| FOTA IREX-PROMEDIA |
Šykoŭnych aŭto ŭ krainie niašmat. Bolšaść prestyžnych mašynaŭ zarehistravanyja ŭ Miensku: 79% «jahuaraŭ» (usiaho ich u krainie ciapier 136), čverć «porše» (usiaho ich 134), 65% «linkalnaŭ» (49), 22 z 38 «kadyłakaŭ», treciaja častka «džypaŭ» dy 42% «łend-roveraŭ» (139).
Štohod biełarusy nabyvajuć nia bolš za 80 aŭto, jakija kaštujuć bolš za 50 tys. dalaraŭ, kala 300 pa canie ad 25 da 50 tysiačaŭ dy prykładna 600 za 12—22 tys. dalaraŭ. Astatnija novyja lehkaviki (kala 2 tysiačaŭ) razychodziacca za 10—12 tys. dalaraŭ.
Bolšaść mašynaŭ, jakija traplajuć u Biełaruś, užo 7—10 hadoŭ kruciać kilametry na ličylniku. Na druhim miescy siarod zarehistravanych aŭto — 4—6-hadovyja. Ale aŭtaamatary bolš nia honiacca za vielmi ŭžo tannym «tavaram». U 2002 h. kolkaść aŭtamabilaŭ, vypuščanych da 1990 h., źmienšyłasia proci 2001 h. na 10%.
Vialikaja kolkaść mašynaŭ rasiejskaj vytvorčaści ŭ Biełarusi nia śviedčyć pra ich papularnaść. Heta prosta «spadčyna» savieckich časoŭ. Najbolš jaje zastałosia va ŭschodnich rehijonach. Hetak, u Homielskaj dy Viciebskaj abłaściach na tysiaču čałaviek prypadaje 48 «žyhuloŭ» dy «ładaŭ» (u Haradzienskaj — 39, Bieraściejskaj — 34). Hetym Biełaruś adroźnivajecca ad Rasiei, dzie dahetul 83% lehkavikoŭ — rasiejskija.
| FOTA IREX-PROMEDIA |
Kali ŭ Miensku ŭsie marki niamieckich aŭtamabilaŭ pradstaŭlenyja davoli šyroka, dyk pa-za stalicaj bahata chiba niedarahich «falksvahienaŭ» dy «aŭdzi». Pahladzim pa markach: najlepš zabiaśpiečany «falksvahienami» Miensk — 23 aŭtamabili na tysiaču čałaviek, najhorš — Mahiloŭščyna — 12 na tysiaču. Sytuacyja z «aŭdzi» nia duža adroźnivajecca: Miensk — 14 na tysiaču, Mahiloŭskaja vobłaść — 7 na tysiaču. Z darahimi markami ŭsio inakš: Miensk maje 6 «BMV» na tysiaču žycharoŭ, a Mahiloŭskaja vobłaść — tolki 1,8. Najmienš «mersedesaŭ» u žycharoŭ Bieraściejščyny (0,8 na tysiaču čałaviek), u mienčukoŭ — 7,4 na tysiaču. Kali stalica zabiaśpiečanaja «falksvahienami» dy «aŭdzi» lepš za pravincyju ŭ 2 razy, dyk «BMV» — u 3, a «mersedesami» — u 7 razoŭ.
Zdarajucca j nievytłumačalnyja kurjozy: na Homielščynie skancentravanyja amal usie amerykanskija «ołdsmabili» (142 z 176), tady jak u inšych abłaściach ich ad siły pa štuk piać, navat u Miensku tolki 23. Mašyny nierasiejskaj vytvorčaści, jakich u stalicy značna mienš, čym u pravincyi, — heta ŭkrainskija «Zaparožcy» dy «Taŭryi».
Vynošvajučy plany stvareńnia «narodnaha lehkavika», Hitler naŭrad ci dumaŭ, što toj zrobicca narodnym u Belarusland. Tym nia mienš, siońnia «falksvahien» — samy zapatrabavany aŭtamabil u Biełarusi, asabliva — u stalicy, dzie zajmaje druhoje pa kolkaści miesca paśla «žyhuloŭ». Praŭda, kali ŭ 2001 h. «falksvahienaŭ» u nas paboleła na 22937 aŭto, dyk u 2002 h. prytok źmienšyŭsia da 18059.
U žniŭni 2001 h. Alaksiej Vahanaŭ, kiraŭnik rasiejskaj kampanii «Łada-OMS», vioŭ pieramovy z kiraŭnictvam kancernu «Falksvahien», spadziejučysia naładzić u Biełarusi na byłym zavodzie «Ford-Junijon» u Abčaku zborku «škodaŭ» (hetaja českaja firma naležyć niamieckamu kancernu). Planavali źbirać dźvie madeli «škodaŭ» — «Fabija» dy «Aktavija», cana na jakija musiła skłaści 6—7 tysiačaŭ dalaraŭ.
Hetaja, treciaja pa liku, sproba naładzić vyrab «škodaŭ» u Biełarusi (pieršuju zrabiła firma «Puše», druhuju — niamiecka-biełaruskaja firma «Bieł-Fer») taksama była niaŭdałaj. Čaćviortuju namahaŭsia ździejśnić sam Łukašenka letaś u listapadzie padčas samitu NATO ŭ Prazie, adnak jaho nie puścili nia tolki na zavod «Škody», ale i ŭ samu Prahu.
Kali paraŭnać, na kolki pavialičyłasia kolkaść aŭtamabilaŭ taje ci inšaje marki ŭ paraŭnańni ź minułym hodam, vyjdzie, što najbolš enerhična na naš rynak prasoŭvajecca «Seat». Pryrost aŭto hetaj marki skłaŭ 55,9%. Za im iduć «Reno» (29,3%), «Ford» (13,2%) dy «Aŭdzi» (12,1%). «Falksvahien» sa svaimi 11,9% tolki na 5-m miescy. A ŭžo za im — «Fijat» — 11%, «Mazda» — 6,6%, «BMV» — 5,9%, «Maskvič» — 2,6% dy «Zaparožcy» z «Taŭryjami» — 2,2%.
Kolkaść zarehistravanych «mersedesaŭ» letaś źmienšyłasia na 8108 (17,6% svajho «parku» ŭ Biełarusi). Hetyja darahija aŭtamabili masava vyvoziacca ŭ Rasieju, jakaja pačynaje zabyvacca pra defołt. Dahetul na «mersedesie» jeździć kožnaja sotaja biełaruskaja siamja. Amal usie aŭtamabili amerykanskich marak («šeŭrale», «dodž», «ołdsmabil», «plimut», «kadyłak», «merkjury», «pantyjak») taksama zhubili ŭ kolkaści. Ale ich i raniej było niašmat.
Samaja redkaja mašyna ŭ krainie — italjanskaja «inačenci». Ich bolš nie vypuskajuć, bo hetuju firmu «prahłynuŭ» «Fijat». U 2001 h. u Biełarusi było 7 aŭto hetaj marki, na 1 studzienia zastalisia tolki 2: adna — u Mahiloŭskaj vobłaści, druhaja — u Bieraściejskaj.
Pryvatnyja hruzaviki, aŭtobusy
Pavoli raście kolkaść hruzavikoŭ u pryvatnym karystańni. Na 1 studzienia ich było 58463 (hetaja kolkaść vyrasła na 3,7%, tempy rostu paskorylisia ŭ paraŭnańni ź minułym hodam). Haspadary — u asnoŭnym pradprymalniki. A voś «niedziaržaŭnych» aŭtobusaŭ u Biełarusi pamienieła na 2400. Ciapier ich 10235 suprać 31024 aŭtobusaŭ, što naležać pradpryjemstvam dy ŭstanovam.
Pa čym dziaržava nikoli nie dahonić našych aŭtaamataraŭ, dyk heta pa kolkaści matacykłaŭ i mataroleraŭ, jakich u pryvatnym karystańni ŭ 44 razy bolš (514191 proci dziaržaŭnych 11674).
Aleś Kudrycki
Cuadnosiny lehkavikoŭ rasiejskaj i nierasiejskaj vytvorčaści
(aŭtamabili biaź źviestak pra vytvorcu nia ŭličvalisia)
Lehkaviki Staić na ŭliku ŭ Biełarusi
na 01.01.2002 h. na 01.01.2003 h.
Lehkaviki rasiejskaj vytvorčaści 658.061 (47%) 661.065 (45%)
Lehkaviki nierasiejskaj vytvorčaści 742.304 (53%) 800.556 (55%)
U časie padrychtoŭki vykarystanaja statystyka «Aŭtabiznes—Weekly».
Kamientary