Achviary Czian Czeminia

Achviary Czian Czeminia

Siarod zatrymanych u Vilni prychilnikaŭ svabody Tybetu — aŭtarka “NN”

“Litva skača pad kitajskuju dudku”, “Vizyt kitajskaha kiraŭnika — nahoda ŭžyć siłu suprać mirnych hramadzianaŭ”, “Padčas vizitu haściej Vilnia pieratvaryłasia ŭ vajskovuju zonu” — hetkija hazetnyja zahałoŭki supravadžali pieršy aficyjny vizit u Litvu kiraŭnika Kitaju Czian Czeminia.

Vilenčukoŭ aburyła toje, što pa darohach kožnyja 50 metraŭ stajali palicyjanty, nad Vilniaj uvieś dzień kružlali hielikoptery, a palicyja zatrymlivała prychilnikaŭ svabody Tybetu — pieravažna pradstaŭnikoŭ litoŭskaj kulturnaj elity. U Vilenskim aeraporcie 20 čałaviek sprabavali mirna vykazać svoj pratest suprać palityki Kitaju ŭ Tybecie, ale byli zatrymanyja. Ściahi Tybetu palicyjanty ŭ ich adabrali. Pałovu pikietoŭščykaŭ advieźli ŭ pastarunak, a reštu prymusili sieści na ziamlu, kab ich nie było vidać z mašyny, jakaja viezła kitajskaha prezydenta.

Pobač z prezydenckim pałacam taksama razahnali mirny pikiet, a ludziej trymali ŭ “varankach” ŭvieś čas, pakul Czian Czemiń byŭ u budynku.

Siarod zatrymanych — niekalki prychilnikaŭ ruchu “Falun Gong”, zabaronienaha ŭ Kitai, — architektar Robertas Mažejkas i piśmieńnica Jurha Ivanaŭskajtie, tvory jakoj drukavalisia ŭ “NN”. Jana niekalki razoŭ naviedvała Tybet, była adnoj ź inicyjatarak letašniaha pryjezdu ŭ Litvu Dałaj-Łamy. Apošniaja kniha Jurhi pryśviečanaja Tybetu i raspaviadaje nia tolki pra tradycyi i kulturu kraju, ale i pra žorstkuju akupacyjnuju palityku Kitaju. Aficyjnaja ž Vilnia pryznaje Tybet častkaj Kitaju.

Dla Litvy vizit Czian Czeminia istotny najpierš z ekanamičnych pryčynaŭ: Litva spadziajecca ŭmacavacca na kitajskim rynku, i padzieńnie kursu dalaru spryjaje hetamu. Pakul ekspart kitajskich tavaraŭ ŭ Litvu značna pieravyšaje impart litoŭskaj pradukcyi ŭ Kitaj.

Kiraŭnik Kitaju prybyŭ ŭ Vilniu ź Iślandyi, papiarednie naviedaŭšy taksama Łatviju i Estoniju. Pavodle nieaficyjnych źviestak, Kitaj zapatrabavaŭ, kab prahrama vizytu nie paviedamlałasia ni srodkam infarmacyi, ni jakim inšym instytucyjam. Ź litoŭskimi žurnalistami prezydent Kitaju ŭvohule nie razmaŭlaŭ.

Ciapierašni skandał, dy jašče padčas pieradvybarčaj kampanii, daje niakiepskija mahčymaści palitykam. Staršynia Sojmu Arturas Paŭłaskas, jaki druhi raz vystaŭlaje svaju kandydaturu na vybarach prezydenta, zajaviŭ, što ŭrad vyśvietlić, chto addaŭ zahad zatrymlivać mirnych pikietoŭščykaŭ, bo “pravy čałavieka ŭ Litvie važniejšyja za ŭsio”.

Apazycyja (partyja kanservataraŭ) zapatrabavała ŭ Sojmie vyklikać na pasiedžańnie ministra ŭnutranych spravaŭ, kab jon daŭ tłumačeńni. Prezydent Litvy Vałdas Adamkus paviedamiŭ, što čakaje vynikaŭ słužbovaha raśśledavańnia ŭ Ministerstvie ŭnutranych spravaŭ i što palicyja pavinna prasić prabačeńnia ŭ paciarpiełych.

Taciana Pokład, Vilnia