Ułady: kali budynku liceju da 25 žniŭnia nie adramantujuć, liceistaŭ vypraviać vučycca ŭ čatyry roznyja navučalnyja ŭstanovy. Baćki: 1 vieraśnia navučency razam z baćkami pryjduć da budynku liceju.
9 lipienia Mienharvykankam pryniaŭ pastanovu pra ŭtvareńnie Mienskaha haradzkoha humanitarnaha liceju. Pavodle słovaŭ namieśnika ministra Kazimiera Faryny, tudy budzie prapanavana pierajści ŭsiamu vykładčyckamu kalektyvu. Adnak u tym razie, kali budynak na vuł.Kirava, 21 nie paśpiejuć adramantavać da 25 žniŭnia, liceisty pačnuć novy navučalny hod "na inšych placoŭkach": 4-y kurs - u licei BDU, 3-i - u himnazii №9, 2-i - u himnazii №23, 1-y - u himnazii №4.
Ułada pieraśleduje try mety. Pa-pieršaje, raściarušvajecca dziciačy kalektyŭ, źnikaje supolnaść dziejańniaŭ, što tak napałochała čynoŭnikaŭ padčas vuličnych akcyjaŭ u červieni. Pa-druhoje, ciapierašni pedkalektyŭ liceju zastajecca "pa-za hulnioj". Sapraŭdy, ci ž zručna budzie vykładčyku pračytać pieršuju lekcyju ŭ himnazii №4 u Kuncaŭščynie i patrapić na druhuju ŭ himnaziju №23 na płoščy Jakuba Kołasa? Značyć, zaniatki ŭ navučencaŭ buduć vieści inšyja vykładčyki… Pa-treciaje, źniščajecca niepaŭtorny "licejski duch".
Ani baćki liceistaŭ, ani sami navučency nia majuć namieru mirycca z takim parušeńniem ichnaha prava na adukacyju. "My majem prava vybirać ustanovu adukacyi. Kali našych dziaciej biaz našaha viedama pieraviaduć u inšuju škołu i parušać hetym Zakon, my budziem padavać u sud", - kazali baćki na schodzie. Pakul ža było vyrašana, što 1 vieraśnia navučency razam z baćkami pryjduć da budynku liceju.
bArkadź Šanski
Kamientary