15 krasavika byŭ zaćvierdžany śpis naminantaŭ na sioletniuju «Rok-karonu» i stvorany Statut Karanacyi — praviły adboru kandydataŭ na pryzy.
Pavodle ich, hałoŭnuju karonu ciapier nia moža atrymać supolny prajekt ci kampilacyja — ni zborniki BMA, ni «Personal Depeche» pieramožcami ŭ naminacyi «Vykanaŭca hodu» nia stanuć. Navat «Balady» Źmitra Vajciuškieviča ŭ śpis nia trapili.
Va ŭsich asnoŭnych naminacyjach fihuruje Lavon Volski. Na hałoŭny pryz pretendujuć «NRM», «Krambambula» i «Pałac», na albom hodu — «Dom kultury» «NRM», «Žuravy» «Trojcy» dy «Čužyja dzieŭki» «Pałacu», na «Najlepšy klip hodu» — «Absent» «Krambambuli», «Junosť» «Lapisa Trubiackoha» i «Kałychanka» Sašy ź Sirožam.
Naminanty na «Pieśniu hodu» musili mieć pastajannuju ratacyju ŭ FM-etery — hučać choć ciaham dvuch tydniaŭ raz na dzień. Tamu vybar byŭ nievialiki: «Absent» («Krambambula»), «Lampa» («Impet») i «Veb-dyzajn» («J-mors»).
«Personal Depeche» maje šancy tolki ŭ naminacyi «Pradusar hodu». Tut Chaładzinski, Makaraŭ i Starpovič — stvaralniki «našych depešaŭ» buduć spaborničać z Hannaj Volskaj, pradusarkaj «Krambambuli», i Arynaj Viačorkaj—Vitalom Supranovičam, što zrabili javaj «Lehiendy Vialikaha Kniastva». «Padzieju hodu» addali biez varyjantaŭ Pieršamu muzyčnamu kanału.
Nia budzie sioleta naminacyjaŭ «Rok-kniazioŭna» i «Muzyka hodu», jany vyčarpali siabie. Zatoje ŭručać pryz najlepšamu rehijanalnamu vykanaŭcu. U naminacyju «Adkryćcio hodu» viadomyja muzyki ciapier dapuskacca nie buduć. Ni «Krambambula», ni Pamidoraŭ ź «Śviatam pakradzienym», ni «Harackija» Pita Paŭłava šancaŭ tut nia majuć.
Ci reanimujuć novyja praviły samy bujny rok-fest — pabačym 25 krasavika ŭ KZ «Miensk».
Siarhiej Budkin
Biełarusy sustrakajuć vyzvalenych palitviaźniaŭ u Vilni FOTY i VIDEA2
Kamientary