Дэлегаты пазачарговага XVII з'езда Партыі БНФ, які праходзіць 23 ліпеня ў Мінску, прынялі рашэнне вылучыць 72 прадстаўнікі кандыдатамі ў дэпутаты Палаты прадстаўнікоў.
Сярод вылучаных прэтэндэнтаў у дэпутаты — старшыня партыі Аляксей Янукевіч, намеснікі старшыні Рыгор Кастусёў і Вольга Лагвіновіч, экс-кандыдат у прэзідэнты Алесь Міхалевіч.
Янукевіч адзначыў, што такую вялікую колькасць кандыдатаў у дэпутаты Партыя БНФ вылучае ўпершыню.
Раней Партыя БНФ адмовілася ад удзелу ў кааліцыях на парламенцкіх выбарах гэтага года. Арганізацыя вырашыла ісці на выбары са сваім спісам кандыдатаў і сваёй перадвыбарнай праграмай. У прынятай у чэрвені рэзалюцыі сойма партыі адзначаецца, што арганізацыя «адзінай мэтазгоднай формай узаемадзеяння з палітычнымі суб'ектамі падчас кампаніі 2016 года бачыць кампанію назірання «Права выбару».
Парламенцкія выбары адбудуцца ў Беларусі 11 верасня.
