Dzień Svajho Ściaha

Pasprabuju praz «NN» vykłaści niekatoryja svaje razvažańni. Nie chaču ŭdavacca ŭ vialikuju palityku — heta nie maja sprava. Mianie bolš cikavić idealohija.

Našy apazycyjnyja partyi i hrupy zašylisia sami ŭ sabie. Uražańnie takoje, što jany dumajuć tolki ab svaich vuzkapartyjnych prablemach. Aby vyžyć, zastacca na płavu. Kruhom apatyja, pesymizm, ludzi pazašyvalisia va ŭłasnych prablemach i maleńkich radaściach. A moładź tym časam słuchaje rasiejskuju papsu, režym dzie tolki moža naviazvaje čyrvona-zialonuju symboliku — na matčy, demanstracyi, užo i na aŭtanumary. Ale nie čynoŭniki trymajuć hetyja ściahi, a sami maładyja ludzi. Jakija jašče i rahočuć ad ščaścia. Inšyja prajaŭlajuć «śmiełaść», naciahvajučy na siabie majku z nadpisam «SSSR» ci partretam Če Hievary. Bač ty, «antyhlabalisty». Buša niajnakš jak debiłam nie nazyvajuć. A z «Pahoniaj» majku nadzieć — absieracca...

Niejak paśla mienskaha tenisu zachodzić da mianie siabar z svajoj novaj hirłoj-małaletkaj. U jejnych rukach čyrvona-zialony fłažok. I aboje takija radasnyja: našy vyjhrali. Kažu joj: tabie nia soramna? Jon mnie: dy budzie tabie, čaho ŭžo ciapier... Adkazvaju: možna nia leźci ŭ palityku i ni ŭ čym nia ŭdzielničać, ale jość ža elementarnyja normy prystojnaści, u kožnym razie nia peckacca. Jana pajšła palić, a jon mnie cicha: a viedaješ, ja ŭžo źmiryŭsia…

Kali b u svoj čas naša palityčnaja elita nie raspylałasia b na drobiazi (u tym liku roznaha kštałtu zbory podpisaŭ, mitynhi, demanstracyi, vybary ŭ dvarovyja rady i da t.p.), a stvaryła paralelnaje (chaj sabie j padpolnaje) biełaruskaje žyćcio z svaimi tradycyjami, salidarnaściu, svajoj kulturaj, adukacyjaj, svaimi normami i praviłami, to naŭrad ci kaho možna było b prymusić uziać u ruki čyrvona-zialony ściah ci partret najvyšejšaha čynoŭnika, bo heta ličyłasia b drennym tonam. Kab pracavali padpolnyja biełaruskija škoły, dzie vykładali b sapraŭdnuju historyju Biełarusi, kab u kožnaha školnika ci studenta byŭ pryhožy i cikavy padručnik historyi, kab kožny viedaŭ, što takoje 25 Sakavika ci bitva pad Voršaj i da t.p., to paniaćcie «vyzvaleńnie Biełarusi» ŭsprymałasia b pa-inšamu, a psychalahičnaja i idealahičnaja baza režymu zvuziłasia da minimumu, mabilizacyjnaja hatoŭnaść moładzi była b maksymalnaj. Režym pierastali b zaŭvažać, što aznačała b jaho palityčnuju śmierć.

Heta, viadoma, pryhožaja fantazija. Siońnia možna prapanavać tolki małoje, ale realnaje. Davajcie dla pačatku abjavim svoj Dzień biełaruskaha Ściaha i Hierbu. Heta 19 vieraśnia — dzień abviaščeńnia Bieł-čyrvona-biełaha ściaha i hierbu «Pahoni» dziaržaŭnymi ŭ 1991 h. Chaj u hety dzień usie aktyvisty i pesymisty pačepiać na vopratku znački, chaj advažnyja vyviesiać našy ściahi, zapuściać šary, aklejuć harady nalepkami... Kali ŭ hety dzień nieznajomyja ludzi pa značkach ubačać adzin u adnym biełarusa, a značyć svajho — choć trochi stanie ciaplej na dušy. A niechta čužy chaj zatrasiecca ad złoby.

Ihar (pesymist), 41 hod, Miensk

Ad Redakcyi.

Temy, jakija kłapociać Vas, tryvožać siońnia i mnohich biełarusaŭ. Dosyć pačytać choć i padborku listoŭ za apošni tydzień. Padzialajem Vašy pamknieńni, nie padzialajem Vašaha pesymizmu. U apošnija hady biełaruskaje dakazała, što ŭmieje vyžyvać i raźvivacca ŭ samych niespryjalnych umovach. Paralelnaje hramadztva jakraz-taki stvaryłasia tam, dzie heta idzie ad patrebaŭ ludziej (niekatoryja intelektuały navat krytykujuć jaho ŭtvareńnie, nazyvajuć heta pamyłkaj, naprykład palitolah Vital Silicki, jaki sam da jaho ŭ peŭnym sensie naležyć). Jano sapraŭdy napaŭpadpolnaje — a Vy čakajecie ad jaho zaŭvažnaści. Zbory podpisaŭ, mitynhi, demanstracyi, vybary ŭ dvarovyja rady — biaz hetaha jano taksama nie abychodzicca, heta i farmuje jaho tradycyi, macuje salidarnaść, normy j praviły. I niezaležny biełaruski druk — nacyjanalny j miascovy, i niezaležnyja biełaruskija škoły — Licej tut samy słaŭny prykład, i niezaležnyja daśledčyckija ŭstanovy taksama vystajali, choć i zadychajucca ad biezhrašoŭja. Biełaruskaja arhanizavanaja supolnaść vypraboŭvajecca kapitalizmam, i jaje vyžyvańnie zaležyć ciapier najpierš ad zamožnaści jaje ŭdzielnikaŭ. Tolki cyvilizacyjna vyšejšaja supolnaść budzie pryciahalnaj dla inšych, tolki zamožnyja ludzi zdatnyja achviaravać hrošy na raźvićcio kultury svajoj supolnaści, jak achviarujuć kurdy ci baski. Paradoks, što tyja — bieździaržaŭnyja nacyi, biełarusy ž majuć dziaržavu, a musiać kłapacicca pra biełaruskuju kulturu sami, tym časam jak aficyjnaja linija — hetuju kulturu falšavać i abmiažoŭvać. Druk i ŚMI, adukacyja, navuka — voś pryjarytety, jakija patrabujuć Vašaj dapamohi.

U Boha dzion mnoha, a pamiatnych dataŭ u biełaruskim kalendary jašče bolej. Kab i Vaša ideja z Dniom Svajho Ściaha pryžyłasia (jaje słaboje miesca — što jana jak by ŭ piku dniu čužoha ściaha, tady jak nacyjanalny tradycyjna ŭšanoŭvajecca ŭ Dzień Voli i Dzień Słuckaha Zbrojnaha Čynu), musova źviartacca da tych, kaho Vy krytykujecie, — partyj, hrupaŭ. Biarycie publikacyju i idziecie da ich. Tolki nie spadziavajciesia na imhnienny efekt. Pakul słabyja ŚMI i adukacyja, Vam ciažka budzie arhanizavać masavuju kampaniju. Ale mahčyma.

• 0
• 0
• 0
• 0
• 0
• 0
• 0
• 0