Сусветная арганізацыя аховы здароўя (СААЗ) па выніках нарады ў чацвер абвясціла ўспышку каранавіруса nCoV2019 надзвычайнай сітуацыяй у галіне грамадскай аховы здароўя, якая мае міжнароднае значэнне, піша interfax.ru.
Генеральны дырэктар СААЗ Тэдрас Адханом Гебрэйесус падкрэсліў, што вельмі высока ацэньвае меры, што прымаюцца Кітаем для стрымлівання пашырэння хваробы, і назваў іх «новым стандартам дзеянняў для такіх сітуацый». Па словах Гебрэйесуса, у кітайскіх уладаў ёсць усё неабходнае, каб справіцца з успышкай новага каранавіруса, аднак прадказаць наступствы трапляння віруса ў краіны з менш развітай сістэмай аховы здароўя СААЗ не можа.
«Мы павінны дзейнічаць зараз, каб дапамагчы краінам падрыхтавацца да такой магчымай сітуацыі», — растлумачыў ён.
У той жа час Гебрэйесус адзначыў, што важкіх падстаў для ўвядзення абмежаванняў на міжнародныя паездкі і гандаль пакуль няма.
Яшчэ тыдзень таму ў СААЗ лічылі заўчасным абвяшчаць успышку пнеўманіі, выкліканай новым каранавірусам, надзвычайнай сітуацыяй міжнароднага ўзроўню.
Успышка пнеўманіі ў кітайскім горадзе Ухань (правінцыя Хубэй) пачалася ў сярэдзіне снежня 2019 года, узбуджальнікам стаў раней невядомы каранавірус.
За межамі Кітая выпадкі заражэння віруснай пнеўманіяй зафіксаваныя ў двух дзясятках краін, у тым ліку ў Сінгапуры, Тайландзе, Японіі, Паўднёвай Карэі, ЗША, Канадзе, ААЭ, Германіі, Францыі, Фінляндыі, Аўстраліі.
Паводле апошніх звестак, у Кітаі пацверджаныя 9 692 выпадкі захворвання. Смяротнасць складае 2,4% (213 выпадкаў) — гэта ніжэй, чым пры выкліканых узбуджальнікамі сямейства каранавірусаў атыповай пнеўманіі SARS (9,6%) і Блізкаўсходняга рэспіраторнага сіндрому (MERS) (36%).
Вірус можа перадавацца ад чалавека да чалавека, у тым ліку падчас інкубацыйнага перыяду, працягласць якога дасягае 14 дзён.
