Паўднёвая Карэя пабудуе самы вялікі ў свеце палігон для тэставання беспілотных аўтамабіляў
Пры праектаванні беспілотных аўтамабіляў распрацоўшчыкі сутыкаюцца з вялікай колькасцю праблем і перашкод, у тым ліку пошукам месца для бяспечнага тэставання такіх аўтамабіляў. У ідэале гэта павінна быць вялікае месца, якое не з’яўляецца прыватнай уласнасцю і належыць дзяржаве, а таксама імітуе рэальныя ўмовы вулічнага руху і не стварае небяспеку для мінакоў. Аказалася, што знайсці такое месца — цяжкая задача. Урад Паўднёвай Карэі вырашыў пабудаваць спецыяльнае мястэчка, якое будзе з’яўляцца выпрабавальным палігонам для беспілотных аўтамабіляў, паведамляе Business Korea.
Паўднёвая Карэя імкнецца пазіцыянаваць сябе як лідар у тэхналогіях беспілотных аўтамабіляў, таму зацікаўленасць у будаўніцтве палігона выявіў не толькі ўрад, але і прыватныя карэйскія кампаніі: SK Telecom, Naver, Samsung, Hyundai і Kia.
Згодна з планам Міністэрства зямлі, інфраструктуры і транспарту Карэі, палігон плошчай 360 тысяч квадратных метраў будзе мець спецыяльныя зоны для грамадскага транспарту, хуткасныя зоны, зоны паркоўкі і г.д., каб імітаваць натуральныя ўмовы. Каштаваць такое мястэчка з назвай K-City будзе каля 10 млн даляраў.
K-City будзе большы ў 2 разы, чым палігон у Ан Арбары (Мічыган, ЗША), які зараз з’яўляецца самым вялікім палігонам для тэставання беспілотных аўтамабіляў у свеце. Для Паўднёвай Карэі пабудова такога палігона — сур’ёзны крок, які сведчыць пра сур’ёзныя намеры быць лідарам у гэтай галіне.
Цяпер чытаюць
Даішнік, якога збіў машынай пенсіянер пад Мінскам, памёр у бальніцы. Яму зладзілі пышнае пахаванне18
Каментары