetaje rašeńnie paśpiešlivym.
Bałacizacyja
Lelčycki rajvykankam vyrašyŭ pieratvaryć bolš za 1000 hiektaraŭ voryva ŭ bałoty. Hetyja ziemli daŭno ŭžo amal nie davali ŭradžaju. Da 2005 h. jašče 4 tys. hiektaraŭ voryva vyvieduć z užytku. Častku ziamli zasadziać lesam.
Šancaŭ asudžany za valutu
Staršyniu mahiloŭskaj abłasnoj arhanizacyi AHP Uładzimieru Šancavu dali 500 tys. rubloŭ štrafu za prodaž valuty pryvatnaj asobie. U Šancava kanfiskavali 1500 dalaraŭ. Jon svajoj viny nie pryznaje i kaža, što prosta hutaryŭ z valutčykam — svaim kolišnim kaleham.
Złaviŭ kabietu
Učastkovy milicyjant z Homielu złaviŭ 40-hadovuju kabietu, jakaja skočyła ź siomaha pavierchu. Kabieta vyrašyła zabicca, naciarpieŭšysia ad muža-alkaholika. Milicyjant stajaŭ na balkonie paviercham nižej i sprabavaŭ adhavaryć jaje. Kali žančyna skočyła, učastkovy schapiŭ jaje za ściohny i ŭściahnuŭ na balkon. Samahubca nie pieravažyła milicyjanta, bo taho trymała za nohi mažnaja susiedka.
Pa vychodnych — daražej
Za adnu pajezdku ŭ vychodnyja i śviatočnyja dni na ŭsich hłybockich aŭtobusnych maršrutach daviadziecca płacić nie 120, a ŭžo 240 rubloŭ. Na takija niepapularnyja miery pajšoŭ miascovy aŭtapark, kali apynuŭsia ŭ ciažkim materyjalnym stanoviščy. Minuły hod prynios transpartnikam 32,9 młn. rubloŭ strat.
Pavodle “Volnaha Hłybokaha”
Palać travu — harać knihi
U vioscy Makrovičy (Białyniččyna) zhareła biblijateka. Zaniałasia jana ad suchoj travy, jakuju chtoś pablizu padpaliŭ. Sapsavanyja praktyčna ŭsie 5 tysiačaŭ biblijatečnych knižak: što zhareła, što zalita vadoj. Ciapier knižny fond daviadziecca kamplektavać nanoŭ.
Zabili ŭ kramie
U tyja vychodnyja ŭ Kryčavie chavali tutejšaha žychara, zabitaha ŭ Sankt-Pieciarburzie: zajšoŭ u zvyčajnuju charčovuju kramu dy trapiŭ pad bandyckuju pierastrełku. U Pieciarburh jon pajechaŭ byŭ na zarobki: pracavaŭ na budoŭli, mieŭ niadrennyja hrošy.
Andrej Kuźmin, Kryčaŭ
Abraimaŭski vołat
Drybinski rajvykankam abviaściŭ sasnu “Abraimaŭski vołat” bataničnym pomnikam miascovaha značeńnia. Ciapier vakoł dreva zabaronienaja lubaja dziejnaść, jakaja moža jamu naškodzić. Vyšynia chvoi składaje bolš za 25 metraŭ, dyjametar stvała — 1,8 m, a vierchavina raskinułasia na płošču 30 kv.m.
“Savieckaja vioska”, Drybin
Muzyka pry śviečkach
Nastaŭniki Kraśnienskaj muzyčnaj škoły (Maładačanščyna) pryznačajuć vučniam z navakolnych viosak zaniatki ŭ “śvietłyja hadziny”, bo za niadoimki ŭ škole čas ad času adłučajuć elektryčnaść.
Aleh Rajaviec, Rajoŭka
Raniej abaroncaŭ Kurapataŭ krytykavali za toje, što jany staviać va ŭročyščy kryžy, zroblenyja ź niačesanaha j niehablavanaha dreva, z suchastoinaŭ. Kanservatyŭna-chryścijanskaja partyja BNF krytyku ŭličyła. Kryžy, jakija jejnyja siabry ŭstaloŭvajuć štosuboty ŭ časie kurapackich tałokaŭ, nie pavališ, plečukom pichnuŭšy. Dychtoŭnyja, u dva z pałovaj metry vyšynioj, zroblenyja z hablavanych sasnovych brusoŭ, amal na metar ukapanyja dy ŭmacavanyja kamianiami, jany musiać doŭha stajać. Kab kryž nia hniŭ, tuju častku, što ŭ ziamli, šmarujuć smałoj ci alivaj. Dreva siabry KCHP BNF kuplajuć na partyjnyja składki j achviaravańni. Kryžy ŭkopvajuć nie biessystemna: jany musiać utvarać Aleju smutku abapał kurapackaje darohi dy stajać nad kožnaj jamaj va ŭročyščy. U tałokach biaruć udzieł nia tolki siabry KCHP. Dałučajucca “biespartyjnyja” mienčuki, časam moładź, jakaja dziažuryć u Kurapatach. Choć u cełym frontaŭcy skieptyčna aceńvajuć dziejańni moładzi: im niepryjemna, naprykład, što šmat śmiećcia valajecca vakoł namiotu... Adnak prosiać nie nazyvać siabie. Paśla taho, što zdaryłasia ŭ aŭtorak, rabić heta nie vypadaje: 8 milicyjantaŭ u cyvilnym sarvali bieł-čyrvona-bieły ściah dy aryštavali troch chłopcaŭ i dziaŭčynu, jakija ŭ toj viečar byli va ŭročyščy. Aŭtorkavaja “Sovietskaja Biełoruśsija”, niby zahadzia pra napad viedajučy, źmiaściła na pieršaj pałasie słovy ministra transpartu Baravoha: “Usie zaŭvahi Instytutu archiealohii i prapanovy hramadzkich arhanizacyj uličanyja. Miž budaŭnikami i pradstaŭnikami hramadzkich arhanizacyj ustanaviłasia poŭnaje ŭzajemarazumieńnie”. Ramont kalcavoj darohi blizicca da kanca, i kožny ciapier imkniecca pastavić kropku ŭ historyi vakoł Kurapataŭ: ułady — svaju, abaroncy — svaju.
Kamientary