Žurnalistaŭ nie puścili na ŭstanoŭčy schod hramadzkaha abjadnańnia «Biełaja Ruś». Jon adbyŭsia ŭ piatnicu ŭ Teatry Muzkamedyi. Siarod zasnavalnikaŭ staličnaj arhanizacyi, jakoje nazyvajuć jašče «partyjaj Łukašenki», — Avierkaŭ i Miadźviedź.
U piatnicu ŭ stalicy prajšoŭ ustanoŭčy schod Mienskaha haradzkoha hramadzkaha abjadnańnia «Biełaja Ruś».
Napiaredadni ŭstanoŭčaha schodu jaho inicyjatary źviarnulisia da žycharoŭ horadu z zaklikam «abjadnać namahańni dla padtrymki kursu, jaki pravodzić dziaržava, dla abarony našych hramadzian ad razburalnaha ŭździejańnia «dobrazyčliŭcaŭ zvonku», spałučeńnia vopytu i viedaŭ starejšaha pakaleńnia, siły i mahčymaściaŭ maładoha». «Stvaryŭšy Mienskaje hramadzkaje abjadnańnie «Biełaja Ruś», my jašče bolš abjadnajem našy mahčymaści i pamknieńni da abarony našaj Radzimy, da jaje razvićcia, umacavańnia i ŭdaskanalvańnia». (Usio heta cytaty ź "Źviazdy")
Siarod inicyjataraŭ stvareńnia haradzkoj arhanizacyi — viadučy teleprahram ANT Alaksandar Avierkaŭ, dyrektar Teatru muzkamedyi śpiavak Alaksiej Isajeŭ, aŭtar himnu Ŭładzimir Karyzna, deputat pałaty pradstaŭnikoŭ vertykalnica Iryna Alaksanava, trochrazovy čempijon Alimpijskich hulniaŭ Alaksandar Miadźviedź.
Analahičnyja schody prajšli ŭ mnohich inšych haradach krainy pad ščylnym kantrolem čynoŭnikaŭ ź idealahičnaj vertykali.
Žurnalistaŭ Źmitra Bruška, Kiryłu Žyvałoviča i Andreja Aleksandroviča nie puścili ŭ pamiaškańnie Dziaržaŭnaha muzyčnaha teatru, dzie adbyvaŭsia schod. Sa słovaŭ Z. Bruška, im admovili na toj padstavie, što žurnalisty nia mieli akredytacyi. «Tam prysutničała ledźvie nie ŭsio čynavienstva ź idealahičnaha adździełu Mienharvykanamu» — kaža žurnalist «Biełhaziety». Jon kaža, što chtości z čynoŭnikaŭ i vyklikaŭ milicyjantaŭ.
Supracoŭniki milicyi vyklikali dadatkovuju mašynu, kab advieźci zatrymanych u RUUS, adnak pačuŭšy, što tyja telefanujuć kaleham, admovilisia ad svaich namieraŭ.
Kamientary