Яднанне ў сувязі з трагедыяй у Парыжы можа дапамагчы нармалізаваць сітуацыю ва Украіне. Аб гэтым у эфіры беларускіх тэлеканалаў заявіў пасол Беларусі ў Францыі Павел Латушка. 11 студзеня ў Парыжы ён узяў удзел у маршы ў памяць аб ахвярах тэрактаў, паведамляе БЕЛТА.
На марш міру ў Парыж прыбылі лідары розных краін. Ужо гэта дае магчымасць абмеркаваць супольныя меры, накіраваныя на вырашэнне буйных міжнародных канфліктаў. «Гэта можа быць стымулюючым фактарам для больш глыбокай ацэнкі падзей у свеце і выпрацоўкі сумесных падыходаў па нармалізацыі сітуацыі ў канфліктных рэгіёнах свету - на Блізкім Усходзе, ва Украіне», - сказаў ён.
У час нападу на рэдакцыю сатырычнага выдання Charlie Hebdo загінуў фатограф і журналіст Мішэль Рэно, жанаты з гамяльчанкай. Павел Латушка расказаў, што пасольства Беларусі ў Францыі накіравала спачуванне жонцы загінулага ў горад Клермон-Феран. Павел Латушка звярнуў увагу, што гэты горад і Гомель — пабрацімы.
На марш міру ў Парыжы выйшлі больш за мільён чалавек. У шэсці ўзялі ўдзел французскія палітыкі, кіраўнікі дзяржаў і ўрадаў, у тым ліку прэзідэнт Украіны Пятро Парашэнка і прэм'ерка Польшчы Эва Копач.
