Kraina paśla tyrana

Pakul Biełaruś pavoli pahružajecca ŭ śviatočny viasnovy odum, pakul katalicki Vialikdzień płaŭna pierachodzić u pravasłaŭny, pakul Łukašenka lichamankava rychtuje seminary pa idealohii j vajskovyja vučeńni, a apazycyja zamiraje ŭ čakańni amerykanskaha Aktu ab demakratyi — zhasłaja vajna ŭ Iraku sastupaje miesca chvaravitamu stanu «paśla tyrana».

Cudoŭnaje vyzvaleńnie z efektam raptoŭnaha źniknieńnia režymu ŭražvała nas jašče ŭ Čechii ŭ 1989-m, u Baŭharyi ŭ 97-m, u Serbii ŭ 2000-m. Bahdad u hetym sensie mała roźnicca ad Białhradu. Tamu ŭ apošnija tydni mienavita Irak biez Chusejna zastavaŭsia najcikaviejšaj dy najbolš pakazalnaj dla Biełarusi navinoj. Siadziš pierad teleekranam, mižvoli ŭjaŭlaješ zamiest irakcaŭ biełarusaŭ i dzivišsia: niaŭžo i našaje «paśla Łukašenki» budzie padobnym?

Skidańnie pomnika? Kalakin budzie suprać, ale Lenina na płoščy Niezaležnaści zrynuć pad pieramožnyja vokličy j ź vialikim zadavalnieńniem paskačuć na pavieržanym stodzie. Maradziorstva? U natoŭpach moładzi, jakija jaŭna buduć bić šyby va ŭradavych ustanovach, znojdziecca niamała achvočych da kamputaraŭ i trafejaŭ nacyjanalnaha Alimpijskaha kamitetu. Čerhi pa humanitarku? U najlepšych tradycyjach «rynkavaha sacyjalizmu», razdača chalaŭnych kanservaŭ, šprycaŭ dy second hand (jak i handal tymi kanservami) pojdzie «na ŭra». Stychijnyja mitynhi niezadavolenych z patrabavańniem vady, śviatła, hazu, chleba j vidoviščaŭ? Vielmi vierahodna. Svarki lideraŭ apazycyi nakont taho, chto tut hałoŭny zmahar za demakratyju? Naturalova! Napeŭna, usio heta prosta niepaźbiežna.

Ale čaho b vielmi nie chaciełasia — kab pry hetym vulicy Miensku patrulavali žaŭniery ź dźviuchhałovym arłom, kab «hospoda oficiery» vyhrabali z kasaŭ pački niepatrebnych «zajčykaŭ» na suveniry, kab apazycyjnyja partyjcy na vulicach pili z tankistami na brani «za demakratyju, za Pucina», a jakaja-niebudź «časovaja» administracyja vinšavała b hramadzianaŭ Biełarusi ź źviaržeńniem nienavisnaha dyktatara j abiacała poŭnuju biaśpieku ŭ ramkach statutu AAN i kanstytucyi Rasiejskaj Federacyi...

Kińcie! Ni Zachad, ni Ŭschod Biełarusi nia zbaviać. Heta Eŭropa, a nie Irak. I choć sioleta nacyjanalny ruch vyhladaje jak nikoli słabym dy raźjadnanym, šlach u nas pa-raniejšamu zastajecca adziny. Ciažki, pakutny, dy svoj.

Pavał Sieviaryniec

• 0
• 0
• 0
• 0
• 0
• 0
• 0
• 0