Nu i atrymali na arechi ŭradavyja ekanamisty 20 traŭnia! U Mižnarodnym adukacyjnym centry (IVV) adbyłasia kanferencyja «Ekanamičnaja transfarmacyja ŭ Biełarusi i rola mižnarodnych donarskich arhanizacyjaŭ». Dziela taho što pieršaha ŭ krainie amal nie nazirajecca, druhoje, adpaviedna, taksama źviedzienaje da nula. Tak što kanferencyja mieła charaktar paradaŭ dla ŭradu z šmatlikimi «patrebna, varta, pažadana».
Dźvie dušy biznesu
Pavał Danejka, prezydent Instytutu pryvatyzacyi dy menedžmentu (IPM), raspavioŭ pra «fenomen pradpryjemstva» ŭ biełaruskaj ekanomicy. U nas dahetul niama sapraŭdnych firmaŭ dy kampanijaŭ — spres pradpryjemstvy. Im ułaścivaja nieefektyŭnaja praca dy ŭnutranaja karupcyja. Było b paŭbiady, kali b karupcyjaj arhanizavana zajmaŭsia ŭvieś menedžment, — dyk nie, kraduć asobnyja kiraŭniki. Miežy pradpryjemstva razmytyja, mnostva resursaŭ, jakimi jano karystajecca, nie naležać jamu farmalna. Tamu jaho ciažka akreślić, acanić i pradać.
Pavodle słovaŭ Paŭła Danejki, u Biełarusi najmacniejšaja ŭ SND padtrymka pryvatnaha biznesu siarod nasielnictva. Šmat chto tut žadaje raspačać svaju spravu, ale nia moža pierastupić unutrany barjer. Biełaruski biznes — biznes pesymistaŭ. Jon maje dva maralnyja ŭzroŭni, dźvie dušy.
Reformy
Niejak ministar finansaŭ Korbut paabiacaŭ syści ŭ adstaŭku, kali niechta prapanuje biezdeficytny biudžet. Jarasłaŭ Ramančuk, prezydent Centru Mizesa, zaklikaŭ ministra «padmacavać zajavu realnymi dziejańniami» i prezentavaŭ prajekt biezdeficytnaha biudžetu, roŭnaha 3,2 młrd. dalaraŭ — stolki patrebna, kab urad «nie padniali na viły».
IPM prapanuje zakanadaŭča zamacavać normu biezdeficytnaha biudžetu, bo deficyt raźviazvaje ruki karupcyjaneram. Pradstaŭniki Ministerstva ekanomiki duža aburylisia hetaj prapanovaj — maŭlaŭ, biudžet farmujuć zakony rynku, a nie dziaržavy.
Zmahacca ź inflacyjaj IPM prapanuje, pryviazaŭšy biełaruski rubiel da eŭra dy fiksujučy abmienny kurs, pakul inflacyja nia źnizicca da 5%.
Raŭnieńnie na monstra
Čamu reformy nia ruchajucca? Danejka adkazvaje: «My dahetul paŭsiudna nazyvajem Biełaruś «respublikaj». Pakul nie pačniom nazyvać jaje krainaj, być adkaznymi za jaje, pra reformy dumać nia varta».
Alaksandar Sasnoŭ, kandydat ekanamičnych navukaŭ, namieśnik dyrektara Niezaležnaha instytutu sacyjalna-ekanamičnych i palityčnych daśledavańniaŭ, byŭ jašče bolš rezki: «Čaho my biarom hetaha monstra — Rasieju — i sprabujem raŭniacca ź im? Čamu nie biarom susiednija krainy — Polšču, Litvu?»
Miljard budučamu ŭradu
Pra pracu donarskich arhanizacyjaŭ raspaviali kanspektyŭna. Dyj što pra jaje kazać, kali taja dapamoha składaje tolki 0,74% ad VUP krainy. Horš za nas chiba Turkmenistanu. Kali b urad pravodziŭ reformy, taja dapamoha była b u 3-4 razy bolšaj i ciaham piaci hadoŭ mahła b skłaści kala miljarda dalaraŭ.
Imprezu naviedaŭ i amerykanski ambasadar Kozak. Jon uśmichaŭsia, piŭ minerałku, a ŭ časie ekskursaŭ u nietry fiskalnaj palityki pakrysie pačaŭ dramać. Paśla kanferencyi ambasadar pajechaŭ padjeści ŭ susiedni «Makdonaldz». Vidać, nastalhija.
Aleś Kudrycki
Ciapier čytajuć
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty10
Kamientary