nacyjanalizacyja
Biełarusy abvastrajuć sytuacyju
Vyšejšy haspadarčy sud admianiŭ rehistracyju pryvatnaha ŭnitarnaha pradpryjemstva “Zachad-Transnaftapradukt”. Praź jaho išoŭ na Zachad ekspart bolšaj častki rasiejskaj nafty. Naležała jano praz pasiarednika rasiejskaj kampanii “Transnaftapradukt”.
Rasieja paličyła admienu rehistacyi parušeńniem prava ŭłasnaści na abjekty mahistralnaha naftapraduktapravodu “Samara—Zachodni kirunak”, što naležać joj u adpaviednaści ź Biškieckimi pahadnieńniami 1992 h. MZS Rasiei nazvaŭ dziejańni biełaruskaha boku niezakonnymi. Adnak navat pradstaŭnik hetaha viedamstva pryznaŭ, što niama ŭsich jurydyčnych dakumentaŭ, jakija b zamacoŭvali prava ŭłasnaści Rasiei na hety naftapraduktapravod.
Amal 10 hadoŭ paśla padpisańnia Biškieckaha pahadnieńnia Biełaruś miryłasia z tym, što pa jaje terytoryi prachodziać zamiežnyja trubapravody, ad jakich jana nie atrymlivaje vialikaha zysku (pavodle acenki kancernu “Biełnaftachim”, jon moh by skłaści 20—25 młn. dalaraŭ u hod). Ciapier u biełaruski biudžet traplajuć tolki padatkovyja pastupleńni — kala 5 miljonaŭ. Adnak Biełaruś i nie pryznavała, što “naftavyja truby” źjaŭlajucca rasiejskaj ułasnaściu. Pravy na trubapravody nie byli aformlenyja nivodnaju damovaju miž krainami. Takaja niapeŭnaść nie mahła ciahnucca viečna. Zrešty, čamu ž nie? Kali na toje “palityčnaja vola”, padviešany stan moža raściahnucca na doŭhija hady.
Zatoje ŭ vypadku dalejšaj eskalacyi kanfliktu z Rasiejaj Łukašenka moža pavialičyć taryfy na transpartavańnie nafty praź Biełaruś, jakija ciapier nadzvyčaj vyhadnyja dla Rasiei. Biełaruskaja hramadzkaja dumka da takoha pavarotu padziejaŭ hatovaja.
M.B.; inf. “Kommiersant”, “Iźviestija”, radyjo “Svaboda”
Kamientary