Беларусы Нью-Ёрка адзначылі Дзень Волі маштабнай імпрэзай на Манхэтане ФОТЫ
Беларусы Нью-Ёрка пачалі святкаванне 100-х угодкаў БНР у суботу 24 сакавіка. А 12-й усе сабраліся ў Social Hall на Манхэтане. Свята пачалося з буфета з беларускімі стравамі і прысмакамі. Працавалі таксама кірмаш беларускіх сувеніраў і выстава «Ідэя БНР у ЗША».
Афіцыйная частка пачалася відэавіншаваннем Старшыні Рады БНР Івонкі Сурвілы. З прывітальным словам выступіў таксама ганаровы госць свята — першы амбасадар ЗША ў Беларусі Дэвід Суорц, а доктар гістарычных навук Алесь Смалянчук выступіў з экскурсам у часы стварэння БНР.
Яшчэ адна навуковая прамова — прафесара Уартбург-каледжа і выканаўчага дырэктара Цэнтра беларускіх даследаванняў Паўліны Сурвілы — была прысвечана вывучэнню беларускай ідэнтычнасці ў Амерыцы.
У святочным канцэрце ўзялі ўдзел музыка і кампазітар з Нью-Ёрка, лідар гурта «Літвакус» Зісл Сляповіч, выканаўцы з Беларусі Яўген Сокалаў (гурт ЗНАрок) і вядомы рэпер і кінаактор Vinsent.
Дзень Волі ў Нью-Ёрку быў падрыхтаваны камандай Беларускага інстытута Амерыкі. Беларуская фундацыя Крачэўскага, а таксама Фонд Орса-Романа часткова падтрымалі фінансава гэта мерапрыемства. Выстава была падрыхтавана з удзелам БФК, а менавіта сп. Валянціны Трыгубовіч
Каментары