Čamu ja vieru ŭ Buša
Što b ni kazali pacyfisty, niama ŭ sučasnym śviecie bolšaha paskudy, čym toj, čyju statuju zrynuli ŭ sieradu bahdadcy. Mo dzie ŭ Afrycy chiba, dzie žyćcio idzie pavodle niezrazumiełych nam zakonaŭ. Sadam zahubiŭ sotni tysiač žyćciaŭ. Atakavaŭ Iran, Kuvejt, Izrail, kurdaŭ. Niama druhoj takoj krainy, jakaja b za apošnija 25 hadoŭ stolki napadała na susiedziaŭ. Jon adziny z kiraŭnikoŭ dziaržavaŭ, chto za apošniuju čverć stahodździa ŭžyŭ chimičnuju zbroju (unutry krainy i za miažoj). Jon adzin z čatyroch ci piaci, što raspracoŭvali atamnuju bombu.
Sadam zahubiŭ u dziasiatki razoŭ bolej ludziej, čym zahinuła ŭ ciapierašniaj vajnie. U Chałabdžy — piać tysiač žančynaŭ i dziaciej zamaryŭ za adzin dzień. U nas u Kurapatach za čatyry hady pakłali 30 tysiač — i nacyja dahetul nia moža adyści ad žachu. A tam za dzień — piać tysiač.
Buš sapraŭdy nie cyrymonicca z vorahami zachodniaj cyvilizacyi. Ich prablema, što jany abvieścili Zachadu vajnu. Nie abviaščali b — nia stali b vorahami.
Dobra vyhladajuć ciapierašnija pacyfisty ŭ biełych palčatkach, jakija čatyry hady tamu plaskali ŭ dałoni Klintanu za Kosava. Što, tady nie razumieli sutnaści amerykanskaj palityki? Ci mo ciapier nie razumiejuć nacyjanalnych intaresaŭ Biełarusi? Nia bačać dalej za ŭčora i zaŭtra.
Tak, vajna — heta biada. Serca ściskajecca ad biaśsilnaha bolu, kali bačyš skalečanych irackich dziaciej. Ale Chusejn u lubym razie zahubiŭ by bolej, kali b zastaŭsia pry ŭładzie. Pakińma rachunki sumleńnia Bohu, nia nam ich źličać.
Ameryka dla Biełarusi — susied našaha susieda, Rasiei. Tak było pazaŭčora i budzie pazaŭtra. Vojny minucca, a Biełarusi ŭsio adno pryjdziecca šukać apory ŭ Amerycy.
Vy kažacie, što vajna nia vyrašyć prablemaŭ Iraku, što Ameryka nia zdoleje demakratyzavać krainu? A voś jašče pabačym. Klintan i Sadama nia skinuŭ by.
Barys Tumar
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary