Studzieńskija tezysy

Nie padzialaju tryvohi niekatorych analitykaŭ nakont permanentnaj aŭtarepradukcyi demakratyčnych blokaŭ-kaalicyj.

Dla šarahovaha praletaryja pieradvybarčaja kampanija — šaniec padzarabić, kab prynieści ŭ siamju čupa-čups. Čym bolej kandydataŭ, tym bolšy popyt na jaho pasłuhi.

Dla rynku elektaralnych pasłuh na vybarach 2004 h. buduć ułaścivyja nastupnyja tendencyi. Pa-pieršaje, Paša Sieviaryniec padbivaje moładź, jakaja zvyčajna padnosiła darosłym transparanty, samoj iści na vybary. Jaho parol «Kožny rasklejščyk ścikieraŭ moža być deputatam» zdolny abudzić ambicyi častki menedžeraŭ siaredniaha źviana i vyklikać turbulacyi ŭ hetym sektary pracoŭnaha rynku.

Pa-druhoje, jość niebiaśpieka, što bolšaść palitykaŭ budzie namahacca vykarystoŭvać u svaich kamandach madel palityčnaha markietynhu, jakuju «Zubr» źlamziŭ u «Hierbałajfu». Vałancioram prapanujuć spaborničać mižsobku za indyvidualnyja bonusy, jak praviła, pejdžer. Hetaja taktyka nakiravana na padryŭ kalektyŭnaj śviadomaści.

Biełaruskija levyja pavinny stać na abaronu pravoŭ takoj katehoryi ekspluatavanych, jak vałanciory. Džob vałanciora vielmi niabieśpiečny. U ekstrymie nie sastupaje prafesijam źbivalnika ledziašoŭ z dachaŭ i dyrektara MTZ.

Nam patrebny adziny nacyjanalny prafsajuzny centar, naprykład, «Ahulnabiełaruski syndykat vałancioraŭ «Klasavaja vajna». Abaviazkovy kurs seminaraŭ «Što takoje Suśvietnaja arhanizacyja pracy?», «Čamu my śviatkujem 1 Traŭnia». Paśla na kurułtai pradstaŭnikoŭ kamand kandydataŭ treba vypracavać svaje patrabavańni i zaklučyć z palitykami hieneralnuju taryfnuju damovu. Kandydaty buduć zalivać pra ciažki finansavy stan, zaprapanujuć paharbacić zadarma, u imia ideałaŭ klatvy ŭ zali dla hulni ŭ miač. Nia viercie.

Vybivajcie abaviazkovyja padarunki da dnia Aršanskaj bitvy, specadzieńnie dla abchodčykaŭ kvater, «kalosy» dla reperaŭ-hraficistaŭ. Vuličnym zborščykam podpisaŭ — chalaŭnaje piva za škodnaść. Abaviazkova abhavaryć harantyi dapamohi ŭ vyniku zatrymańnia — advakat, bauł. U vypadku imihracyi — falšyvy rasiejski pašpart na imia Barysa Niamcova.

Pracadaŭcy mohuć pajści na stvareńnie žoŭtaha prafsajuzu, łakaŭty i vykarystańnie tannych štrejkbrechieraŭ z «Žanočaj kalicyi». Tamu nia vyklučany varyjant strajku. Asabliva efektyŭny h.zv. italjanski strajk, sens jakoha — ciahnuć vałynku. Hadzinami možna afarmlać padpisny listok abo kvasić u tavaryša. Na pytańnie kandydata, dzie byŭ, adpavieści: «Abižaješ, Statkievič... za Eŭropu ža-a a-a-ahitavaŭ. Ik».

Viaršynia sacyjalnaj baraćby — akupacyjny strajk z zachopam usich srodkaŭ vytvorčaści — pamiaškańniaŭ, prynteraŭ, kamputaraŭ... Paśla vałanciory pačynajuć samastojna kiravać pradpryjemstvam — vystaŭlajuć na vybary kandydata ad svajho pracoŭnaha kalektyvu i robiać jamu kampaniju. U vyniku pieramohi možna stvaryć u pałatcy cełuju frakcyju.

I, naturalna, nie zabyvajciesia pra dośvied amerykanskich prafsajuźnikaŭ 20-ch, jakija šmat čaho damahlisia dziakujučy kaaperacyi z Al Kapone.

Pośpiechaŭ u klasavaj baraćbie, darahija tavaryščy.

Lolik Uškin

• 0
• 0
• 0
• 0
• 0
• 0
• 0
• 0