«Trojca» — realny pretendent

Pieramožcy ŭ naminacyjach «Rok-karanacyi» buduć vyznačanyja pavodle novaj systemy padliku hałasoŭ. Intryha zachavajecca litaralna da samaha pačatku cyrymonii, nichto hetym razam nia zdoleje źvinavacić arhanizataraŭ apytańnia ŭ machlarstvie.

U asnovie novaj systemy — fakt vydańnia na praciahu minułaha hodu prahramy nakładam nia mienš jak 300 asobnikaŭ dla CD ci 500 — dla MC. Mahčyma, ličbu varta było b i padniać. Dva dziasiatki žurnalistaŭ atrymali ankiety, u jakich musili ŭ kožnaj z naminacyjaŭ vyznačyć 3 ci 5 najlepšych, na ich dumku, vykanaŭcaŭ. 15 krasavika adbyŭsia pieršy tur hałasavańnia i byli vyznačany naminanty (ich «NN» nazvała ŭ papiarednim numary).

Paśla ŭdzielniki apytańnia musili ŭ kožnaj z naminacyj vyznačyć tolki adnaho pieramožcu. Ich adkazy ŭ zaklejenych kapertach pieradali ŭ arhkamitet. Jaho siabry ŭ prysutnaści pradusera «Karanacyi» Jurja Cybina za try hadziny da pačatku cyrymonii i zrobiać kančatkovy padlik. Try hadziny patrebnyja, kab padrychtavać hanarovyja dyplomy. Nia vyklučana, što ŭ niekatorych z naminacyjaŭ moža być i nie adzin pieramožca.

Varažyć na małace — nie najlepšy zaniatak. Adnak u naminacyi «Vykanaŭca hodu» intryha jość. «NRM» užo dvojčy karanavałasia hałoŭnym pryzam, a voś «Trojca» — ani razu. Hety momant moža spracavać, choć i «Krambambulu» jak samastojny kalektyŭ śpisvać z rachunku nia varta.

Na «Albom hodu» pretendujuć čatyry kalektyvy. U «Čužych dzievak» «Pałacu» šancaŭ krychu mienš, čym u inšych, choć «Pałac» taksama nikoli nie adznačaŭsia hałoŭnaj karonaj.

A voś u naminacyi «Pradusar hodu» intryhi amal niama: prajekt «Personal Depeche» i niečakany, i aryhinalny, i ŭvasobleny na niabačanym u Biełarusi ŭzroŭni. A toje, što pradusary albomu «Lehiendy Vialikaha Kniastva» A.Viačorka i V.Supranovič trapili ŭ naminanty, havoryć nia tolki pra sapraŭdy ŭdały prajekt, ale j adnačasova pra toje, što instytut pradusarstva ŭ nas raźvity nadzvyčaj słaba. Pretendentaŭ u hetaj naminacyi było mała.

«Pieśnia hodu»: poŭnaja niepradkazalnaść. Mnie «Web-dyzajn» ad «J-morsu» padajecca słabiejšaj pazycyjaj u paraŭnańni z «Absentam» «Krambambuli» j «Lampaj» «Impetu». Na «Adkryćcio hodu» pretendujuć hurty «J-mors», «Kukły» i «Čechaŭ». Mocnuju kankurencyju skłaŭ by im duet «Svet&Al», ale pieršy ich albom vyjšaŭ nakładam, mienšym za patrebny dla naminavańnia na karonu, a druhi možna zdabyć tolki ŭ aŭtasalonie «Liberci motarz» razam ź jakim-niebudź novym «fordam». Siarod trojki naminantaŭ pieravahu addaju «Kukłam», choć nie ŭchvalaju niekatorych leksyčnych zvarotaŭ ź ich piesień. Mocnaj nienarmatyŭnaściu vyznačajecca i tvorčaść pretendentaŭ u naminacyi «Najlepšy rehijanalny vykanaŭca», siarod jakich mnie spadabałasia hrupa «Rasta». Adnak i tut vialikaha vybaru nie było.

«Klip hodu»: najbolš udała tut moža «strelić» «Kałychanka» ad Sašy i Sirožy. Źjaŭleńnie hetaj naminacyi niepasredna źviazana z adkryćciom Pieršaha muzyčnaha kanału (pieramožca ŭ «Padziei hodu») i viartańniem klipaŭ ajčynnych muzykaŭ na BT.

Kali praktyka paćvierdzić słušnaść pryniataj systemy vyznačeńnia pieramožcaŭ, kolkaść udzielnikaŭ apytańnia naleta pavialičycca, jak i kolkaść naminacyjaŭ. Adbudziecca toje ci nie — vyznačyć rynak. Inakš kažučy, najaŭnaść novych vydańniaŭ, jakich chočacca pažadać usim vykanaŭcam, a taksama tym ludziam, jakija narešcie zrazumiejuć, što ŭkładać hrošy ŭ biełaruski muzyčny biznes — sprava zusim nie bieznadziejnaja.

Źmicier Padbiareski

• 0
• 0
• 0
• 0
• 0
• 0
• 0
• 0