Piśmieńniki, na dvor!

2 śniežnia SBP atrymaŭ ad Miniustu papiaredžańnie. Pryčynaj stała toje, što Bieraściejskaja abłasnaja filija z červienia 2001 h. nie zdaje štomiesiačnaj padatkovaj deklaracyi. Heta ŭžo druhoje papiaredžańnie arhanizacyi, paśla treciaha Miniust maje prava padać u sud zajavu, kab začynić arhanizacyju.Prablemy bieraściejskaj filii — typovyja dla SBP: hrošaj jana nia maje, u luby momant jaje mohuć vykinuć z ofisu, jaki apłačvaje abłvykankam.Asnoŭnaja ž majomasnaja prablema SBP — pamiaškańni Domu litaratara. Z 1997 h., kali budynak zabrała Kiraŭnictva spravaŭ prezydenta, piśmieńnicki sajuz mieŭ u domie, pabudavanym na hrošy litarataraŭ, 1000 m2 kabinetaŭ i biblijateki. Paśla taho jak staršyniom arhanizacyi ŭ 2002 h. staŭ Aleś Paškievič, a nie kandydat ad Administracyi prezydenta, u SBP pačalisia prablemy. Za arendu pamiaškańniaŭ HHU zapatrabavała płatu ŭ pamiery 10 eŭra za 1 m² — hrošy, niepadjomnyja dla tvorčaha sajuzu.

Dva hady prablema nie znachodziła vyrašeńnia, a ciapier HHU zajaviła, što «ŭ metach uparadkavańnia» zabiraje sabie pamiaškańni Sajuzu, pakidajučy tolki dva pakoi, płoščaj u 38 m². Adzin z tych pakojaŭ siońnia zajmajuć vykanaŭčyja orhany Litfondu, jakim siońnia kiruje hienerał-senatar Mikałaj Čarhiniec, u druhim raz na tydzień adbyvajucca pasiadžeńni litabjadnańnia maładych tvorcaŭ dy mieścicca častka archivu SBP. Astatnija pamiaškańni HHU pahražaje ŭ luby momant kanfiskavać. Pavodle źviestak Sajuzu, u pakoi staršyni SBP maje raźmiaścicca bankietnaja zala restaracyi.

U lik «piśmieńnickaha kanfiskatu» trapiła j aktavaja zala Domu litaratara: raniej Sajuz moh tut dvojčy na miesiac biaspłatna ładzić svaje viečaryny. Pad zabaronaj apynułasia navat prezentacyja knihi Hienadzia Buraŭkina 2 śniežnia. Adbyłasia jana tolki tamu, što abviestki pra viečarynu byli raspaŭsiudžany zahadzia.

HHU pahražaje adabrać u Sajuzu taksama biblijateku j addać jaje peduniversytetu. Pavodle słovaŭ namieśnika staršyni Sajuzu Barysa Piatroviča, u patrabavańniach HHU niama ni kankretyzacyi, što ž, ułasna, kanfiskujecca: tolki pamiaškańni ci j knihi taksama, ni jurydyčnych padstaŭ kanfiskacyi biblijateki. Staršynia Sajuzu A.Paškievič u hetym miesiacy znachodzicca ŭ kamandziroŭcy ŭ Niamieččynie.

Vyjście ź finansavaha kryzisu na siońnia piśmieńniki bačać u prodažy domu adpačynku «Isłač». Jość pakupnik, hatovy zapłacić Sajuzu za budynak $400 tys., pakinuć adzin katedž, 2 ha terytoryi j vydzialać štomiesiac 10 puciovak. Za vyručanyja ad prodažu hrošy piśmieńnickaja arhanizacyja mahła b nabyć budynak u Miensku, dzie raźmiaścilisia b kiraŭničyja orhany SBP i Litfondu. Razhledzieć hetyja prapanovy maje ahulny schod Litfondu, jaki kiraŭnictva abiacała pravieści pry kancy hetaha hodu ci na pačatku nastupnaha, kali jurysty padrychtujuć adpaviednyja dakumenty. Zahvazdka ŭ tym, što hrašyma ad prodažu ŭ takim razie budzie rasparadžacca staršynia Litfondu.

Niekatoryja piśmieńniki bačać u zahadzie vysialacca sprobu nacisnuć na piśmieńnikaŭ, kab dabicca zhody na prodaž «Isłačy», i źviazvajuć usie padziei z asobaj hienerała Čarhinca — adkaznaha «po pisatielam».

Arkadź Šanski

• 0
• 0
• 0
• 0
• 0
• 0
• 0
• 0