Staršynia parlamenckaj kamisii: «Studenty chaj sami kłapociacca pra siabie»
Taki tezis utrymlivajecca ŭ adkazie staršyni pastajannaj kamisii pa adukacyi, kultury, navucy i navukova‑techničnym prahresie nakont admieny lhotaŭ hetaj katehoryi hramadzian.
«Studenty pavinny sami kłapacicca ab zabieśpiačeńni ŭłasnaj žyćciadziejnaści» — taki tezis utrymlivajecca ŭ adkazie staršyni pastajannaj kamisii pa adukacyi, kultury, navucy i navukova‑techničnym prahresie Pałaty pradstaŭnikoŭ Uładzimira Zdanoviča vykanaŭčamu dyrektaru hramadskaha abjadnańnia «Biełaruski Chielsinkski kamitet» Taćcianie Hacury na list nakont admieny lhotaŭ hetaj katehoryi hramadzian.
«Pazicyja kiraŭnika dziaržavy i deputataŭ parłamienta adnosna lhotaŭ nastupnaja: my pavinny pastupova vyklučyć navat sam termin «ilhoty». A kali chtości apynuŭsia ŭ ciažkich umovach z‑za chvaroby abo inšych abstavinaŭ, dyk biez dapamohi jon nie pavinien zastacca. U VNU i SSNU pracujuć dźvie bujnyja hramadskija arhanizacyi: BRSM i prafsajuzy. Poruč z zaachvočvańniem svaich aktyvistaŭ im nieabchodna vyjaŭlać tych, chto maje patrebu, i akazvać adrasnuju materyjalnuju dapamohu, u tym liku dla kupli prajaznych dakumientaŭ», — zajaviŭ U.Zdanovič.
«Studenty taksama pavinny kłapacicca ab zabieśpiačeńni ŭłasnaj žyćciadziejnaści šlacham častkovaj pracoŭnaj zaniataści ŭ vychadnyja i śviatočnyja dni, padčas zimovych i letnich kanikułaŭ, nie pierakładajučy ŭsie svaje prablemy na baćkoŭ i inšych hramadzian. Treba dakładna ŭrazumieć, što hrošy na lhoty nie biarucca z pavietra. Jany vymajucca z kašalkoŭ inšych pracaŭnikoŭ, jakija lhotami nie karystajucca», — havorycca ŭ adkazie U.Zdanoviča.
«U 2006 hodzie zatraty na zabieśpiačeńnie lhot pa prajeździe ŭ haradskim (pryharadnym) i mižharodnim transparcie dla ŭsich studentaŭ i navučencaŭ PTV skłali 47,8 młrd. bieł. rub., ci pryblizna 6 tys. bieł. rub. u miesiac na čałavieka. Suma niaznačnaja dla studenta i adčuvalnaja ŭ maštabach krainy. Z ulikam inšych katehoryj ilhotnikaŭ pasažyrski transpart stanovicca stratnym, a dla pahašeńnia strat rehularna pavyšajecca košt prajezdu dla asob, jakija nie adnosiacca da katehoryi lhotnikaŭ», — zaznačyŭ U.Zdanovič.
«Heta poŭny cynizm. Zarpłaty deputataŭ nieparaŭnalnyja sa studenckimi stypiendyjami. Tym nie mienš deputaty pakinuli sabie biaspłatny prajezd, a studentaŭ — pazbavili. I pry hetym jašče sprabujuć prymusić studentaŭ pracavać u vychadnyja i śviatočnyja dni. Kali studenty buduć rychtavacca da ekzamienaŭ?» — prakamientavała pazicyju parłamientaryja T.Hacura.
Pavodle jaje słoŭ, u najbližejšy čas płanujecca padrychtavać šerah mierapryjemstvaŭ, jakija, mahčyma, paŭpłyvajuć na deputataŭ Pałaty pradstaŭnikoŭ u pytańni admieny lhotaŭ studentam.
Ciapier čytajuć
Anžalika Mielnikava paśla źniknieńnia nabyła dźvie kvatery ŭ Minsku51
Kamientary