Vyklučeńnie Viačasłava Siŭčyka z šerahaŭ BNF dla starońniaha (ale nieabyjakavaha) naziralnika vyhladaje jak adzinaja prykmieta taho, što arhanizacyja jašče žyvie. Pačuŭšy nieviasiołuju navinu, ja pastaraŭsia pryhadać, što čuŭ pra BNF za hod, jaki tolki skončyŭsia. Biezumoŭna, niešta było. Pierš za ŭsio — Kurapaty. Ale ŭ kantekście, šyrejšym za akcyi pratestu, prysutnaść Frontu amal nie adčuvałasia.
BNF šmatkroć deklaravaŭ, što biarecca pradstaŭlać i adstojvać na poli palityčnaj baraćby pohlady značnaj častki hramadzian Biełarusi, dla jakich na pieršym miescy stajać nacyjanalnyja i demakratyčnyja kaštoŭnaści. Nichto z hetych ludziej nia budzie suprać zmahańnia za Kurapaty. Ale ci tym vyčerpvajecca śpis zadačaŭ palityčnaj siły, jakaja zajaŭlała pra hatovaść uziać na siabie adkaznaść za los krainy? Namahajusia zhadać artykuły ŭ presie, jakija farmulavali b pazycyju BNF pa pytańniach ekanomiki, zamiežnaj i ŭnutranaj palityki. Ničoha nie prychodzić na pamiać, akramia asabistych mierkavańniaŭ spadara Sieviarynca, jakija naŭrad ci možna razhladać jak aficyjnuju pazycyju partyi ci ruchu. Sprabuju ŭspomnić, mo niechta z kiraŭnikoŭ Frontu naviedaŭ naš horad i vystupiŭ pierad aŭdytoryjaj, aśviatliŭšy hetyja temy. Taksama nie. Užo šmat hadoŭ nia čuju ja pytańnia «A što dumaje BNF?», i 2002 hod nia staŭ pierałomnym u hetaj spravie.
U padšyŭkach, u Internecie, u siadzibie pad bieł-čyrvona-biełym ściaham na vulicy Varvašeni, biezumoŭna, znojducca dadatkovyja śviedčańni aktyŭnaści, ale dla čałavieka, što nie patraplaje ŭ vuzkaje koła aktyvistaŭ, jany nia majuć anijakaj vahi. Jak siła, što namahajecca farmavać hramadzkuju dumku, Front nie isnuje. Sama nazva BNF stałasia achviaraj palityčnych manipulacyj supraciŭnikaŭ i kankurentaŭ. Heta fakt, i mienavita pierad hetym faktam, jak možna mierkavać pa presie, nie žadaŭ skarycca spadar Siŭčyk.
Jak čałaviek starońni, ja nie mahu analizavać jahonuju nibyta raskolnickuju dziejnaść. Adnak lubyja sproby razvarušyć źletarhizavanuju arhanizacyju vyhladajuć našmat bližejšymi da statutnych metaŭ, čym samazadavolenaja maŭklivaja aŭtarkija, jakaja ŭsio hłybiej i hłybiej zasmoktvaje arhanizacyju z vajaŭničym nazovam. Žorstkaje rašeńnie Sojmu stvaraje nahodu spytacca: ci niama namieru zmahacca z hetaj chvarobaj hetak ža rašuča, jak z spadarom Siŭčykam?
Bo ciažka pavieryć, što jon pieraškadžaŭ kiraŭnictvu pisać artykuły, rehularna naviedvać rehijony, padbirać tam kadry, jakija prynamsi havaryli b biez pamyłak pa-rasiejsku i pa-biełarusku, abudžać razmovy, stvarać hlebu dla rastłumačalnaj pracy. Naŭrad ci prysutnaść Siŭčyka nie dazvalała vydavać biuleteń z materyjałami dla aktyvistaŭ i rabić zachady pa infarmacyjnym kantaktavańni z šyrejšymi kołami biełaruskaha hramadztva.
Rašeńnie Sojmu pra vyhnańnie viadomaha dziejača vyhladaje jak adčajnaja sproba kiraŭnictva zachavać raniejšy kurs napiaredadni vybarčaj kampanii ŭ miascovyja Saviety. Imknieńnie možna zrazumieć, ale znajści jamu apraŭdańnie našmat ciažej. Front nie hatovy vykarystać vybarčuju ahitacyju, bo ŭ jaho zusim stračany dośvied i mechanizm «razmovy z narodam», niama adpracavanych kancepcyjaŭ, jakija b razburali abrydły admoŭny imidž, stvarali alternatyvu demahohii partyi ŭłady. Asabliva ŭ pytańniach miascovaj ułady. Navat pry ŭmovie neŭtralitetu apošniaj, dasiahnieńni BNF buduć mizernyja adnosna ambicyjaŭ. Raźličvać ža na hetki neŭtralitet moža chiba niemaŭlatka.
Ničoha fatalnaha nie adbyłosia. Siŭčyk budzie lubić Biełaruś i pa-za šerahami BNF, a BNF zmoža praciahvać svaju dziejnaść bieź Viačasłava Siŭčyka. Varta, adnak, zaznačyć, što prychilniki niezaležnaści, biełarusizacyi, neŭtralitetu, hramadzianskich svabodaŭ čakajuć ad BNF aktyŭnaści trochi na inšym kirunku. Pakul Front nie padaje prykmietaŭ abudžeńnia, ideja rašučaha refarmavańnia arhanizacyi i navat stvareńnia novaj takoha ž kirunku nia budzie ŭsprymacca jak apryjorna varožaja vyšejzhadanym idejam.
Alaksandar Karolčyk, Horadnia
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju18
Kamientary