22 sakavika na Kastryčnickaj płoščy Miensku praciahvajecca akcyja pratestu, u jakoj biaruć udzieł kala tysiačy čałaviek. Na płoščy staić 20 namiotaŭ, šmat ježy, pracuje prybiralnia. Usie padychody j padjezdy da płoščy kantralujuć supracoŭniki milicyi, jakija praviarajuć sumki ŭsich minakoŭ, što kirujucca da namiotavaha haradku. A čaćviortaj hadzinie ranicy pierad udzielnikami pratestu vystupiŭ Uładzimier Kołas. Z Kastryčnickaj płoščy pieradajuć našy karespandenty.
4:40
Stajańnie na Kastryčnickaj płoščy praciahvajecca, praciahvajecca dyskateka, ludzi słuchajuć kampazycyi ukrainskich i biełaruskich rok-hurtoŭ. U adnym ź pierapynkaŭ pamiž kampazycyjami vystupiŭ staršynia Rady biełaruskaj intelihiencyi Ŭładzimier Kołas, jaki skazaŭ mitynhoŭcam: "Vinšuju vas i liču, što my znachodzimsia ŭ lepšym miescy Biełarusi, bo tut naradžajeccca jaje budučynia. Treba stajać da kanca, i my pieramožam". Jak prykład hetaha sp. Kołas pryvioŭ dziejnaść jaki ŭžo niekalki hadoŭ zabaronieny ŭładami, ale tym nia mienš isnuje. Pramova Ŭładzimiera Kołasa była karotkaja, ale była vielmi pryjazna ŭspryniataja ludźmi.
Na hety momant udzielniki akcyi dobra zabiaśpiečanyja charčami i adzieńniem.
3:40
Udzielniki mitynhu zrabili vyłazku pa vadu.
U lahiery ŭdzielnikam pratestu nie chapaje kipieniu i vady dla pryhatavańnia harbaty i kavy. Milicyja zvyčajna nie dapuskaje da mitynhoŭcaŭ ludziej, jakija pryvoziać u lahier termasy z vadoju i haračuju ježu.
A pałovu na čaćviortuju načy vialikaja hrupa vyrašyła zrabić ułasnuju vyłazku, kab pryvieźci kipień dla haračych napojaŭ. Kala 40 ŭdzielnikaŭ akcyi pratestu adździalilisia ad asnoŭnaj hrupy ź miesca, dzie adbyvajecca mitynh, i vialikaj hrupaj nakiravalisia da taksi, kab paźbiehnuć zatrymańnia. Milicyja sačyła za hetaj vyłazkaj, ale nikoha nie zatrymała - praz dvaccać chvilinaŭ jany viarnulisia na taksi z vadoju.
Na płoščy praciahvajecca impravizavanaja dyskateka, moładź staić u kołach vakoł namiotaŭ, vykrykvaje lozunhi "Chočam, možam, pieramožam!"
A.Milinkievič časova adsutničaje na płoščy, ale abiacaŭ źjavicca a pałovie na šostuju hadzinu ranicy.
02:30
Nie hledziačy na niezvyčajny dla hetaj pary hoda maroz (kala minus 10 hradusaŭ), zvyš tysiačy čałaviek pa-raniejšamu znachodziacca na Kastryčnickaj płoščy. Ludzi razumiejuć, što toj, chto pakinie płošču, moža być adrazu zatrymany.
Vakoł namiotavaha haradku paŭkołam vystaŭleny śviečki. Uziaŭšysia za ruki, ŭdzielniki akcyi praviali supolnuju malitvu. Navat zaraz, pasiaredzinie nočy, uvieś čas čuvać lozunhi "Žyvie Biełaruś", "Razam", "Zastajemsia"! U haradku pa-raniejšamu znachodzicca Alaksandr Milinkievič z žonkaj i starejšym synam. Tam i znakamitaja śpiavačka i lider hurtu "Novaje nieba" Kasia Kamockaja. Kolkaść milicyjantaŭ vakoł vidavočna skaraciłasia. Demanstranty ŭstupajuć ź imi ŭ razmovy i sprabujuć pierakanać u svaich palityčnych pohladach. Pobač z udzielnikami akcyi znachodziacca niekalki mižnarodnych naziralnikaŭ i supracoŭnikaŭ ambasadaŭ.
01:30
U namiotavym haradku pa-raniejšamu znachodzicca kala tysiačy čałaviek, jakija aktyŭna skandujuć "Zastajemsia". Niepasredna kala moładzi znachodziacca kala dziesiaci milicyjantaŭ. Milicyja zatrymlivaje ŭsich, chto pakidaje namiotavy haradok. Unutry haradka idzie impravizavanaja dyskateka. Pad muzyku biełaruskich i ukrainskich vykanaŭcaŭ ludzi prytancoŭvajuć, kab sahrecca. Niadaŭna adbyŭsia malebien "za Biełaruś"
Našy karespandenty bačyli, jak prykładna 15 aŭtobusaŭ z bajcami AMAPu vyjechali z prylehłych da Kastryčnickaj płoščy dvaroŭ i kvartałaŭ i nakiravałasia pa praspekcie na ŭschod horadu. Pavodle hetych uskosnych dadzienych, ŭdzielniki akcyi spadziajucca, što šturmu namiotavaha haradka siońnia nia budzie.
00:30
Kala 1000 čałaviek vyrašyli načavać u namiotavym haradku. Nie hledziačy na zaklik, kab zastalisia adny "sapraŭdnyja mužčyny", u pryblizna 20 namiotach jość jak chłopcy, hetak dziaŭčyny, i ludzi stałaha vieku. Siarod ich Alaksandr Milinkievič, jahonaja žonka Ina Kulej i starejšy syn Alaksandr.
Udzielniki akcyi razumiejuć, što ŭnačy moža adbycca siłavy razhon. Vuličnyja lichtary na Kastryčnickaj płoščy nie harać, u tym liku lichtar, jaki aśviatlaje ŭvachod u metro. Pryjechała hrupa BT, jakija rychtujucca niešta zdymać. Mašyny pa-raniejšamu vitajuć płošču hudkami. Udzielniki akcyi samastojna prybrali ŭvieś plac ad śmiećcia.
Stała viadoma, što zatrymany deputat polskaha Sejmu Jarasłaŭ Jahiełła u vyniku damoŭlenaściaŭ pamiž polskaj ambasadaj u Biełarusi i Ministerstvam zamiežnych spravaŭ Biełarusi vypuščany na svabodu pry ŭmovie, što jon adrazu pakinie Biełaruś. Spadar Jahiejła ŭžo jedzie ŭ Polšču.
23:15
Na płoščy kala 2 tysiačaŭ čałaviek, kala budynku administracyi prezydenta 10 aŭtobusaŭ SOBRa, kiraŭnik hetaha złučeńnia pałkoŭnik Dźmitry Paŭličenka padychodziŭ da płoščy i ahladaŭ mitynh. Deputat polskaha Sejmu Jarasłaŭ Jahiełła byŭ siońnia zatrymany i dastaŭleny na Akreścina, zaŭtra jaho buduć sudzić za ŭdzieł u niesankcyjanavanym mitynhu.
Alaksandr Milinkievič znoŭ pryjšoŭ na płošču i zajaviŭ, što zastajecca z tymi, chto budzie tut načavać
22:30
Na płoščy kala 3 tysiačaŭ čałaviek.
DAI pačała spyniać mašyny, jaki syhnałami vitajuć mitynhoŭščykaŭ.
Adbyŭsia taki incydent. Na skryžavańni praspekta i vulicy Kupałaŭskaj padjechaŭ aŭtobus, adtul vyskačyli amonaŭcy, jany schapili 8 maładych ludziej, što išli na płošču, i adjechali. Amonaŭcy pačali adciskać ludziej ad bardziura, kažučy, što treba zrabić kalidor. Iznoŭ pačali pierakryvać vulicy Kupałaŭskaja i Lenina.
Lavon Volski śpieŭ adnu pieśniu, potym uklučyli zapis pieśniaŭ NRM
21:30
Na płoščy ŭ hety momant kala 5 tysiačaŭ čałaviek, atmasfera śviatočnaja. Na płoščy źjaviŭsia vielizarny transparant "Svabodu palitviaźniam". Milinkievič časova pakinuŭ płošču, kab ciaplej apranucca. Jon zajaviŭ, što budzie tut usiu noč. Alaksandr Kazulin u svaim vystupie havaryŭ, što maje dakładnuju infarmacyju, nibyta nočču budzie razhon namiotavaha haradku. Jon skazaŭ, što "treba trymać hetuju chvalu, kab jana nia źbiłasia, tady 25 sakavika na płoščy budzie 100 tysiačaŭ čałaviek".
Na płoščy staić 20 namiotaŭ, vielmi šmat ježy, pracuje prybiralnia. Jość harbata i kava, ale nie chapaje kipieniu. Ludziej, jakija niasuć na płošču ježu i napai, sprabujuć zatrymlivać na padychodzie da płoščy.
Žančynaŭ zaklikali syści dachaty, kab na płoščy zastalisia tolki "sapraŭdnyja mužčyny". Hučyć ukrainskaja i biełaruskaja muzyka. Z druhoha kanca płoščy ŭklučyli rasiejskuju papsu. Nakont razhonu amonaŭcy skazali našamu karespandentu: "Pakul kamandy nie było".
20:00
Vystupiŭ Alaksandr Milinkievič. Jon vysoka acaniŭ toje, što adbyłosia na płoščy za apošnija dni i zaklikaŭ pravieści jašče bolš masavuju akcyju 25 sakavika. Jon źviarnuŭsia da ŭdzielnikaŭ mitynhu z zaklikam zaprasić na płošču na 25 sakavika svaich znajomych, siabraŭ i susiedziaŭ, a da hetaha kožny dzień a 18-30 prychodzić na płošču. Milinkievič parazmaŭlaŭ z udzielnikami namiotavaha haradka i zajaviŭ, što nia budzie zaklikać da jahonaha zhortvańnia. Paźniej vystupiła žonka Milinkieviča Ina Kulej i spytałasia prysutnych, ci chočuć jany razychodzicca. Płošča adkazała - "Nie!"
19:30
Na płoščy ŭ siaredzinie namiotavaha haradka vystupaje Alaksandar Milinkievič. Jon skazaŭ, što minułaj nočču było zatrymana 108 moładzievych aktyvistaŭ, jakija byli na płoščy. Na płoščy bieł-čyrvona-biełyja ściahi, ściahi Eŭraźviazu i Ŭkrainy.
Milinkievič skazaŭ: "Ja zaklikaju vas ŭsich - zaprasicie svaich siabroŭ i znajomych, kab jany pryjšli na płošču 25 sakavika i pakazali, što my siła i što my pieramožam!" 25 sakavika - 88-ja ŭhodki abviaščeńnia Biełaruskaj Narodnaj Respubliki.
Pa ŭsioj płoščy siońnia adklučanaje śviatło.
Hramadzki dziejač Vacłaŭ Areška zajaviŭ: "Hetymi dniami ŭ Biełarusi adbyłasia vialikaja padzieja. Łukašenka paśla vybaraŭ pračnuŭsia ŭ inšaj Biełarusi, jakaja nia choča žyć pad dyktaturaj. Heta - sapraŭdnaja revalucyja".
19:00
Na płošču pryjechali pasły krainaŭ Eŭraźviazu, jany pahavaryli z udzielnikami mitynhu. Kali dyplamaty pryjechali na płošču, byli raptoŭna adklučanyja čatyry lichtary, jakija aśviatlajuć płošču, tak što sustreča dyplamataŭ z udzielnikami mitynhu prachodziła ŭ pryciemkach.
Zaraz na płoščy znachodzicca pryblizna piać tysiačaŭ čałaviek.
18:00
Na płoščy zaraz stajać nia mienš jak dźvie tysiačy čałaviek. Ludzi atačyli namiotavy haradok. Pa-raniejšamu ludziej zatrymlivajuć ludziej na padychodach da płoščy.
Niadaŭna kala płoščy byŭ zatrymany deputat polskaha Sejmu Jarasłaŭ Jahajła.
Na płošču pryjšoŭ Alaksandar Milinkievič. Čakajecca, što na płošču ŭ chutkim časie pryjeduć pasły eŭrapiejskich dziaržavaŭ.
❏
Žyvy repartaž z płoščy taksama viadziecca ŭ Žyvym žurnale pa adrasie community.livejournal.com/minsk_news/
Jak vyhladaje 46-hadovy juryst Juraś Ziankovič praz try z pałovaj hady źniavoleńnia ŭ biełaruskaj turmie6
Kamientary