Яшчэ ўвесну 2013 года Лукашэнка загадаў пусціць у нацыянальны аэрапорт «Мінск» цягнік. Да чэмпіянату свету па хакеі злучэнне наладзіць не паспелі, але за 2014-ы даручэнне ўсё ж выканалі.
З 7 лістапада пяць разоў на дзень да аэрапорта ходзіць цягнік, што адпраўляецца з чыгуначнай станцыі «Мінск-Пасажырскі».
Ім і праехаў наш карэспандэнт. На фота — усё, што вас магло б цікавіць.
Першы рэйс цягніка ў аэрапорт адбыўся 7 лістапада а 16:30.
Перад рэйсам на вакзале не ладзілі ніякіх урачыстых мерапрыемстваў — да усходняга боку платформы проста падагналі дызель-цягнік.
Цягнік будзе хадзіць у аэрапорт і назад пяць разоў на дзень. Адпраўленне з Мінска: 05:35; 08:45; 12:20; 16:30; 20:25. З нацыянальнага аэрапорта «Мінск» да станцыі Мінск-Пасажырскі цягнік адыходзіць а 07:30; 11:05; 14:35; 18:30; 22:25.
Квіткі на цягнік можна купіць у касах, плацежных тэрміналах ці ў праваднікоў. Падарожжа ў адзін бок каштуе 25 тысячаў рублёў. Але, калі купляць квіток у правадніка, давядзецца заплаціць на 2 тысячы больш.
Для паездак у аэрапорт Беларуская чыгунка выдзеліла трохвагонныя польскія саставы.
Пазнаць новы цягнік у аэрапорт можна па шэра-зялёнай афарбоўцы.
Першым рэйсам з Мінска выехала зусім невялікая колькасць людзей.
Элементы зялёнага колеру ў салоне робяць цягнік вельмі ўтульным.
У салоне ёсць разеткі, таму можна будзе зарадзіць свае гаджэты перад палётам.
У салоне БЧ прапануе свае часопісы.
Цягнік ідзе праз Смалявічы — гэта адзіны прыпынак. Цягнік чамусьці не спыняецца на станцыі Мінск-Усходні, хоць яна і знаходзіцца ля станцыі метро. Здаецца, тады б да цягніка ў аэрапорт было зручна дабірацца людзям, якія карыстаюцца Аўтазаводскай лініяй метро.
На жаль, у праваднікоў нельга набыць квіток з дапамогай банкаўскай карткі.
У Смалявічах у цягнік селі супрацоўнікі чыгункі, якія весела святкавалі адкрыццё новай лініі.
Паездка да аэрапорта цягнецца 56 хвілін. Аднак чыгуначная станцыя знаходзіцца ззаду тэрмінала, таму, каб дабрацца да ўваходу ў аэрапорт, трэба перасесці ў аўтобус.
Упрыгожаная да ўрачыстага адкрыцця станцыя Нацыянальны аэрапорт «Мінск».
Паездка на аўтобусе займае яшчэ каля 10 хвілін.
Аўтобус пад'язджае да аэрапорта.
Пасажыраў высаджваюць у зоне адлётаў на другім паверсе тэрмінала.
У адваротны бок аўтобус адпраўляецца з прыпынку ля тэрмінала.