Biełaruski finansavy rynak maje svaju specyfiku, abumoŭlenuju specyfikaj biełaruskaj ekanomiki. Asnoŭnaja častka finansavych instrumentaŭ Biełaruskaj valutna-fondavaj biržy — dziaržaŭnyja kaštoŭnyja papiery: dziaržaŭnyja karotkaterminovyja ablihacyi i akcyi pradpryjemstvaŭ, asnoŭnym investaram (akcyjaneram) u jakich vystupaje dziaržava. Nizkaja likvidnaść hetych kaštoŭnych papier značna ŭskładniaje ich fundamentalny analiz i robić amal niemahčymym techničny analiz.
Toje samaje možna skazać i pra biełaruski ŭnutrany valutny rynak, jaki rehulujecca ŭ vielmi małoj stupieni dynamikaj biržavych ździełak i ŭ vielmi vialikaj — palitykaj Nacbanku. Tamu ajčynnyja finansavyja rynki niepryvabnyja navat dla ajčynnaha investara, nia kažučy pra zamiežnych.
Va ŭsim śviecie spekulacyi na suśvietnych finansavych rynkach razhladajucca jak alternatyŭnaje investavańnie. Kali ŭ biznesoŭca ŭźnikajuć akaličnaści, jakija pieraškadžajuć jamu zajmacca tradycyjnym dla jaho vidam pradprymalnickaj dziejsnaści, jon moža źviarnuć uvahu na rynki, jakija vałodajuć absalutnaj likvidnaściu, — u pieršuju čarhu «Forex», «Nasdaq», «Amex», «Nyse», dy niekatoryja tavarnyja rynki, u pryvatnaści zołata i nafty.
Acanić kolkaść biełaruskich investaraŭ, jakija handlujuć na hetych rynkach, niemahčyma — pradprymalniki vymušanyja ŭtojvać krynicu svaich dachodaŭ jak ad dziaržavy, tak i navat ad siabroŭ.
Najbolšuju ciažkaść ź jurydyčnaha hledzišča ŭjaŭlaje investavańnie ŭ kaštoŭnyja papiery zamiežnych emitentaŭ — niezaležna ci heta «General Motors», ci RAT «AES Rasiei». Pryvatnyja asoby, pavodle biełaruskaha zakanadaŭstva, nia majuć prava zajmacca takoj dziejnaściu bieź licenzii, a atrymać hetuju licenziju, pavodle słoŭ biełaruskich finansistaŭ, ciažka navat kamercyjnym bankam.
Bolš «paščaściła» ŭładalnikam mižnarodnych bankaŭskich kartak «Visa» abo «American Express», jakija karystajucca pasłuhami bujnych zamiežnych brokierskich kantor. Pažadana, kab hetaja kartka była emitavanaja zamiežnym bankam, najpraściejšy varyjant — rasiejskim. Choć jość alternatyva ŭ vyhladzie nabyćcia t.zv. numarnoj kartki, u źviestkach jakoj nia značycca proźvišča i kaardynaty ŭładalnika.
Poŭny varyjant artukułu čytajcie ŭ papiarovaj i pdf-versii haety "Naša Niva"
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal7
Kamientary