Адміністрацыя Бабруйскай папраўчай калоніі № 2 ініцыявала супраць палітвязня Эдуарда Бабарыкі новую крымінальную справу, піша «Белсат».
Гэтым разам яго абвінавацілі ў парушэнні артыкула 411 Крымінальнага Кодэксу Рэспублікі Беларусь — злоснае непадпарадкаванне патрабаванням адміністрацыі папраўчай установы, якая выконвае пакаранне ў выглядзе пазбаўлення волі. Пакаранне — год пазбаўлення волі.
Эдуард Бабарыка адбывае пакаранне ў Бабруйскай папраўчай калоніі № 2, ён пакараны 8 гадамі зняволення. З улікам знаходжання ў СІЗА Эдуарду Бабарыку застаецца правесці за кратамі каля 4,5 гадоў. У выпадку, калі ён будзе прызнаны вінаватым паводле артыкула 411 КК РБ, агульным тэрмін яго зняволення павялічыцца на адзін год.
18 ліпеня 2020 года Эдуарда Бабарыку затрымалі разам з бацькам, Віктарам Бабарыкам, калі яны накіроўваліся ў ЦВК здаваць сабраныя подпісы для рэгістрацыі ў якасці кандыдата на пасаду прэзідэнта Беларусі Віктара Бабарыкі. Эдуарда абвінавацілі па трох артыкулах — 342 (арганізацыя і падрыхтоўка дзеянняў, якія груба парушаюць грамадскі парадак), 243 (ухіленне ад выплаты сум падаткаў і збораў), а таксама 130 (распальванне варожасці). Суд пакараў яго пазбаўленнем волі на 8 год.
Эдуард Бабарыка яшчэ можа абскарджваць дзеянні адміністрацыі калоніі, але практыка апошніх год сведчыць, што такія дзеянні не маюць перспектывы.
Каментары